قازاقستان مۇسىلماندارى ءدىني باسقارماسى ۇلىق، مەرەيلى، مەيىرىم مەرەكەسى – قۇربان ايتتى ۇلتتىق ناقىشپەن، جان-جاقتى دايىندىقپەن وتكىزۋدى جوسپارلاپ وتىر، دەپ حابارلايدى Bnews.kz. بۇنداي اقپاراتتى قمدب باسپا ءسوز قىزمەتى تاراتقان.

باس ءمۇفتي ەرجان قاجى مالعاجى ۇلىنىڭ باستاماسىمەن وبلىس، اۋدان ورتالىقتارى مەن قالالارداعى مەشىت اۋلالارىندا كيىز ۇيلەر تىگىلىپ، مۇمكىندىگى شەكتەۋلى جاندار ءۇشىن ارنايى داستارحان جايىلادى. قازاقتىڭ ۇلتتىق سپورت تۇرلەرىنەن (ارقان تارتىس، قازاقشا كۇرەس، گىر تاسىن كوتەرۋ، اسىق ويىنى، بەلتەمىرگە تارتىنۋ، ت.ب.) سايىستار وتكىزىلەدى. سونداي-اق، مەشىت اۋلاسىندا بالالارعا ارنالعان ارنايى ويىن الاڭدارى جۇمىس ىستەمەك. رەسپۋبليكا بويىنشا جەتىم بۇلدىرشىندەر مەن مۇگەدەكتەرگە مەرەكەلىك باعدارلامالار ازىرلەنەدى.

مۇسىلمان قاۋىمىنىڭ ۇلىق مەرەكەسى – قۇربان ايتتىڭ قۇرمەتىنە الماتى قالاسىندا م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا تۇڭعىش رەت رۋحاني كەش وتەدى. كەشتە رۋحاني ساحنالىق قويىلىمدار كورسەتىلىپ، ءدىني اندەر مەن تەرمەلەر ورىندالادى.

بيىل قۇربان ايت قازان ايىنىڭ 4-7 ارالىعىندا تويلانادى، بۇل مۇسىلمان كۇنتىزبەسى بويىنشا ءزۇل-حيدجا ايىنىڭ 10-13 كۇندەرىنە سايكەس كەلەدى.

قامشى-اقپارات