گەيلەردىڭ قۇقىقتارىن شەكتەۋگە قاتىستى زاڭ قابىلداۋ – بۇل ديسكرينيماسيا. مۇنداي پىكىردى الماتى قالاسىندا «بولاشاق» قوزعالىسى مەن لگبت-قاۋىمداستىعى مۇشەلەرىنىڭ باس قوسۋىندا لگبت مۇشەسى ايتقان. Bnews.kz بۇل تۋرادى الماتى تەلەارناسىنا سىلتەمە جاساپ حابارلادى.

«وكىنىشكە قاراي، ءبىز ءقازىر لگتب-شىلاردىڭ ءوز وريەنتاسياسىن جاسىرمايتىن كۇنگە جەتتىك. مۇنداي ادامداردى قالا ورتالىعىنداعى ساۋدا ورىندارىندا نەمەسە قوعامدىق ورىنداردا كوپتەپ كەزدەستىرەتىن بولدىق – ءتۇرلى-تۇستى شالبار كيگەن جاستار وزدەرىنىڭ وريەنتاسياسىن جاسىرمايتىن بولعان»، - دەپ اشىنعان «بولاشاق» قوزعالىسى جەتەكشىسى داۋرەن بابامۇراتوۆ. سونىمەن قاتار، ول كۇي اتاسى قۇرمانعازى مەن پۋشكيندى ءسۇيىستىرىپ قويعان جارناما پوستەرىنە قاتىستى تۇتانعان داۋ-دامايعا، بىلايعى جۇرتتىڭ نارازىلىق تانىتقانىنا ەل بيلىگىنىڭ نازار سالماعانىنا قىنجىلىس ءبىلدىردى. داۋرەن بابامۇراتوۆ قوزعالىس مۇشەلەرىمەن بىرگە «قازاقستاندا لگتب-نى ناسيحاتتاۋعا تىيىم سالۋ تۋرالى» زاڭ قابىلداۋدى تالاپ ەتەتىن ۇندەۋ ازىرلەگەن. ونىڭ ايتۋىنشا  الەمنىڭ ونداعان ەلىندە مۇنداي زاڭ قابىلدانعان. «بولاشاق» مۇشەلەرى لگتب-شىلاردى مەملەكەتتىك قىزمەتكە الماۋدى جانە قازاقستان قارۋلى كۇشتەرىنىڭ قاتارىنا شاقىرماۋدى تالاپ ەتپەك. وسى جيىنعا قاتىسقان «اق جول» پارتياسىنىڭ وكىلى ءارى ساياساتتانۋشى ماقسات جاقالوۆ ءسوز الىپ: «ءبىز ولاردى ءتۇسىنۋىمىز كەرەك، ولاردى قىلمىسكەرلەر قاتارىنا جاتقىزباۋ قاجەت. الايدا، ءبىزدىڭ قوعامىمىزدا مۇنداي قاتىناس اشىق كورسەتىلمەۋى ءتيىس. ءار نارسەنىڭ شەگى بارىن بىلە جۇرگەنىمىز دۇرىس. بالكىم، زاڭ قابىلدانبايتىن شىعار، دەسە دە مۇنىڭ ءبارى دابىل قاققانىمىز دەپ تۇسىنىڭىزدەر»، - دەگەن.

قامشى-اقپارات