كەشە، 15 قىركۇيەك رەسپۋبليكالىق جەمقورلىققا قارسى ءىس-قيمىل قوعامدىق كەڭەسىنىڭ (رجقىقك) وتىرىسىندا «جاس وتان» جاستار قاناتىنىڭ اتقارۋشى حاتشىسى نۇرلان سىدىقوۆ وسىلاي دەپ مالىمدەدى.

ونىڭ ايتۋىنشا، «نۇر وتان» پارتياسىنىڭ «STOP قىلمىس» جوباسىنىڭ اياسىندا جاسوتاندىقتار جىل ورتاسىنا قاراي استانا مەن الماتى قالالارى جانە ەلىمىزدىڭ بارلىق وبلىستارىندا  «تازا سەسسيا» اكسياسىن وتكىزگەن.

«ساۋالناما بارىسىندا الىنعان مالىمەتتەر نەگىزىندە جوو-داعى قانداي دا ءبىر قىزمەتتەردىڭ باعاسىن انىقتادىق. مىسالى، 12 000 تەڭگەگە ءبىر جوو-دا ءبىر ءپاندى عانا جابۋ مۇمكىن بولسا، ەكىنشىسىندە بارلىق سەسسيانى جابا الادى ەكەنسىز. ياعني، ەلىمىز بويىنشا سەسسيانى جابۋ قۇنى ورتا ەسەپپەن 29 000 تەڭگەنى قۇرايدى. ال ءبىر ءپاندى جابۋ 5000 تەڭگە»، - دەدى ول.

«بۇعان قاراپ، ءبىز، جاستار جوو-عا ءبىلىم الۋ ءۇشىن ەمەس، جاي عانا ديپلوم الۋ ءۇشىن باراتىنداي اسەردە قالامىز. ءبارى اقشامەن شەشىلەتىن بولسا، ونىڭ نەسى ءبىلىم دەپ ساۋال تاستاۋىمىز زاڭدى بولسا كەرەك. تىپتەن، كۋرستىق جۇمىستاردىڭ ءوزى  13 000 تەڭگە ەكەن. ەڭ ارزاندارى 2000-3000 تەڭگەنى قۇرايدى»، - دەپ اتاپ ءوتتى نۇرلان سىدىقوۆ.

سونداي-اق، ول، 60 000 تەڭگەگە ديپلوم جۇمىسىن ساتىپ الۋعا بولاتىنىن ايتا كەلە، ولاردىڭ دا ورتاشا قۇنىنىڭ اعىمداعى ۋاقىتتا 30 000 تەڭگەنى قۇرايتىنىنا توقتالدى.

ايتا كەتەيىك، ا.ج. 26 مامىر مەن 10 ماۋسىم ارالىعىندا «جاس وتان» جاستار قاناتىنىڭ كۇش سالۋىمەن 62 جوو-نى قامتىعان ءانونيمدى ساۋالناما جۇرگىزىلدى. بۇل اكسيا وقۋ وردالارىنداعى جەمقورلىق فاكتىلەرىن اشكەرلەۋگە باعىتتالدى.