كەشەلى بەرى ءبىراز جۇرت باس پروكۋراتۋرانىڭ ەلىمىزدە تىركەلمەگەن شەتەل، ونىڭ ىشىندە رەسەي ارنالارىن اۋىزدىقتايمىز دەگەن مالىمدەمەسىنە قۋانىپ جاتىر. مەنىڭ قورقاتىنىم مىناۋ. جۇرتقا قىزىقتى، پايدالى ارنالار بولادى، سولار تىركەۋدەن وتپەي، يمپەرلىك ۋاعىز-ناسيحات ايتاتىن ارنالار كەلىپ، تىركەلە سالا ما دەپ قورقامىن. ولارعا قارسى ءبىزدىڭ شەنەۋنىكتەر ەشتەڭە دەپ ايتا دا قويماس. مىسالى، قازاققا بولا ەۋروسپورت، حيستوري، ديسكاۆەري دەگەن سياقتى تانىمدىق ارنالار ادەيىلەپ كەلىپ، مينيسترلىكتىڭ قۇجاتىن الىپ جاتپاسى انىق. ەسەسىنە ولاردىڭ ورنىنا بەس-ون رەسەيلىك تەلەارنا كىرىپ كەتسە دە تاڭ قالمايمىن. مىسالى، مەن الما-تۆ دەگەن بالەنىڭ تۇتىنۋشىسىمىن. كەزىندە ءدال وسى تانىمدىق تەلەارنالار ءۇشىن قوسىلعانمىن. بۇگىندە سولاردىڭ ءبىرازى ليسەنزيا جوق دەگەن اڭگىمەمەن كابەلدىك ارنانىڭ مازىرىنەن ءتۇسىپ قالدى. ورنىنا كىل رەسەيلىك تانىمدىق ارنالار كىرىپ الدى. باعىتتارى دا ايقىن ەندى. سوعان بولا سمارت-تەلەديدار ساتىپ الىپ، كوپتەگەن دۇنيەنى ينتەرنەتتەن كورۋگە ءماجبۇرمىن. سەبەبى وسى ارنانىڭ كونتەنتىنىڭ 70-80 پايىزى رەسەيلىك تەلەارنالار. سوندا ماعان الما-تۆنىڭ نە قاجەتى بار؟ ەگەر رەتتەۋدى باستايتىن بولساق، الدىمەن وسى كابەلدىك ارنالاردان باستاعانىمىز دۇرىس سياقتى. ارنالاردىڭ پاكەتتەرىندە ءبىر ەلدىڭ ۇلەسى 20 پايىزدان اسپاۋى ءتيىس دەگەن شەكتەۋ قويۋ كەرەك سياقتى. باسپا ءسوز تۋرالى زاڭدا شەتەلدىكتەر قازاق ءباسپاسوزىنىڭ 20 پايىزىنان ارتىق يەگەرى بولماۋى ءتيىس دەگەن نورما بار. وسىنى كابەلدىك ارنالارعا دا تاعۋ كەرەك. كورشى ەلدەردىڭ ارنالارىن كوبىرەك قوسسىن، وزىمىزگە ماڭىزى بار دەگەن الپاۋىت ەلدەردىڭ ەڭ بولماسا بىرەۋدەن باستى جاڭالىق تاراتاتىن ارنالارىن قوسسىن. شەتەل تىلدەرىن ۇيرەنۋگە دە سەپ بولادى.

ايدوس سارىم. (Facebook-تەگى پاراقشاسىنان)