يادرولىق قارۋ جانە ونىڭ ءتۇرلى قۇرامداس بولىكتەرى قازاقستان تەرريتورياسىنا كىرگىزىلمەيدى. ەلىمىزدە وسىعان قاتىستى قاۋىپسىزدىك شارالارى كۇشەيتىلگەن. Tengrinews.kz سايتىنىڭ جازۋىنشا، بۇل تۋرالى  ۇلتتىق قاۋىپسىزدىك كوميتەتى مالىمدەگەن.

"ەلىمىزدە قاۋىپسىزدىككە قاتىستى قالىپتاسقان جۇيە ءبىزدىڭ باقىلاۋىمىزسىز رەسپۋبليكا تەرريتورياسىنا راديواكتيۆتى ماتەريالداردىڭ كىرگىزىلۋىنە جول بەرمەيدى"، - دەلىنگەن كوميتەتتىڭ رەسمي حابارلاماسىندا. مۇنداي حابارلاما جاساۋعا تمد-داعى انتيتەرروريستىك ورتالىقتىڭ باسشىسى اندرەي نوۆيكوۆتىڭ مالىمدەمەسى سەبەپ بولعان. ول قازاقستان ارقىلى يادرولىق قارۋدىڭ  تاسىمالدانۋ ءقاۋپى بار ەكەنىن ايتقان ەدى. "تەرروريستىك توپ تمد ەللدەرىنىڭ تەرريتورياسىن، سونىڭ ىشىندەگى قازاقستاندى يادرولىق قارۋدى تاراتۋ ءۇشىن پايدالانۋى مۇمكىن دەگەن ءقاۋىپ بار" - دەگەن بولاتىن ول.  ۇقك تمد-داعى انتيتەرروريستىك ورتالىق باسشىسىنىڭ يادرولىق قارۋلاردىڭ ءبىزدىڭ ەلىمىز ارقىلى تاسىمالدانۋى مۇمكىن دەگەن قاۋىپپەن ايتىلعان ءسوزىن قاۋىپسىزدىك شارالارىن الدىن الۋعا نەگىزدەلگەن دەيدى. "ياعني تەرروريستىك توپ مۇشەلەرى بەلورۋسسيا، رەسەي ارقىلى يادرولىق قارۋ تاسىمالداعان جاعدايدا قازاقستاندا تەرروريستىك اكت جاساۋدىڭ الدىن الۋ ءۇشىن وقۋ-جاتتىعۋ جۇمىستارى جۇرگىزىلگەن. وقۋ-جاتتىعۋ جۇمىستارى بارىسىندا تمد ەلدەرىنىڭ مەملەكەتتىك ورگاندارىنىڭ ارەكەت ەتۋ الگوريتمدەرى تالقىلاندى" - دەلىنگەن.  تەرروريزمدى زەرتتەۋ حالىقارالىق اسسوسياسياسىنىڭ مۇشەسى تاتيانا درونزينانىڭ ايتۋىنشا قازاقستاندا تەرروريستىك جەلىلەر بار، ءبىراق ولار ازىرگە بەلسەندى ەمەس. سوندىقتان ساراپشىنىڭ ويىنشا قازاقستاندا يادرولىق قارۋدى جاساۋعا قولدانىلاتىن يادرولىق ماتەريالداردى ەسەپتەپ، باقىلاۋدى كۇشەيتۋ كەرەك. 

قامشى-اقپارات