بۇگىن پاۆلودار قالاسىندا قازاقتىڭ كورنەكتى جازۋشىسى، دراماتۋرگ، پۋبليسيست، قازاق ادەبيەتىن قالىپتاستىرۋشىلاردىڭ ءبىرى جۇسىپبەك ايماۋىتوۆتىڭ ەسكەرتكىشى اشىلادى. بۇل تۋرالى Baq.kz  وبلىس اكىمدىگىنىڭ باسپا ءسوز قىزمەتىنە سىلتەمە جاساپ حابارلادى. 

ورناتىلۋى ءتيىس ءمۇسىننىڭ بيىكتىگى 3،6 مەتردى قۇرايدى. ال تۇعىرىمەن بىرگە بيىكتىگى - 7،6 مەتر. جۇسىپبەك ايماۋىتوۆتىڭ ەسكەرتكىشى قولادان قۇيىلعان، تۇعىرى قويۋ قارا ءتۇستى جىلتىر گرانيتتەن سوعىلعان. ەسكەرتكىشتىڭ اۆتورى - استانالىق ءمۇسىنشى ەرمەك توقتاروۆ. مەرەكەلىك شارا اياسىندا ج.ايماۋىتوۆتىڭ ەسىمى بەرىلگەن وبلىستىق تەاتردا عىلىمي-پراكتيكالىق كونفەرەنسيا ۇيىمداستىرىلادى.  جازۋشى مەرەيتويى باياناۋىل اۋدانىندا دا جالعاسىن تابادى. «ارداقتى الاش ازاماتى» اتتى مۋزىكالى-ادەبي كەش جانە ۇلتتىق سپورت تۇرلەرىنەن جارىستار باياناۋىل اۋدانى مويىلدى القابىندا وتەدى. 

بيىل جۇسىپبەك ايماۋىتوۆتىڭ 125 جىلدىق مەرەيتويى.  ول ستالين جازالاۋ ساياساتىنىڭ ەڭ العاشقى قۇرباندارىنىڭ ءبىرى بولىپ، 1931 جىلى اتىلدى.

قامشى-اقپارات