رەسەي پرەزيدەنتى ۆلاديمير پۋتين ۋكراينالىق ارىپتەسى پەتر پوروشەنكومەن اڭگىمەلەسكەن كەزىندە ءوز ارمياسى ەكى كۇن ىشىندە كييەۆتى عانا ەمەس، ەۋروپانىڭ باسقا دا قالالارىن باسىپ الاتىنىن ايتقان. بۇل تۋرالى 18 قىركۇيەك كۇنى نەمىستىڭ Süddeutsche Zeitung باسىلىمى پوروشەنكو مەن ەۋرووداق باسشىلارىنىڭ اڭگىمەسى جازىلعان جازبانى نەگىزگە الىپ حابارلاعان.

ەۋروپالىق سىرتقى ساياسات قىزمەتى كەلىسسوزدەرىنىڭ حاتتاماسىنا قاراعاندا، ۋكراينا پرەزيدەنتى بۇل تۋرالى ەۋروپالىق كوميسسيا ءتوراعاسى جوزە مانۋەل بارروزۋعا وتكەن جۇما كۇنى ونىڭ كييەۆكە ساپارى بارىسىندا ايتقان. پوروشەنكونىڭ ايتۋىنشا، پۋتين وعان سوزبە-سوز: "ەگەر مەن قالاسام، رەسەيلىك جاساقتار ەكى كۇن ىشىندە كييەۆتى عانا ەمەس، ريگانى، ءۆيلنيۋستى، ءتالليندى، ۆارشاۆا مەن بۋحارەستى دە باسىپ الار ەدى"، - دەگەن.

Tengrinews.kzء-تىڭ جازۋىنشا، پوروشەنكو ءپۋتيننىڭ ءسوزىن كرەمل باسشىسىنىڭ ەۋرووداقتىڭ رەسەيمەن كورشىلەس ەلدەرگە ىقپالىنا ەموسيالىق تۇرعىدان قانشالىقتى قارسى تۇرا الاتىنىن كورسەتۋ ءۇشىن كەلتىرىپ وتىر. 

بۇعان دەيىن ەۋروپادا جوزە مانۋەل بارروزۋ مەن ۆلاديمير ءپۋتيننىڭ تەلەفون ارقىلى اڭگىمەلەسكەنى كوپشىلىكتى ەلەڭ ەتكىزگەن ەدى. پۋتين ول كەزدە: "مەن قالاسام، كييەۆتى ەكى اپتا ىشىندە الار ەدىم" دەگەن-مىس. تامىز ايىنىڭ سوڭىندا بارروزۋ بۇل اڭگىمەنىڭ مازمۇنىن ەۋروپا ەلدەرى جەتەكشىلەرى مەن ولاردىڭ ۇكىمەت باسشىلارىنا جاريا ەتتى. كرەمل بارروزۋدى جەكە اڭگىمەنى كوپشىلىككە جاريا قىلدى دەپ ايىپتادى.

قامشى-اقپارات