تۇرانكەر: قوش كەلدىڭىز قانات اعا! ەلدى ساعىندىڭىز با؟ شەتتە جۇرگەندە ءسىزدىڭ ساعىنىشىڭىزدى نە باسادى؟؟
- ارينە، ەلدى ساعىنامىن. ءبىراق، ول جەردە باستى ماقسات قازاقتىڭ نامىسىن بەرمەۋ، ناتيجە مەن تابىس. ول ءۇشىن كوپ جاتتىعۋ، تىنباي ەڭبەكتەنۋ كەرەك. شىنىن ايتسام ەل-جۇرتىم دەپ ساعىنۋعا ۋاقىت تا تابا المايسىڭ.
ارىس: اسسالاۋماعالەيكۇم جەرلەسىم، بالا كەزىڭدە، قابادا سەندەرمەن بىرگە ابزال دەيتىن بالا دايىندالعان با ەدى؟ ءانشى قاجىمۇراتپەن ارالاسىپ تۇراسىڭ با؟ راحمەت!
- ۋاعالايكۇماسسالام! ابزال ءقازىر الماتى قالاسىندا. ەكى بالاعا اكە بولىپ، امان-ساۋ ءجۇرىپ جاتىر. قاجىمۇرات اۋىلداسىم عوي، جاقسى سىيلايمىن.
اينا: امانسىز با قانات اعا؟! ءسىزدىڭ ەلگە كەلگەنىڭىزدى ەستىپ قۋانىپ قالدىق، اقش-تاعى كۇندەرىڭىز قالاي ءوتتى، ءسىزدىڭ قول جەتكىزگەن جەڭىستەرىڭىزگە ءدان ريزامىز، ءار قاشان ءسىزدىڭ جەڭىس تۋىن جەلبىرەتكەن كەزىڭىزدە مارقايىپ قالامىز، تالماڭىز اعا، جەڭىسكە جەتە بەرىڭىز!؟
- تىلەگىڭىزگە راحمەت! ول جاقتاعى كۇندەرىمىز تەك قانا دايىندىقپەن، تىنبايتىن جاتتىعۋمەن ءوتتى، ءار ءساتىم جەڭىسكە دەگەن ۇمتىلىس قانا.
داستان: امان ورالدىڭىز با باتىر باۋىرىم، ماعان سىزگە اقش-تاعى جاسالاتىن كۇتىمنىڭ جايى قىزىق، قانشا دەگەنمەن دە جىلى جۇمساعىن الدىڭىزعا توساتىن اناڭىز قاسىڭىزدا ەمەس، قازى-قارتا، جال-جاياسىن دايىندايتىن كوپ قازاق تا جوق وندا، جالپى دەنساۋلىعىڭىز قالاي؟ ول جاقتاعى كۇتىم كوڭىلدەگىدەي مە؟؟
- اللاعا شۇكىر، دەنساۋلىعىم جاقسى. ارينە، قازاقتىڭ قانىنا ءسىڭىپ كەتكەن تاماعى - قازى-قارتانى ساعىناسىڭ. ءبىزدىڭ ەل «ولەسىڭ» دەسەدە ەت جەيتىن حالىق قوي. دەگەنمەن، ول جاقتاعى نەگىزگى تاماق بالىق پەن تاۋىق جانە ءتۇرلى كوكونىس. مەندە تاماق تاڭداپ جەۋ قۇقىعى جوق، تالاپ ەتىلگەن تاماقتى جەيمىن. كۇتىم ويداعىداي، الاڭداۋشىلىعىڭىزعا راحمەت!
كەمەل قاراتاي: قانات ءىنىم، قالىڭ جاقسى ما؟ اينالايىن جالىنىڭ سونبەسىن، ارىنىڭ باسىلماسىن! بۇل جولى قانشا ۋاقىت بولماقسىڭ ەلدە، مۇندا قاشان ءبىر جولا كەلەسىن، كوڭىل-كۇيىڭ قالاي؟
- جاقسىمىن اعا. 20 قىركۇيەك مەنىڭ پروموۋتەرىم كەلەدى، 30-ىنا دەيىن بىرگە قايتا ۇشىپ كەتۋىمىز مۇمكىن. ويتكەنى ماعان دەمالۋعا بولمايدى. ءبىر كۇندىك دەمالىسىم 10 كۇندىك جاتتىعۋ ەڭبەگىمدى جوعالتادى. كوزدەگەن بيىك، العا ماقسات ورىندالسا، شەتەلدە ءبىر كۇندە تۇرمايمىن.
جەكسەن: قانات، ءسىزدىڭ سوڭعى جەكپە-جەگىڭىزدە “اللاھۋاكبار! العا، قازاقستان!” دەپ ايعايلاعانىڭىزدى ەستىگەن ساتتە ەرەكشە تەبىرەنىسكە ءتۇسىپ كەتتىم، ءسىزدىڭ قارسىلاس شىداتپايتىن بىلەگىڭىزدى ەمەس، قازاقستاندى، قازاقتى سۇيەتىن جۇرەگىڭىزدى قاتتى سىيلايمىن، ءاماندا امان ءجۇرىڭىز، مەرەيىڭىز ۇستەم بولا بەرگەي، قاسقايىپ بار قازاقتىڭ قاناتى بولىپ جۇرە بەرىڭىز! قوياتىن سۇراعىم، شەتەلدىك ب ا ق سىزدەن ءجيى سۇحباتتار الا ما؟ شەتەلدىڭ باسىلىم بەتتەرى ءسىز تۋرالى قالاي جازادى؟؟
- پەيىلىڭىزگە العىس بىلدىرەمىن. ءيا، مەنىڭ جەڭىستەرىم تۋرالى «دومينيكا كولۋمبيا»، «ەكۋاتور امەريكا» باسىلىمدارىندا شىققانىن ەستىدىم. «كەلدى، قىسقا ۋاقىتتا ۇلكەن ناتيجەلەرگە جەتتى، رەكوردتارعا قول جەتكىزدى» دەپ جازىپ جاتاتىن كورىنەدى.
دۇيسەنبەك: اسسالاۋماعالەيكۋم قانات اعا، سىزگە ءارقاشان اماندىق تىلەيمىن. كەلەسى جەكپە – جەگىڭىز قاشان بولادى جانە ودان كەيىن چەمپيوندىق اتاققا تالاسۋعا مۇمكىندىگىڭىز بارما؟
- شىنىن ايتقاندا وسى جولعى جارىس چەمپيوندىققا تالاسۋدىڭ كەلىپ تۇرعان مۇمكىندىگى ەدى. ءبىراق مەنى اۋەسقوي بوكستا ءبارى تانىعانىمەن، كاسىپقوي بوكستا قازىرگە مەن ەشكىم ەمەسپىن. كاسىپقوي بوكسپەن اينالىسقان ەكى جىلدىڭ ىشىندە مەن باسقاشا قانات بولدىم. مەنىڭ پروموۋتەر، جاتتىقتىرۋشىلارىم وسى اتاعىمدى قورعاۋىم كەرەك ەكەنىن، WBA رەيتينگىندە دارەجەم تاعىدا كوتەرىلۋى كەرەك ەكەنىن ايتىپ، چەمپيوندىق سايىسقا جىبەرمەي وتىر. كەلەسى كەزدەسۋدەن كەيىن چەمپيوندىق اتاققا تالاسامىن، اللا بۇيىرتسا. ەندىگى كەزدەسۋدى قازاننىڭ 30-ى دەپ جوسپارلاپ وتىرمىز، وزگەرۋى دە مۇمكىن.
امانجول: تۋعان جۇرتىڭىزدىڭ، وتانىڭىزدىڭ تاعدىرىنا الاڭدايتىنىڭىز انىق، نەگىزىنەن قانداي قازاق باسپاسوزدەرىن قارايسىز، كىتاپ وقۋعا، ينتەرنەت قاراۋعا ۋاقىتىڭىز بولىپ جاتا ما؟
- ارينە، ۋاقىت بولا قالعان كەزدە قازاق ەلىنىڭ جاڭالىقتارىن، جۇڭگو قازاقتارىنىڭ باسىندا بولىپ جاتقان وقيعالاردى قالت جىبەرمەي وقىپ وتىرامىن. ويتكەنى ءوز ەلىمنىڭ تاعدىرى ءارقاشان نازارىمدا. ەلدەن جىراقتا ءجۇرىپ، بەيجاي وتىرا المايسىڭ.
التىنبەك تورە: اسسالاۋماعالەيكۇم، قانات باۋىرىم! مەنىڭ وزىڭە قوياتىن 3 سۇراعىم بار ەدى: 1) ەندى شامامەن قانشا كەزدەسۋ وتكىزۋىڭ كەرەك چەمپيون بولۋىڭ ءۇشىن؟ 2) نەگە ءبىزدىڭ ەلدەن بارعانداردىڭ بارلىعى WBA تۇجىرىمى بويىنشا بوكستاسادى؟ نەگە WBC-تەن باستامايدى نەمەسە سول تۇجىرىمنىڭ چەمپيونى بولۋعا تالپىنبايدى؟ باسقا تۇجىرىمنىڭ چەمپيوندىعىنا تالاسۋعا قانداي كەدەرگىلەر بار؟ 3) ءۇشىنشى ءسابيىڭ اقش-تا دۇنيەگە كەلىپتى، باۋى بەرىك، وسكەندە ساعان سەرىك بولسىن! اقش زاڭى بويىنشا ول بىردەن سول جاقتىڭ ازاماتتىعىن الدى. بولاشاقتا بالالارىڭدى اقش-تا قالدىرىپ، سول جاقتا ءبىرجولاتا ءوسىرىپ، سول ەلدىڭ جەرگىلىكتى تۇرعىنى قىلۋ جوسپاردا بار ما؟
- العاشقى سۇراعىڭىزعا جوعارىدا جاۋاپ بەرىلدى. چەمپيوندىق اتاققا كەلەسى باسەكەدەن سوڭ-اق تالاسا الامىن. ال، تۇجىرىمداما بويىنشا ەشقانداي كەدەرگى جوق. WBC، WBA، WBO، IBF تۇجىرىمدامالارىنىڭ كەز كەلگەنىن تاڭداۋىڭا بولادى. دەگەنمەن بوكسشىنىڭ كەلىسىم-شارتقا وتىرعاننان كەيىن تاڭداۋ قۇقىعى بولمايدى. باسىندا جۇمىس قالاي باستالدى، سولاي كەتە بەرەسىڭ. ونىڭ ۇستىنە بىردەن بارىنە شاماڭ كەلمەيدى، دارەجەڭ كوتەرىلىپ، كوپ كەزدەسۋ وتكىزسەڭ كەز كەلگەنىن الۋىڭا بولادى. مىسالى گەناديي گولوۆكين بىرەۋىن الىپ، ەندى ەكىنشى تۇجىرىمدامادا بوكستاسىپ ءجۇر. مەنىڭ دە كەلەسى جىلدان باستاپ WBC بويىنشا ب ا ق سىناۋىم مۇمكىن. بالالارىما كەلسەك، بولاشاقتا اقش-تا قالمايدى، ولار دا قازاق ەلى ءۇشىن جۇمىس ىستەۋى كەرەك. اقش-تاعى جۇمىسىم اياقتالعان كەزدە ولار دا مەنىمەن بىرگە وتانىنا ورالادى.
زەكەي.ە: قانات باۋىرىم اللا اماندىعىڭدى بەرسىن! مەن سەنىڭ ەرلان اعاڭنىڭ 新疆大学 دە قاتار وقىعان ساباقتاسى بولام، اعاڭ ەرلان ءقازىر قايدا؟ ەگەر مۇمكىن بولسا erzhan.zekey@mail.ru عا قات جازىپ حابارلاسسىن. ال وزىڭە قويار سۇراعىم ءارى تىلەگىم اللا قالاسا كاسىپتىك بوكستان الەم چەمپيونى بولىپ ارمانىڭ ورىندالسا كەلەسى قادام قازاق جاستارىنا بوكستان جەكە مەكتەپ اشۋ بولار؟ ءارى سولاي ىستەسەڭ دەگەن ءوتىنىشىم بار!
- ءامين، ەرجان اعا. اعام ەرلان ءقازىر وسى جاقتا، ەلگە كەلىپ ەڭبەك ەتىپ، شاكىرت تاربيەلەپ جاتىر. ول كىسىنىڭ ءبىراز ۋاقىت بۇرىن وسى «قامشى» پورتالىندا سۇحباتى جاريالاندى. ماقسات ەتكەن جەڭىستەرگە جەتكەن سوڭ مەن دە قارا دومالاقتاردى شىنىقتىرۋعا دەن قوياتىن بولامىن.
- كوكشوقى: قانات قازاق! مەن سەنى وسىلاي اتاعىم كەلەدى. سەن قازاقسىڭ، قازاق سەن. سوندىقتان سەنىڭ اماناتىڭ اۋىر. تەك جۇدىرىقتاسىپ قانا ەلدىڭ ازاماتى اتانۋ ازدىق ەتەدى. بۇكىل الاشتىڭ ازاتتىعىن، قازاقستاننىڭ ەرتەڭىن ويلا. مەن بىلەمىن. شەتەلدەن كەلگەن ءار قازاق ءوز الىنشە جۇمىس اتقارىپ جاتىر. ەندى جۇدىرىقتاي جۇمىلىپ، قازاقتىڭ باقىتتى بولاشاعىن جاراتۋعا قىزمەت ەتۋگە تيىسسىڭدەر. مەنىڭ سوزىمە كەلىسەسىڭ بە؟ اماناتتى ارقالاۋعا دايىنسىڭ با؟ ال قالىڭ قازاق سەنىڭ ارقاسۇيەرىڭ. ساسپا!
- سەنىمىڭىزگە، قۇرمەتىڭىزگە راحمەت! ءبارى دە الداعى ۋاقىتتىڭ ەنشىسىندە. اللا قالاسا ەل ءۇشىن قولىمىزدان كەلگەنىن ايانىپ قالمايمىز.
الاڭ: تاۋەلسىزدىك ەڭ ۇلى قۇندىلىعىمىز دەسەك تە،وسى 23 جىلدا قازاق سيىردىڭ بۇيرەگىندەي قىرىققا ءبولىندى. تازا قازاق، شالا قازاق، ورالمان قازاق، جەرگىلىكتى قازاق، سالاف قازاق، سوفى قازاق…. قويشى، قولىنا تۇسسە ءبىر-بىرىن ايايىن دەپ وتىرعان جوق. ءوزىڭ قانداي پىكىردەسىڭ؟ قاشان، قالاي ءبىر اۋىزدى، ءبىر تىلەكتى بولامىز. ەلىمىزدەگى ءدىني احۋالعا كوزقاراسىڭدى بىلگىم كەلەدى. الدا-جالدا الاشتىڭ ءوزى ءدىني الاۋىزدىققا ۇرىنسا، قاي ۇستانىمدا بولاسىڭ؟
- ءبىز مەملەكەتى بار ۇلتپىز جانە وسى مەملەكەتتى ۇرپاققا امان جەتكىزۋ – كەز كەلگەنىمىزدىڭ موينىمىزداعى پارىز. مەملەكەت ءبارىمىزدىڭ ءۇيىمىز، الاۋىزدىققا ۇرىنىپ، ءوز ۇيىنەن دالاعا جۇگىرگەن ادامعا نە دەۋگە بولادى؟! ۋاقىتتىڭ سىنىنان ءوتىپ، تەك بىرلىكتىڭ عانا قازاقتى «ۇشپاققا» شىعاراتىنىن شىن تۇسىنەتىن كەز كەلەدى دەپ ويلايمىن.
ورىس: وزگە سالاداعى “قانات يسلامداردى” اتاي الاسىڭ با؟ الدە شەتەلدەن كەلگەن قازاق تەك سپورتتا عانا ءوزىن دالەلدەدى مە؟
- شەتەلدەن كەلگەن باۋىرلارىمىزدىڭ اراسىندا ءوز سالاسىنىڭ مايتالمان ماماندارى از ەمەس، ونى سانامالاپ جاتۋدىڭ قاجەتى دە جوق. ولار ءالى دە ەلىنە ەڭبەك ەتەدى، ءالى دە شەتەلدە جۇرگەن مىقتى قازاقتار ەلگە كەلەدى.
ابىلاي: ەلدىڭ ءۇمىت ارتقان ازاماتى رەتىندە قازىرگى قازاقستاننىڭ ەڭ ۇلكەن ءۇش ارتىقشىلىعى مەن ءۇش كەمشىلىگىن اتاپ بەرشى…
- قازاق ەلىنىڭ وزگەلەردەن وزىق تۇستارىن ۇشەۋمەن شەكتەۋ قيانات بولار. ال مەنى ەڭ الاڭداتاتىنى جوعارىدا ايتقانداي قازاقتىڭ اۋىز بىرشىلىگى مەن انا ءتىلىنىڭ بۇگىنگى جايى. سوندىقتان، كەز كەلگەن قازاق ازاماتى «مەنىكى عانا دۇرىس» دەگەندى قويۋ كەرەك. ال ءوز ەلىندە، ءوز وتانىندا ءجۇرىپ وزگە تىلگە ەرىك بەرگەن، انا ءتىلىن اياققا تاپتاعان ازاماتتاردى تۇسىنبەيمىن. ءتىل – ءاربىرىمىزدىڭ ابىرويمىز، بەدەلىمىز جانە ۇرپاعىمىزدىڭ بولاشاعى. ءتىلىمىزدى سىيلاتا الماي وتىرىپ، ءوزىمدى سىيلا دەۋ – بەكەرشىلىك.
ەرتۋعان: ءبىزدىڭ قازاقتىڭ عانا سپورتشىلارى، ونەرپازدارى ساياساتقا ساراڭ كەلە مە؟ الدە اش پالەدەن قاش پالە دەپ جۇرە بەرە مە؟ نەگە ەل نامىسى تارازىعا تۇسكەن ساتتەردە ءبىر اۋىز “مىڭق” ەتۋگە جارامايدى؟ پۋتين مەملەكەتىڭ جوق دەدى، جيرينوۆسكيي قازاقستاندى باسىپ الۋ كەرەك دەدى… ويىنا كەلگەن وتتاپ جاتىر. وسىلارعا جاۋاپتى تەك جۋرناليستەر عانا بەرۋ كەرەك پە؟
- مەن ازامات رەتىندە ەل نامىسىن كوتەرۋگە قاشان دا دايىنمىن. ال سپورتشى رەتىندە ايتار بولسام، مەنى ءالى الەم تانىعان جوق. بىردەڭە ايتۋ ءۇشىن ءسوزىڭنىڭ دالاعا كەتپەگەنى، سوزىڭمەن تىڭداعان جۇرت ساناساتىن بولۋى كەرەك. بۇل تۇرعىدان مەنىڭ ساياساتقا ارالاسۋىم ازىرگە ەرتە. ءبىراق تاريحتىڭ تارازىسى، ءوسىپ كەلە جاتقان ۇرپاق – مەملەكەتتىلىگىمىز تۋرالى ايتىلعان ءاربىر سوزگە جاۋاپ الاتىن بولادى.
ءاليجان: كەلەسى كەزدەسۋىڭىز 13 قازاندا بولادى دەپ ەستىدىك، كىممەن جۇدىرىقتاساتىنىڭىز شەشىلدى مە؟ جەڭىستەرىڭىزدىڭ ەكونوميكالىق پايداسى قانشالىق؟
- مەنىڭ كەزدەسۋىم 30 قازانعا جوسپارلانعانى تۋرالى جوعارىدا ايتتىم، مەنىمەن كولۋمبيالىق جانە امەريكالىق ەكى بوكسشىنىڭ بىرەۋى كەزدەسۋى مۇمكىن. الايدا كىممەن جۇدىرىقتاساتىنىمدى مەن شەشپەيمىن. مەن ب ا ق سىناپ جۇرگەن WBA تۇجىرىمى بوكسشىلاردى وزدەرى سارالايدى. ولار ارينە ۇپايلارى، جەڭىستەرى جاعىنان دەڭگەيلەس بوكسشىلاردى باسەكەلەستىرەدى. ازىرگە جەڭىستەرىمنىڭ ەكونوميكالىق كىرىسى بولعان جوق.
مۇحتار: اسسالاۋماعالەيكۇم قانات مىرزا، ءسىزدىڭ قانجىعاڭىز ءار مايلانعان سايىن ءبىز دە قۋانىشقا كومىلىپ جاتامىز، قۋانىپ قانا قويماي اللادان اماندىعىڭدى تىلەپ جۇرەمىز، ءيلايىم ەشقاشان مىسىڭ قۇرىماسىن! سۇراعىم اراعا بىرنەشە جىلدار سالىپ، اماندىق بولىپ وسى بوكستىڭ بار بەلەسىن باعىندىرساڭ ەلگە كەلىپ، ەل تىزگىنىنىڭ ءبىر شەتىنەن ۇستاۋ تۋرالى ويلادىڭ با، مەن سەنى ۋكراينانىڭ ۆيتاليي كليچكوسى سياقتى كورەمىن، سەن سياقتى جىگىتتەر قاشان دا ەلگە كەرەك، سەبەبى ەلدى اقىلدى، اقشالىلار عانا ەمەس ايبارلىلار دا باسقارۋ كەرەك! بۇلاي دەپ موينىڭا كوپ جۇك ارتسام ايىپ ەتپە، الايدا سەن ءالى دە قازاقتىڭ بيىگىندە جارقىرايتىن جۇلدىزى بول!
- ىستىق ىقىلاسىڭىزعا ۇلكەن راحمەت! شىندىعىن ايتقاندا ءبارىمىزدىڭ ىستەپ جۇرگەن جۇمىسىمىزدىڭ تۇپكى ماقساتى - ەلگە ءبىر سەپتىگى تيسە ەكەن دەگەن تالپىنىس. ەرتەڭ بۇل جەردە ءسىز بەن مەنىڭ ۇرپاقتارىمىز، ۇرپاعىمىزدىڭ ۇرپاقتارى الاڭسىز ءومىر ءسۇرۋى كەرەك، ول ءۇشىن ءبىز ولارعا بىردەڭە قالدىرا الۋىمىز قاجەت. بۇل تۇرعىدان مەن دە قولىمنان كەلگەنىن ايانىپ قالمايتىن بولامىن. نەگە ءبىز ورىسقا جالتاق بولۋىمىز، بولماسا باسقا بىرەۋ كەلىپ نەگە بىزگە ۇستەمدىك كورسەتۋ كەرەك؟ وسى سەبەپتەن دە ءبارىمىز باسقالاردى بىزبەن ساناسۋعا ءماجبۇر ەتۋگە ءتيىسپىز، ول ءۇشىن ءالى كوپ تەر توگىلۋى كەرەك. ءاربىر ازامات ءوزى ىسىندە «شىڭعا» شىعىپ، مىقتى قازاق ەكەنىن دالەلدەي السا ءبىراز ماسەلەلەر وزدىگىنەن شەشىلەتىن بولادى.
اقىلباي: اقش جەرىندە جۇرگەندە جادىڭا نە ءتۇيدىڭ قانات، نە ۇيرەندىڭ جات جەردەن، قىتايدا بولدىڭ، اقش-تا بولدىڭ، قازاقستاننىڭ ولاردان ەڭ باستى قابىلداۋ كەرەك تاجىريبەسى نە بولۋى مۇمكىن، قازاقستاندى ايتىپ ماقاتانايىن دەسەڭ ماقتاناتىن ەشتەڭە تاپپاي قالىپ قىسىلاتىن كەزدەرىڭ بولا ما؟
- قىتايدى الىپ قارايتىن بولساق، ولار دامۋىنىڭ العاشقى قادامدارىندا ىنتىماقتى، تىنىشتىقتى ۇران قىلىپ جىبەردى. سونىڭ ارقاسىندا ون جىلدىڭ ىشىندە الەم ساناساتىنداي تاۋار ءوندىرۋشى دەرجاۆا بولدى. ءسويتىپ تىنىشتىقتىڭ، ءوزارا ىنتىماقتىڭ جەمىسىن كوردى. ال، امەريكاعا قىزىعاتىنىم - ونداعى ادامدار وزدەرى جاساپ جاتقان مەملەكەتتىڭ زاڭىن قاتتى قۇرمەتتەيدى، قاتال باعىنادى. بۇعان ارينە امەريكا ءوزىنىڭ مەملەكەت بولىپ قۇرىلۋ جولىنداعى بىرنەشە عاسىردا ارەڭ قول جەتكىزدى. ال بۇنداي مەملەكەتتەردە ءوزىڭنىڭ جاڭادان عانا قابىرعاسى بەكىپ كەلە جاتقان مەملەكەتىڭمەن ماقتانۋ قيىنداۋ. ەڭ باستىسى - ەلىمىزدىڭ ىرگەسىن شايقالتىپ الماۋىمىز كەرەك.
نازگۇل: قانات اعا جارايسىز! بۇل جاقتاعى باقتيار ارتايەۆ، ارداق نازاروۆتار سىزگە حابارلاسىپ ءقالىڭىزدى ءبىلىپ تۇرا ما؟
- ءيا، امان-ساۋلىعىمىزدى ءبىلىپ، جاعداي سۇراسىپ تۇرامىز.
جۋلدىز: ماياميدە دايىندىق قاي تىلدە بولادى سىزدەردە، اعىلشىنىڭىز قالاي، جەتىلىپ قالدى ما؟ بالالارىڭىز ەرجەتىپ كەلەدى، ول جاقتا قازاق از، ولاردىڭ تاربيەسىن قايتىپ جاتسىز، تىلدەرى قازاقشا شىعىپ جاتىر ما؟
- دايىندىق اعىلشىن تىلىندە جۇرىلەدى. سوندىقتان ءوز سالاما، كۇندەلىكتى تۇرمىسقا قاجەتتى سوزدەردى يگەردىم. «اعىلشىنشام» كۇننەن كۇنگە جاقسى بولىپ كەلەدى. ال بالالارىم قازاق تىلىندە سويلەيدى، قازاقشا ويلايدى. ويتكەنى ءبىز وتباسىمىزدا تەك قازاق ءتىلىن عانا قولدانامىز. ونىڭ ۇستىنە جاستارى ءالى كىشكەنە، مەكتەپكە بارا قويعان جوق.
بەرىكبول: http://qamshy.kz/؟p=63 مىنا سىلتەمەدە وسى سايتپەن العاشقى ينتەرنەت-كونفەرەنسيادا بولعانىڭىزدا: – ەگەر، لوندون وليمپياداسىنا بارسام قىتايداعى ءبىراز لاۋازىمدى ورنىنان كەتەر ەدى دەپسىز. جالپى قىتايعا بارىپ تۇراسىز با، ول جاقتا بىرگە دايىندالعان، بىرگە جۇرگەن ۇلتى قازاق ەمەس دوستارىڭىز بارما؟
- ارينە، ايتادى عوي، «ۇلتتىڭ جامانى جوق، ادامنىڭ جامانى بار» دەپ. قۇدايعا شۇكىر ەكى ەلدىڭ ىنتىماعى جاقسارىپ كەلەدى. جۇڭگو بولسىن، ۇيعىر بولسىن جاقسى دوستارىم بار، حابارلاسىپ، ءحالىمدى ءبىلىم تۇرادى. سپورتتا بىرگە بولعان بارلىعىمەن دوس رەتىندە، ادام رەتىندە جاقسى سىيلاسىپ تۇرامىز.
شوقپار: ريو-دە-جانەيرودا 2016 جىلى بولاتىن جازعى وليمپيادا ويىندارىنا قاتىساسىز با اعا، قازاقستان اتىنان شىعاتىن شىعارسىز ءيا؟!
- قاتىسپايمىن.
ورالبەك الماس: الاش اسپانىنان ۇشىپ، مۇحيتتىڭ ارعى جاعىندا جۇدىرىق ءتۇيىستىرىپ جۇرگەن باۋىرىمىز ءۇشىن بارلىق قازاق ماقتانۋ كەرەك. جارايسىڭ قانداس، تەك قانا العا!!!!!!
- راحمەت، الماس.
اۋىت مۇقيبەك: قانات يسلامعا
قانات ءىنىم قاي قۇرلىقتا ءجۇر ەكەن،
الاش جۇرتى، وعان جەڭىس تىلە سەن!
كەسەڭ ەگەر تولىپ تۇنىق باقىتقا،
دەسەڭ ەگەر شىن جارىسقا ىلەسەم!
ۋاقىت ءوزى ارناسىمەن دوڭگەلەر،
شىن باتىرعا اسقار شىڭ دا جول بەرەر.
سەن ەمەس پە ەڭ، اناۋ الىس قيىردان،
قازاقستان، قايداسىڭ دەپ كەلگەن ەر!
شىن باتىرسىن، وسپاندايىن باتىرسىن،
بەس قۇرلىققا جەتتى سەنىڭ اتىڭ شىن.
قازاق تۋىن جەلبىرەتىپ بيىكتە،
كەزدەسكەندى قىرىپ كەلە جاتىرسىڭ!
ومىرىڭە قويعان جانسىڭ بەلگى ساپ،
سەن وتىرعان سانايمىن مەن ءتوردى تاق!
ءبىر قىسۋعا جارامادى سەنى كەپ،
يليانى قۇشاقتاعان كەڭ قۇشاق!
ەمەس ەدىڭ سەن، ارينە، بوتەنىم،
جەتپەگەنىن كەشەسىڭ بە جەتەنىڭ؟!
ءبىر سۇيۋگە جارامادى سەنى كەپ،
مانەزانى سۇيگەن اناۋ وت ەرىن!
سەنى الىپ ءور التايدان شىققان جول،
ارى اسىردى قالاسىنان ىستامبۇل.
ءبىر قىسۋعا جارامادى قولىڭدى،
شىن شان لونىڭ قولىن كەلىپ قىسقان قول!..
ساعان باقىت تىلەگەنمەن قۇربىڭ ءار،
شەتتەگى ەلىڭ – شىنىمەنەن مۇڭلىلار.
تۋعان وتان تۇعىرىنا تارتپاسا،
بۇل قورلىققا سەن جىلاماي، كىم جىلار!
بۇل سۇمدىققا قالاي عانا شىدايسىڭ،
بولىپ قالدى قازاقستان ءتۇبى ايقىن.
ەستىدىڭ بە، كەلە جاتىر كۇن تۋىپ،
بەس ميلليون قازاق تۇگەل جىلايتىن!
سوقپاق تا جوق، ءبىز جۇرەتىن جول تۇرماق،
دەپۋتاتىڭ شەتتەرىنەن سولقىلداق.
نيەتتە ەكەن قازاقستان كوز جاسپەن،
قۇرعاپ قالعان ارال سۋىن تولتىرماق!!! - استانا. 2013
- ىقىلاسىڭىزعا راحمەت، اعا!
جانىاشىر دەمەۋ: ۇستامدىلىق پەن ساتتىلىك! گولوۆكينمەن بىرگە جاتتىعۋ جوسپاردا بار ما؟ قازاقستاندى قانشالىقتى بىلەدى ەكەن ول جاقتا؟ قازاق ءتىلى كەڭ كولەمدە ءوتىمدى، كەرەكتى بولۋ ءۇشىن نە قاجەت، ءوز تالداۋىڭ؟
- ارينە. بوكستا مىقتى بولۋىڭ ءۇشىن سونداي مىقتىلارمەن بىرگە جاتتىعۋىڭ كەرەك. الداعى ۋاقىتتا بىرگە شىنىعۋ ويدا بار. ال، امەريكانىڭ جۇرتى قازاقستاندى كەرەمەت بىلەدى ەكەن دەپ وتىرىك ايتا المايمىن. ولار كوبىنەسە تەك الپاۋىت ەلدەردى عانا تانيدى. قازاق تىلىنە كەلسەك، ەڭ باستىسى، ءوزىڭ ءوز تىلىڭدە سويلە، سوسىن وزگە ۇلتتان تالاپ ەت.
ىقىلاس-قوجا: اسسالامۋ الەيكۋم قانات اعا! قوش كەلدىڭىز. ءسىز ناعىز قازاق دەپ باس بارماقپەن ماقتانا كورسەتەتىن ازاماتسىز. اسىرا ماقتاعاندىق ەمەس، ونى ءسىز ىسىڭىزبەن دە، سوزىڭىزبەن دە دالەلدەپ ءجۇرسىز. اللانىڭ بەرگەن كۇش قۋاتىمەن جەڭگەن ءار جەڭىسىڭىزگە شۇكىر ەتىپ قۋانامىن. جاراتۋشى يەمىز باسىڭىزعا حيدايات، جۇرەگىڭىزگە تەرەڭ يمان، بىلەگىڭىزگە كۇش-قۋات بەرسىن! اللا تاعالا سىزگە وتباسىڭىزعا ەكى دۇنيەنىڭ باقىتىن بەرسىن! امين!
- ءامين، اللا رازى بولسىن!
قولقويۋسىز: سەنىڭ بولاتىن جەكپە-جەكتەرىڭدى نەگە الدىن الا حابارلامايسىڭ؟ ەگەر الدىن الا قاشان جانە قايدا بولاتىنىن بىلسەك مۇمكىن ينتەرنەتتەن ىزدەپ كورەر ەدىك. ۆيدەولارىڭدى دا شىعارىپ تۇرۋ كەرەك. كوماندان جانە نەلسون لوپەس قاشان وسىلاردى قولعا الادى؟
- بارلىعىن ەندى قولعا الىپ جاتىرمىز. وسى جولعى ەلگە كەلۋدەگى باستى ماقساتىم دا سول. اللا قالاس، الداعى كۇندە ءاربىر سايىسىمدى كورە الاتىن بولاسىزدار.
ە.تولەۋباي: اسسالاۋماعالايكۇم! بۇل جولى قانشا ۋاقىتقا دەمالىسقا كەلدىڭ؟ كەلىسىم-شارت جايلى نە دەيسىڭ، 2 جىلدىق كەلىسىمنىڭ ۋاقىتى اياقتالدى ما؟ كەلەسى جەكپە-جەكتەر كىمدەرمەن ، قاشان؟ قانشاۋى بەلگىلى ازىرگە؟
- «2 جىل» دەپ كەسىپ ايتارلىق كەلىسىم جوق. باسقا سۇراقتارىڭىزعا جوعارىدا جاۋاپ بەرىلدى.
سەندەپ: قانات يسلام الدىمەنەن قازىرگە دەيىن جەتكەن جەتىستىكتەرىڭە قۇتتى بولسىن ايتامىن،وزىڭە قويار ساۋالىم: ءوزىڭنىڭ كوتەرگەن جەكپە-جەكتەرىڭدى ۋاقىتى وتكەننەن كەيىن عالامتوردان ءبىلىپ جاتامىز，كەيدە تاعاتىمىز تاۋسىلىپ «Nelsons» پروموۋتەرلىك كومپانياسىمەن حابارلاسىر ءمان-جايدى ءبىلىپ جاتامىز，boxrec.com سايتىنا دا ارتىنان تىركەلىپ جاتادى，«Nelsons» پروموۋتەرلىك كومپانياسىنىڭ سايتىنىڭ جاڭالانۋى دا وتە باياۋ，ءقازىر سايت جابىلىپ قالىپتى， قۋانارلىعى قازاقستاندا ەكى ازامات ءوزىڭنىڭ جەكەلىك سايتىڭدى اشقالى جاتىپتى，مەنىڭ بىلگىم كەلگەنى جەكپە-جەكتىڭ الدى-ارتىنداعى اقپاراتتىق ۇگىت جۇمىستا كىم جاۋاپتى؟
- اقپاراتتىق ۇگىت جۇمىستارىنا پروموۋتەرلىك كومپانيا جاۋاپتى، جۇمىستىڭ ساپسىنا دا سولار جاۋاپ بەرەدى.
ءشاديار: تۋعان كۇنىڭىزبەن اعا، ءسىزدىڭ ءۇش بالانىڭ اكەسى دەيدى، بالالارىڭىز تۋرالى ايتىڭىزشى، سىزگە تارتقانى بار ما؟ ەرتەڭ بوكسەر بولام دەي مە ولار؟
- ولار ءالى كىشكەنە عوي، مەن ءۇشىن باستىسى قازاق بولىپ، يماندى بولىپ ەرجەتكەنى كەرەك. ومىردەگى تاڭداۋلارىن وزدەرى جاسايتىن بولادى.
سەندەپ: قانات ءوزىڭنىڭ جەكپە-جەكتەرىڭدى قاشان HBO ، Showtime قاتارلى تەلە ارنالاردان كورە الامىز，چەمپيوندىق بەلدىككە اللا قالاسا نەشە كەزدەسۋدەن كەيىن ， قانشا ۋاقىتتا تالاسۋىڭ مۇمكىن. قازاقتىڭ كوك بايراعىن اۋەلەتىپ،ەلىڭدى الەمگە تانىتا بەر. ءار قاشان ءسۇيىنشىلى حابارىڭدى قازاق حالقىنا جەتكىزىپ كەلدىم，الەم چەمپيونى بولۋىڭا تىلەكتەسپىن.
- تىلەگىڭىزگە راحمەت!
سەندەپ: 1. استانا پرەزيدەنتتىك سپورت كلۋبىمەن كەلىسىم-شارت قالاي بولىپ جاتىر， الدا ولاردان قارجىلاي قولداۋ بولاما؟ 2.باسقا تۇجىرىمدا，باسقا سالماقتا ب ا ق سىناۋ جوسپاردا بار ما؟
- مەندە سونى كۇتىپ وتىرمىن، ءالى شەشىلگەن جوق. باسقا تۇجىرىمدا ب ا ق سىناۋ تۋرالى جوعارىدا ايتتىم. ارينە الداعى جوسپارلاردا بار.
سۇلتان جانبولاتوۆ: وزىڭە الگى سۇيەكتەن ءمۇسىن جاساعان جىگتپەن بىرگە بولاعننان سوڭ كەزىگە المادىم. ءبىراق بىرگە جۇرگەندەي-اقپىن. ساعان عانا ەمەس، ينتەرنەتكە دە راحمەت! (مەنىڭ بلوگىمدا http://ramazanuli.blogcn.com/ دا بارسىڭ).18 جەڭىسىڭە 18 رەت قۋاندىم دەسەم از ايتقان بولارمىن. جالعىز-اق ءۇمىتىم مەن تىلەگىم بار. ول – دەنساۋلىعىڭا اسا مۇقيات تا قۇنتتى بول! دارىگەرلەر اقىلىن قۇلاعىڭنان تۇسىرمە! ءسويتىپ ءجۇرسىڭ بە؟ اللا جار ساعان! ۇلتجاندىلىق – كەرەمەت رۋح!
- الاڭ كوڭىلىڭىزگە، اق تىلەگىڭىزگە ۇلكەن راحمەت، اعا! مىندەتتى تۇردە كەڭەسىڭىزگە قۇلاق اسامىن. سىزگە دە اللا كۇش قۋات بەرسىن! عۇمىرىڭىز ۇزاق بولسىن!
قۋاتجان: اعا ءسىز ەكى جىلدان بەرى شەتەلدەسىز، ۆيزا ماسەلەسىن قالاي شەشىپ جاتىرسىزدار؟
- ءبارى دە زاڭدى تۇردە شەشىلىپ جاتىر.
نۇرعالي نۇرتاي: اسسالاۋماعالەيكۇم قانات اعا! اقش-تا تۇرعىلىقتى قازاقتار بارىن ەستيتىن ەدىك، ول جاقتاعى قازاقتار سىزگە سالەمدەسىپ كەلىپ تۇرا ما؟ نەمەسە ءوزىڭىز ىزدەپ بارىپ ارالاس-قۇرالاستىق جاسايسىز با؟ قازاقستاننىڭ ول جاقتاعى ەلشىلىگىنەن سىزگە قولداۋ-كومەكتەر بار ما؟
- ارينە، ول جاقتاعى بولسىن، وندا جولى تۇسكەن قازاقتار بولسىن سالەمدەسىپ، ىقلاستارىن ءبىلدىرىپ تۇرادى. «جارىستارىڭا شاقىر، كورەيىك، قولداۋ بىلدىرەيىك» دەپ جاتادى. ەلشىلىكپەن دە حابارلاسىپ تۇرامىز. قىزىم تۋىلعان كەزدە قۇجات جونىنەن كەڭەس سۇراپ تەلەفون شالدىم.
– اللو، اسسالاۋماعالەيكۇم، - دەسەم،
- ۋاعالايكۇماسسالام، - دەيدى قوڭىراۋ كوتەرگەن ەلشىلىك قىزمەتكەرى. ونداي ءسوزدى امەريكادا تۇرىپ ەستىگەندە قاتتى تولقىدىم.
كەرەمەت قوي، مۇحيتتىڭ ار جاعىنداعى الىپ ەلدە سەنىڭ مەملەكەتىڭنىڭ ەلشىلىگى بار. ساعان يە بولاتىن وتانىڭ بار.
– قازاقشا سويلەسۋگە بولاما؟ – دەسەم،
- ايتا بەر، باۋىرىم! – دەيدى. ماعان ودان ارتىق نە كومەك كەرەك بولسىن؟! بۇل مەنىڭ ەسىمدە قالعان امەريكاداعى ەڭ اسەرلى جاعداي.
زارينا: سالەمەتسىز بە اعا! قازاقتا باتىر تۋسا ەل ىرىسى دەيدى، ءسىز بۇگىندە ەلدىڭ نامىسىن كوتەرىپ جۇرگەن باتىرسىز. ءبىزدىڭ ۇلتتا قاي-قاشاندا دا باتىردىڭ بىرنەشە ايەلى بولعان، سىزدە جەڭگەمىزدىڭ ۇستىنەن ايەل الۋ تۋرالى ويلار بار ما؟ جەڭگەمىزدىڭ وعان دەگەن پىكىرى قالاي؟ جالپى، كوپ ايەل الۋ دەگەنگە قالاي قارايسىز، قازاقتىڭ كوبەيگەنى جاقسى عوي!
- قازاق قىزدارىنىڭ باسقا ۇلت وكىلىمەن كەتىپ بارا جاتقانىن كورسەم، قاتتى قىزعانامىن. اكەتىپ بارا جاتقاندى ەمەس، ىلەسىپ بارا جاتقان قارىنداسىمدى ايايمىن. نامىستانامىن. جۇدىرىقپەن شەشىلە سالاتىن بولسا عوي... ال، ەكىنشى ايەل ماسەلەسىن ويلايتىن ءبىر مينۋت ارتىق ۋاقىت جوق. مۇمكىندىك بولىپ جاتسا نەگە تاعى ءبىر ارۋدىڭ جارى بولماسقا؟! يسلام ءدىنىنىڭ قاعيدالارىنا ساي، مۇمكىندىگى جەتىپ تۇرىپ، ەكىنشى ايەل العانداردى ايەلقۇمارلىقتان ەمەس، ۇلتتىن ەرتەڭىن ويلاعان، قازاق قىزدارىنىڭ جات قولىندا كەتۋىنە جول بەرمەگەن دەپ تۇسىنەتىن ۋاقىت جەتتى. كوپ ايەل ماسەلەسىن بىلاي قويعاندا، جاسى ءبىرازعا بارىپ قالعانشا بويداق جۇرە بەرەتىن جاستار دا «مەن ۇلتىما نە بەرىپ جاتىرمىن؟» دەپ ويلانۋى كەرەك.
بايان: وسى سايتتا جاريالانعان اعاڭىزدىڭ سۇحباتىن وقىعانبىز، وندا ءسىزدى اللا بۇيىرتسا الەم چەمپيونى بولادى دەپ ۇلكەن ءۇمىت ارتىپ وتىر، ءبىز ءسىزدىڭ الەم چەمپيونى بولاتىنىڭىزعا سەنەمىز، سۇراعىم بوكسشى ءۇشىن الەم چەمپيونىنان دا بيىك اتاق بار ما؟ ياعني ءسىز الەم چەمپيونى بولعان سوڭ قانداي اتاق ءۇشىن تەر توگەسىز؟
- دايىندالىپ، ماقسات قويا بىلسە ءار قانداي ادام چەمپيون بولا الادى. ياعني ءومىرىمنىڭ ءمانى، جالعاسى «چەمپيون» بولۋمەن شەكتەلىپ قالمايدى. باستىسى اللانىڭ ق ۇلى، الاشتىڭ ۇلى دەيتىن اتقا لايىق بولۋ.
Ars: قاناتتىڭ جەكە كەزدەسۋلەرى توپتالعان كەسكىن جيناقتارىن كوپتەپ باسىپ تاراتۋ كەرەك قازاق جاستارىنا.
- جاقسى ۇسىنىس. راحمەت، پەيىلىڭە!
جومارت-قاسىم: قازاقستان ازاماتى بولعانىڭىز سەبەپتى قانداي دا ءبىر نارسەگە قولىڭىز جەتپەي قالعان كەزدەر، نەمەسە ءبىر جارىسقا قاتىسا الماي قالعان ۋاقىتىڭىز بولدى ما؟ الداعى ۋاقىتتا قازاقستاننان باسقا ەلدىڭ ازاماتى بولۋىڭىز مۇمكىن بە؟
- باسقا ەل ازاماتى اتانۋدان قۇداي ساقتاسىن. وتانعا كەلۋ، وتاندا ءولۋ – ءاربىر قازاقتىڭ ارمانى دەپ ويلايمىن. ماعان قازاقستان ازاماتى بولعانىم ءۇشىن ەشقاشان كەدەرگىلەر بولىپ كورگەن جوق.
نازار: ءسىز كەلگەلى بىرنەشە كۇن بولسا دا ءالى مەملەكەتتىك تەلەارنالار ءسىزدى ەكراننان كورسەتپەدى، ادەتتە بىرەۋ شەتەلگە بارىپ ءجاي عانا جارىسقا قاتىسىپ كەلسە دە گۇل بەرىپ قارسى الىپ جاتادى، سىزگە دەگەن ۇلكەن اقپاراتتىق قولداۋ بايقاي قويمادىم، بۇل تۇرعىدان وكپەڭىز بار ما؟
- قۇدايعا شۇكىر، ۋاقىت ايىرماشىلىعىنان ءسال قاتەلەسكەنىمىز بولماسا، اەروپورتقا كۇتىپ الۋعا بارعان باۋىرلارىم، جۋرناليستەر قاۋىمىنا مىڭ العىس! ەلگە ەشقانداي وكپە جوق، قايتا اق پەيىلدەرىن كورسەتىپ جاتقاندارىنا راحمەت!
گۇلجاۋھار: قانات مىرزا سىزگە اللا قۋات بەرسىن! سوڭعى اپتالاردا ءسىز تۋرالى سايت اشىلعانىن ەستىگەن ەدىك، بۇل سايت جونىندە نە ايتاسىز؟ ءسىزدىڭ حابارىڭىز بار ما؟ بۇل سايت كەش اشىلعان جوق پا؟
- امەريكاداعى جاتتىقتىرۋشىممەن ارنايى كەلىسىم-شارت بار. سوندىقتان سايت تۋرالى دا الداعى ۋاقىتتا ناقتى كەلىسىمگە كەلەتىن بولامىز. ال سول جۇمىستى قولعا الىپ، جۇرگىزەيىك دەپ نيەت بىلدىرگەن جىگىتتەرگە كوپ راحمەت.
ءبىرجان: قانات باۋىرىم، ەلگە كەلگەنىڭە قۋانىپ قالدىق، ەلدەن نە وزگەرىس بايقادىڭ؟
- ەلدىڭ ەڭسەسى تىكتەلە تۇسكەن، بۇرىنعىداي ەمەس قازاقىلىق بايقالادى. كوشەدە بولسىن، اۋەجايدا بولسىن قازاق تىلىندە قىزمەت كورسەتۋ كوبەيگەنى قۋانتتى.
ەربول: قانات مىرزا، امەريكادا ءسىزدى باپتاۋعا جۇمىس جاسايتىن توپتا قانشا ادام قىزمەت ەتەدى، ولاردىڭ نەشەۋى قازاقتار(قازاقستاندىقتار)؟ جاتتىعۋ رەجيمىڭىز قالاي؟
- ول جەردە 2 جاتتىقتىرۋشىم، مەنەدجەرىم بار. كوماندام جاقسى جاساقتالعان. مەن ءۇشىن 4-5 ادام جۇمىس ىستەپ جاتىر. تاڭعى بەس پەن 7-8 دەر اراسىندا جاتتىعامىن. ودان كەيىن دەمالىس، تۇستەن كەيىن تاعى دا 3-4 ساعات جاتتىعۋ زالىندا بولامىن.
سايا: اعاجان، ءسىز قانداي تاعامداردى ءسۇيىپ جەيسىز؟ جەڭگەمىز استى ءدامدى ازىرلەي مە؟
- ءبىز ءۇشىن استىڭ تورەسى، ەڭ سۇيىكتىسى – قازاقشا ەت قوي. ال جەڭگەڭنىڭ «اسپازدىعىنا» كەلسەك، قازاق قىزدارى قاشان دا تەك ءدامدى تاعام ازىرلەيدى ەمەس پە؟!
مۇرات: عالامتور، الەۋمەتتىك جەلى دەگەندەردى پايدالاناسىز با؟ قانداي ۇلگىدەگى ۇيالى تەلەفوندى پايدالاناسىز؟
- دوستارىممەن حات-حابار الىسۋ ءۇشىن الەۋمەتتىك جەلىلەردى پايدالانىپ تۇرامىن.
ايدىن: بوكسقا كەلۋىنە جەكە ءوزىڭىز سەبەپ بولىپ، ءقازىر توپ جارىپ جۇرگەن شاكىرتتەرىڭىز بار ما؟
- تاپ ءوزىم تاربيەلەمەسەم دە ءىزىمدى باسىپ كەلە جاتقان جىگىتتەر جەتەرلىك. بىزدەر ۇشقان ورتادا وسى سالانىڭ جەڭىمپازى بولىپ، توپ جارىپ جۇرگەن جىگىتتەر تۇگەلدەي ءوزىمنىڭ ىنىلەرىم. ەرتەڭ مەنەن دە مىقتى تالاي جىگىت شىعاتىنىنا سەنەمىن.
جاقسىلىق: بايقايتىنىم، كۋبا ەلىنىڭ بوكسشىلارى الەمدە الدىڭعى قاتاردا، ولاردىڭ ونداي مىقتى بولۋىنىڭ سىرى نەدە بولۋى مۇمكىن؟
- كۋبا تۋرالى ايتاتىن بولساق، مەنىڭ جاتتىقتىرۋشىم ءوزى يسپان بولعانىمەن كۋبادا تۋىلعان. ولار ەڭبەكتەنە بىلەدى. ايتپەسە كۋبالىقتار دەنە جاعىنان بولسىن، گەندىك جاعىنان بولسىن قازاقتاردان ەشقانداي ارتىق ەمەس. چەمپيون بولا المايتىن بوكسشى جوق، چەمپيون تاربيەلەي المايتىن جاتتىقتىرۋشى كوپ. ءبارى دە جاتتىعۋ مەن جاتتىقتىرۋعا بايلانىستى.
اقكىسى جانكەرىم: امان-ساۋ ءجۇرسىز بە قانات اعا! دەنىڭىزگە ساۋلىق تىلەيمىن! قويايىن دەگەن سۇراعىم 2008 جىلعى بەيجىڭ وليمپياداسىندا ءسىزدى جەڭگەن بانتو سۋارەس كارلوسپەن قايتا ءبىر رەت بوكستاسىپ كوردىڭىز بە؟ كورمەگەن بولساڭىز ونىمەن تاعى ءبىر بوكستاسۋعا دايىنسىز با؟ جالپى ول بوكسشى قايدا ءجۇر ءقازىر؟ ونىڭ كارەراسى قانداي؟ نەندەي تابىستارعا جەتتى؟
- ول جىگىت باقىت سارسەكباۆتان تاياق جەگەن سوڭ حابارسىز كەتتى عوي :-)
مۇحامەد: نەدەن قورقاسىز؟
- اللادان.
تەمىرتاس: ءسىزدىڭ اللدان پارىز ەتىلگەن ناماز قۇلشىلىعىن وتەپ جۇرگەنىڭىزدى بىلەمىز، ماياميدە مەشىت بار ما؟ ءسىزدى جاتتىقتىرۋشىلار مۇسىلماندىعىڭىزعا قالاي قارايدى؟
- قۇدايعا شۇكىر، ول قالادا مەشىت بار. ءار جۇما سايىن بارامىن. ورازا ايتتى دا جاقسى قارسى الدىق. جاتتىقتىرۋشىلارىم ءدىني ۇستانىمىما قۇرمەتپەن قارايدى.
شايزات اسەنگاليۋلى: اسسالاۋماعالايكۇم قانات اعا !!!! ەلگە حوش كەلدىڭىز !!! دەنىڭىز ساۋ بولسىن، مەيلى قايدا جۇرسەڭىز دە امان ءجۇرىڭىز !!!! ءبىز ءسىزدى جاقسى كورەمىز، اللا قولداسىن ءسىزدى !!!
- ءامين!
ارىس: قاشاندا قاسىڭىزدان تابىلاتىن سەنىمدى دوستارىڭىز كىمدەر؟
- مەنىڭ جەڭىسىمە قۋانىپ، ءوز جەڭىسىندەي قابىلدايتىن ءار قازاق سەنىمدى دوسىم. قولداۋىن ايامايتىن دوستارىم جەتەرلىك، ولارعا اللا رازى بولسىن!
جالىن: وتكەندە قىتايداعى قازاقتاردىڭ قىتايلاردان تاياق جەگەنى تۋرالى ەستىگەن بولارسىز. بۇل تۋرالى نە ايتاسىز…
- قانى ءبىر قازاق رەتىندە جانىم اۋىرادى. ول اركىمنىڭ «ءۇيىنىڭ» جەكە شارۋاسى. كەلەم دەگەندەرگە قازاقستاننىڭ ەسىگى 23 جىلدان بەرى اشىق تۇردى. ءالى دە اشىق.
سۇراق: ورىستىڭ قۇلدىعىنان قاشان قۇتىلامىز دەپ ويلايسىز؟ اسىرەسە كوپ قانداسىمىزدىڭ ساناسىنا ءسىڭىپ قالعان “ورىسسىز كۇنىم قاراڭ” دەگەن قۇلدىق سانادان قانداستارىمىزدى قالاي ارىلتساق بولادى؟ ۇلتشىل ازامات رەتىندە وسى سۇراقتارعا ءسىزدىڭ پىكىرىڭىزدى بىلگىمىز كەلەدى.
- اباي اتامىز «ءبىرىڭدى قازاق ءبىرىڭ دوس، كورمەسەڭ ءىستىڭ ءبارى بوس» دەگەن. ءار قازاقتى جۇرەگىڭمەن دوسىم دەپ، ەت جاقىنىم دەپ قابىلدا. ميلليونداعان قازاق ۇرپاعى ءوسىپ كەلە جاتىر. كىمنىڭ قۇل، كىمنىڭ ۇل ەكەنىن سولار كورسەتەتىن بولادى.
«قامشى» پورتالى: قىمبات ۋاقىتىڭىزدى ءبولىپ، وقىرماندارىمىزبەن بۇكپەسىز سىرلاسقانىڭىزعا ۇلكەن العىس بىلدىرەمىز.
