اقىن اۋىت مۇقيبەك ءوزىنىڭ Facebook-تەگى پاراقشاسىندا تومەندەگىدەي جازبا جاريالادى:

«بۇگىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتى نۇرتاي سابيليانوۆ مىرزانىڭ قابىلداۋىندا بولدىم. وتكەندەگى كەزدەسەمىز دەسكەن ۋادەنىڭ ءساتى بۇگىن ارەڭ ءتۇستى.  نۇرتاي ساليحۇلىمەن دە قازىرگى كۇندە ۇكىمەتتىڭ اتىڭ وشكىر №111 قاۋلىسىنىڭ كەسىرىنەن تۇراقتى تىركەۋگە تۇرا الماي، تەنتىرەپ قالعان قانداستار جاعدايىنان باستاپ، الداعى تولىقتىرۋ مەن وزگەرىستەر ەنگىزىلىپ، قايتا قابىلداناتىن كوشى-قون زاڭى تۋرالى ءبىراز سويلەستىم. ادەتتەگىدەي، "ءتۇسىندىرۋ" جۇمىسىن ىستەدىم، اتاپ ايتقاندا، قىتايدىڭ كوشى-قون زاڭىن، جۇڭگو ازاماتتارىنىڭ شەتەلدەرگە شىعۋ ءتارتىبىن، ازاماتتىقتان شىعۋ بەلگىلەمەسىن قاعازعا جازىپ اپارىپ بەردىم. اتى شۋلى "ەكى انىقتامانى"("شەتەل ازاماتتىعىنان شىعىپ كەل"، "قىلمىسقا تارتىلماعان" دەگەن)، سول ەكى انىقتامانىڭ كەسىرىنەن شەتەل ەلشىلىكتەرىنەن كەلىسىم الاتىن (قىزىل "سپراۆكا") بارىستى قىسقارتۋعا ىقپال ەتۋىن ءوتىندىم.

شەكاراعا جاقىن اۋىلدىڭ بالاسى عوي، نۇرتاي ساليح ۇلى الىستان كەلگەن اعايىننىڭ جاعدايىن جاقسى تۇسىنەدى. ولاردىڭ ورالۋىنا قۇشاعى اشىق ساناۋلى دەپۋتاتتاردىڭ الدىڭعى لەگىندە جۇرگەن ازامات! كەيدە قولبايلاۋ بولىپ، ادىمىن اشتىرمايتىن جاعدايلاردىڭ دا بارىن ءبىز جاقسى بىلەمىز. ول ءۇشىن بۇل كىسىلەردى كىنالامايمىز دا...

قىسقاسى بۇل نۇرەكەڭ دە قانداستارىنا قولايلى، ەلباسىعا ءسوز كەلتىرمەيتىن كەمەلدى زاڭ جوباسىن قابىلداۋعا قۇلشىنىپ وتىر. ىسكە ءسات دەيىك، اعايىن!»

اۋىت مۇقيبەك ورالماندار ماسەلەسىن ءجيى-جيى كوتەرىپ كەلەدى. ونىڭ پرەزيدەنتكە، پرەزيدەنت اكىمشىلىگىنە،  ۇكىمەتكە، پارلامەنتكە باعىتتالعان حاتتارى تۋرالى بۇعان دەيىن دە جازعان بولاتىنبىز.  قانداستارىمىزدىڭ جانايقايىن بيلىككە جەتكىزىپ جۇرگەن  اقىننىڭ ىسىنە قولداۋ ءبىلدىرىپ، حالىققا قولايلى زاڭنىڭ قابىلدانۋىنا ءبىز دە  «ىسكە ءسات» ايتامىز. نۇرتاي سابيليانوۆ مىرزاعا  دەپۋتاتتار ۇلكەن قولداۋ بىلدىرەدى دەپ ءۇمىت ارتامىز.