«جاستار بولاشاقتى جىرلايدى» اتتى جاس اقىندار ايتىسى ءوتتى

    Zhazira Baidaly
    «جاستار بولاشاقتى جىرلايدى» اتتى جاس اقىندار ايتىسى ءوتتى

    قازمەدياورتالىعىنىڭ كينوكونسەرتتىك زالىندا «جاستار بولاشاقتى جىرلايدى» اتتى جاس اقىندار ايتىسى ءوتتى دەپ حابارلايدى قامشى اقپاراتتىق اگەنتتىگى «بولاشاق» قاۋىمداستىعىنىڭ باسپا ءسوز قىزمەتىنە سىلتەمە جاساي وتىرىپ.

    اقىندار بايقاۋى ەكى كەزەڭدە ءوتتى. ءبىرىنشى كەزەڭدە بايقاۋ كوميسسياسىنىڭ قاراۋىنا ەلىمىزدىڭ 14 وبلىسىنان 30 جاس، دارىندى اقىنداردان ءوتىنىش كەلىپ ءتۇستى. اقتىق مارەگە قازاقستاننىڭ ءار اۋماعىنان ەڭ ۇزدىك 10 اقىن قاتىستى. جۇمىس كۇنى بولعانىنا قاراماستان كونسەرت زالى ايتىس سۇيەر قاۋىمعا لىق تولدى. ايتىستى  بەلگىلى اقىن، «دارىن» جاستار سىيلىعىنىڭ لاۋرەاتى قالقامان سارين جۇرگىزدى. اقىنداردىڭ سۋىرىپ سالما ونەرىن، جۋرناليستيكا جانە ساياسات فاكۋلتەتىنىڭ دەكانى - قايرات ساق باستاعان بىلىكتى ءادىل قازىلار القاسى سىنادى. 

    «تاۋەلسىز قازاقستانمەن بىرگە قايتا تۇلەگەن ايتىس ونەرى قازىرگى تاڭدا وتە جاقسى جاعدايدا دەپ تولىق سەنىممەن ايتا الامىز. زاماناۋي ايتىس ءوزىنىڭ ادەبي قۇندىلىعىن ارتتىرماسا، كەمىگەن ەمەس. ايتىستىڭ بەدەلى دە كۇن ساناپ ارتۋدا. وسىعان وراي ەلىمىزدە دە جاس ءارى دارىندى ايتىسكەرلەردىڭ بار ەكەندىگى جانە ولاردىڭ كاسىبي شەبەرلىكتەرى كوڭىل قۋانتادى. ولاردىڭ جىرلارى ارقىلى ءبىز قوعامنىڭ وزەكتى ماسەلەلەرىنە كوڭىل اۋدارامىز»،- دەپ اتاپ ءوتتى - «بولاشاق» قاۋىمداستىعىنىڭ كەڭەس ءتوراعاسىنىڭ م.ا.، ق ر پارلامەنت ءماجىلىسىنىڭ دەپۋتاتى باقتيار ماكەن.

    جاس اقىندار بايگەسى تەرەڭ اقىلدان، سۇبەلى ويدان تۇراتىن مىقتى قارسىلاستاردىڭ سايىسى بولدى. سۋىرىپ سالما قاسيەتتەرى مەن ادىلدىگى، شىنشىلدىقتارى ۇشىندە ولار جينالعانداردىڭ قوشەمەتىنە بولەنىپ وتىردى.

    ايتىستىڭ ەڭ ۇزدىگى بولىپ نۇرجان ومىربايەۆ (سەمەي) تانىلدى. وعان 300 مىڭ تەڭگە تابىستالدى. ەكىنشى ورىندى مۇحامەتجان مانسۇروۆ (قىزىلوردا) يەلەنىپ 200 مىڭ تەڭگە السا، ءۇشىنشى ورىنعا ءناريا اقبابا قىزى (قوستاناي) لايىقتى سانالىپ، 150 مىڭ تەڭگەنىڭ چەگىنە يە بولدى. ەكىنشى كەزەڭنىڭ بارلىق قاتىسۋشىلارىنا ديپلومدار تابىستالدى.

    ەستەرىڭىزگە سالا كەتەيىك، «جاستار بولاشاقتى جىرلايدى» جاس اقىندار بايگەسىن «بولاشاق» قاۋىمداستىعى استانا قالاسى اكىمدىگىنىڭ جاستار ءىسى بويىنشا باسقارماسىنىڭ مەملەكەتتىك الەۋمەتتىك تاپسىرىسى بويىنشا ۇيىمداستىردى. 

     

    قاتىستى ماقالالار

    ءبارىمىز قازاقپىز عوي!

    ءبارىمىز قازاقپىز عوي!

    12:57، 06 ناۋرىز 2025