مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىندە مەملەكەتتىك قىزمەتشىلەر الەۋمەتتىك جەلىدەگى جاريالانىمدارى تەكسەرىلەتىنىن مالىمدەدى. بۇل تۋرالى قامشى اقپاراتتىق اگەنتتىگى قازاقپاراتقا سىلتەپ حابارلايدى.
"ەتيكا كودەكسىندە مەملەكەتتىك قىزمەتشىلەر قوعامنىڭ سىنىن تۋعىزۋعا جول بەرمەۋى شارت دەلىنگەن. ءبىزدىڭ كوزقاراسىمىز بويىنشا، مەملەكەتتىك قىزمەتشىلەردىڭ الەۋمەتتىك جەلىلەرىندە مەملەكەتتىك قىزمەتتىڭ بەدەلىنە نۇقسان كەلتىرەتىن فوتو، بەينەماتەريالداردىڭ جاريالانۋى ءبىزدىڭ ىسكە كىرىسۋىمىزگە جانە ول جاريالانىمدى وشىرۋگە نەمەسە كوپشىلىك نازارىنان الىپ تاستاۋىن سۇراۋىمىزعا نەگىز بولا الادى"، - دەدى مەملەكەتتىك قىزمەت سالاسىنداعى باقىلاۋ دەپارتامەنتىنىڭ باسشىسى قۋانىش جاپاقوۆ.
دەپارتامەنت باسشىسىنىڭ ايتۋىنشا، ونداي جازبالارعا مەملەكەتتىك قىزمەتشىلەردىڭ ءتۇرلى كەشتەردەگى نەمەسە وزگە دە ورىندارداعى ادەپسىز، ماس كۇيىندەگى، كاليان جانە وزگە دە تىيىم سالىنعان زاتتاردى تۇتىنۋ كەزىندەگى فوتو جانە بەينەتۇسىرىلىمدەرى جاتادى.
سونىمەن قاتار دەسترۋكتيۆتى ءدىني اعىم اقپاراتتارى بار جازبالارعا "لايك" باسۋ مەملەكەتتىك قىزمەتشىنىڭ تارتىپتىك جازاعا تارتىلۋىنا اكەپ سوقتىرۋى مۇمكىن.
"مىسالعا، ناۋرىز ايىندا مەملەكەتتىك ورگاندارعا مونيتورينگ جاسالدى. ونىڭ بارىسىندا ينۆەستيسيالار جانە دامۋ مينيسترلىگىنىڭ، قورعانىس جانە اۋەعارىش ونەركاسىبى مينيسترلىگىنىڭ ءبىرقاتار قىزمەتكەرلەرىنىڭ اككاۋنتتارىنان مەملەكەتتىك قىزمەتتىڭ بەدەلىن تۇسىرەتىن جەكەلەگەن ماتەريالدار انىقتالدى. بۇل جازبالاردى وشىرۋگە جانە اتالمىش ماتەريالداردى جاريالاعان قىزمەتكەرلەردىڭ ءىسىن تارتىپتىك كوميسسيادا قاراۋ جونىندە مالىمەتتەر جولداندى. ساۋىردە جەرگىلىكتى اتقارۋشى ورگان قىزمەتكەرلەرىنىڭ اككاۋنتتارىنا مونيتورينگ جۇرگىزىلۋدە"، - دەدى ول.