قامشىنىڭ بەتىندە شقو ناۋالى بالالار ۇيىنە قاتىستى «شقو بالالار ۇيىندەگى سۇمدىقتىڭ بەتى اشىلدى» دەگەن تاقىرىپپەن ماتەريال شىققان بولاتىن. قازىرگى كەزدە ەلىمىزدە كوپ ماسەلە جابۋلى قازان كۇيىندە قالىپ جاتقانى بۇلتارتپاس شىندىق. جۋرناليستەر كەلىپ كامەراعا ءتۇسىرىپ، ادىلەتتىلىك تالاپ ەتپەسە قاراپايىم حالىقتىڭ مۇڭى جوعارى جاققا جەتپەيتىنى دە وتىرىك ەمەس. بالا ءبىزدىڭ بولاشاعىمىز، جەتىم كورسەڭ جەبەي ءجۇر دەيمىز. جەتىم بالالار تەپەرىش كورۋدە، ولارعا ايعايلاپ ۇرسادى، ءتىپتى كەشكى اسسىز قالدىرادى، ارتىعىمەن جۇمىسقا جەگەدى دەپ جازىلعان شاعىم حاتتى وقي وتىرىپ ءبىز دە ەرىكسىز ەموسيا بەرىلدىك. اقپاراتتىڭ راس-وتىرىگىن بىلمەي جاتىپ، تاۋەكەلگە بەل بۋىپ، قۇزىرلى ورگاندار اتالمىش ماسەلەگە نازار اۋدارسىن، قۇقىق بۇزۋشىلىق شىنىمەن دە ورىن السا، كىنالىلەر جازاعا تارتىلسىن دەگەن نيەت-ماقساتپەن ءبىر بۋما حاتتى جاريالاعان بولاتىنبىز. ماتەريالدى سايت بەتىنە شىعارار الدىندا شقو ءبىلىم بەرۋ باسقارماسىنا زۆونداپ، الدىن-الا ءمان-جايدى ەسكەرتكەنبىز.
نازىمنىڭ (حاتتىڭ اۆتورى) شاعىمى ەلدى دۇرلىكتىردى. سايكەسىنشە، پىكىر جازعان، شۋ كوتەرگەن وقىرماندار دا كوپ بولدى. «قامشى» وسىنداي داۋلى ماتەريال جاريالار كەزدە پورتال ەركىن پىكىر الاڭى ەكەندىگىن، ەكىنشى تاراپتىڭ دا تۇسىندىرمەسىن جاريالاۋعا اركەز دايىن ەكەندىگىن ەرەكشە اتاپ وتكەن بولاتىن. ۋادەمىز بويىنشا ماتەريال شىندىققا جاناسپايدى، مەن سول بالالار ءۇيىنىڭ تاربيەلەنۋشىسىمىن دەپ حابارلاسقان دميتريي سكوسنياگين دەگەن ورىس جىگىتىنىڭ حاتىن دا وقىرمان نازارىنا ۇسىندىق. ورىسشا جازىلعان حاتتى رەداكسيا قازاقشاعا اۋدارىپ حالىقتىڭ تارازىسىنا سالدى.
ارادا بىرنەشە اي وتكەننەن سوڭ ق ر پارلامەنت ءماجىلىسىنىڭ دەپۋتاتى نۇرتاي سابيليانوۆپەن تىلدەسۋ بارىسىندا اڭگىمە اۋانى ناۋالى بالالار ۇيىنە اۋدى. نۇرتاي مىرزا ءوز كەزەگىندە بۇل ماسەلەدەن حابار ەكەنىن، قامشىعا جولدانعان حاتتىڭ ءبىر كوشىرمەسى ونىڭ مەكەنجايىنا دا جىبەرىلگەنىن ايتتى. ماسەلەگە بەيجاي قاراماعان نۇرتاي سابيليانوۆ ناۋالى بالالار ءۇيىنىڭ قىزمەتكەرلەرىن، تاربيەنۋشىلەرىن دە جاقسى تانيتىن بولىپ شىقتى.
«ناۋالى بالالار ۇيىمەن 2000-شى جىلداردان باستاپ تىعىز بايلانىستامىن. ديرەكتورىن دا تانيمىن. ناۋالىداعى بالالارعا قولىمنان كەلگەن كومەكتى اياعان ەمەسپىن: كيىم-كەشەك، تەحنيكالىق جابدىقپەن قامتاماسىز ەتكەنمىن. بالالارمەن اڭگىمە-دۇكەن قۇراپ، بىرگە شاي ىشكەن كەزىمىز دە بولعان. ءبىتىرىپ كەتكەن بالالار مەنى جاقسى تانيدى. كەزىندە ءبىر توپ بالانى استاناعا اكەلىپ، ەلوردامەن تانىستىرىپ، پارلامەنتتى كورسەتىپ، قىدىرتقان بولاتىنمىن. بىرنەشەۋىنىڭ وقۋ اقىسىن ءوز قالتامنان تولەدىم. كەيبىرەۋى ءالى كۇنگە شەيىن اماندىعىمدى سۇراپ، حابارلاسىپ تۇرادى. ايتپاعىم، ناۋالىدا ءبارى جاقسى، بالالار تاربيەلى، ساۋاتتى، ءتارتىپتى. مىنانداي سۇمدىق جايتتى ەستىپ ناۋالىعا جول تارتتىم. مادەنيەت ۇيىندە تۇرعىندارمەن كەزدەسەمىن دەپ جەرگىلىكتى باسىلىمعا الدىن-الا حابارلاما بەردىم. 250 ادامداي جينالدى. زالدا ينە شانشار جەر بولمادى. ناۋالى بالالار ۇيىندەگى جاعداي حاتتا جازىلعانداي جاعا ۇستاتارلىق بولسا، اۋىلداعىلاردىڭ ونى ەستىپ-بىلمەۋى مۇمكىن ەمەس. تۇرعىندار شاعىمدانۋشى نازىمنىڭ وزىنە ايىپ تاقتى. ارينە، مۇنىڭ ءبارى اۋىزبەن ايتىلعان ءسوز. قۇزىرلى ورگاندار تەكسەرۋ جاساپ، شىندىقتى انىقتايدى. بىزدىكى ءۇنسىز قالماۋ، ماسەلە كوتەرۋ عوي» دەدى دەپۋتات مىرزا.
ناۋالى بالالار ۇيىندەگى جاعداي بويىنشا تەكسەرۋلەر جۇرگىزىلىپ، اق-قاراسى انىقتالاتىندىعىنا ءبىز دە قۋانىشتىمىز. سەبەبى نۇرتاي سابيليانوۆ ۇيىمداستىرعان جينالىس بارىسىندا «قامشى» سەنساسيا قۋىپ، وسىنداي ماتەريال شىعاردى دەپ دۇرلىككەن اعايىن دا بولىپتى. الاش وردانىڭ 100 جىلدىق مەرەيتويىنا 500 ادامعا اس بەرىپ، 100 اعاش ەگىپ، ەندى 100 جەتىم بالانى كيىندىرمەك «قامشىعا» مۇنداي سەنساسيا قاجەت ەمەس. ايەل كۇيەۋىنىڭ كوزىنە ءشوپ سالىپ، ونى ماقتان تۇتاتىن زاماندا ۇرپاق ماسەلەسى، بالالاردىڭ جاعدايى، جەتىم مەن جەسىردىڭ ءۇنى ەسكەرۋسىز، ەلەۋسىز قالماسىن دەگەن وي عانا.
وسى ورايدى پايدالانا وتىرىپ، «قامشى» جوسپارلاپ جاتقان «100 جەتىم بالاعا كومەك» ءىس-شاراسىنا كەز كەلگەن ازامات قولداۋ ءبىلدىرىپ، اتسالىسا الاتىنىن ەسكەرتكىمىز كەلەدى.
قامشىگەر: جازيرا بايدالى