قامشى اقپاراتتىق اگەنتتىگى تابيعي بولمىسىن سول قالپىندا قابىلدايتىن ايەلدەردىڭ وقيعالارىن وقىرمان نازارىنا ۇسىنادى. ومىردە نەشە ءتۇرلى قىزىق بار. ومىردە نەشە ءتۇرلى ادام بار. مۇنىمەن ءبىز كەيىپكەرلەردەن ۇلگى الىڭىز دەگەن وي سالعىمىز كەلمەيدى. تەك ءار ايەلدىڭ ءوزىن باقىتتى، ءوزىن ەركىن سەزىنگەنى بىزدىڭشە ماڭىزدى.

مورگان ميكينەس بۇگىندە عالامتوردا اسا تانىمال تۇلعا. ول ايەل ادام اياق-قولداعى ءجۇندى الماۋى كەرەك دەگەن يدەيانى ناسيحاتتاپ جۇرگەندەردىڭ ءبىىر ءارى بىرەگەيى. ونىڭ ويىنشا ايەل ادامزاتى ءجۇنسىز بولسىن، جۇنمەن بولسىن ادەمى. جۇندەرىمدى الىپ تاستاسام، ادەمىرەك كورىنەمىن دەپ ويلايتىن قىز-كەلىنشەكتەر ۋاقىتتارى مەن اقشالارىن بەكەردەن-بەكەر جەلگە ۇشىرۋدا دەيدى مورگان.  باسىندا ول وز-وزىنە قارايتىن، سول ءۇشىن قىرۋار اقشا جۇمسايتىن كادىمگى قالانىڭ قىزى بولعان. الايدا كۇندەردىڭ ءبىر كۇنى ءبارىن وزگەرتەمىن دەپ شەشىم قابىلداپ، سپورتپەن اينالىسىپ، دۇرىس تاماقتانىپ، جاڭا ءومىر باستايمىن دەپ وز-وزىنە ۋادە بەرگەن ەكەن.

مورگاننىڭ ايتۋىنشا، ادامنىڭ دەنەسىندەگى جۇندەر بەكەر ەمەس. «ادام باسىنداعى شاشىن قىرىپ الىپ تاستامايدى عوي، جۇندەردى الۋ بىزدەن پايدا كورىپ وتىرعان سۇلۋلىق يندۋسترياعا عانا كەرەك» دەيدى ول. مورگان باقىتتى، جىگىتىمەن بۇگىنگى كۇنى گاۆايي شتاتىندا ءومىر ءسۇرىپ جاتىر.

ەليسكە كەزەك بەرەتىن بولساق، ول ءجۇندى الۋ بارىسىندا دەنەسى قاتتى قىزارىپ كەتەتىندىگىن ايتتى. «ايەل ادامى جىل سايىن اياق-قولداعى ءجۇندى الۋعا ءومىرىنىڭ 72 ساعاتىن ارنايدى ەكەن، ول 72 ساعاتتى ساياحاتقا نەمەسە دوستارمەن كوڭىل كوتەرۋگە ارناسام بولادى عوي» دەپ اعىنان جارىلدى ەليس.  ونىڭ ۆيدەوروليكتەرى ورتاشا ەسەپپەن 3 ميلليون كورىلىم جينايدى ەكەن. ەليس قىزدارعا وزدەرىنىڭ ىشكى داۋىسىنا قۇلاق اسۋعا كەڭەس بەرەدى.

ەمشەكتەگى بالاسى بار سوفي دجو دا اياق-قولداعى ءجۇندى الماۋدى دۇرىس دەپ سانايدى. ونىڭ ويىنشا، بۇگىنگى قوعام ايەل ادامدارىنا كوپ قىسىم كورسەتەدى. ول سونىمەن قاتار اتىردەن، دەزودارانتتان باس تارتقان. بالاسىن جۇرتتىڭ كوزىنشە ۇيالماي-قىسىلماي ەمشەكپەن ەمىزۋدى دە ءوز پرينسيپىنە اينالدىرعان ايەل.  

17 جاستاعى لالوني قاتارداعى ءجاسوسپىرىم ەمەس. ول تۆيتتەردەگى جازبالارىمەن تانىمال. ونىڭ ءار جازباى 19000 لايك جيناپ، 7000 رەت بولىسىلەدى ەكەن. مۇنداي تانىمالدىلىقتىڭ سىرى – اياق-قولداعى ءجۇندى الماۋىندا. بىرەۋلەر وعان تاڭداي قاقسا، ەندى ءبىرى جاقتىرماي جاتادى. ءبىراق لالوني وعان باس قاتىرمايدى. ول ءوزىن، ءوزىنىڭ دەنەسىن، تابيعي بولمىسىن سول قالپىندا قابىلدايتىنىمەن ماقتانادى.