ەلباسى كەشەگى وڭتۇستىك قازاقستان وبلىسىنداعى ساپارى بارىسىندا جەرگىلىكتى جۇرتشىلىقپەن كەزدەسۋىندە وڭتۇستىكتەن سولتۇستىككە قونىستاندىرۋ دەڭگەيىن ارتتىرۋ جونىندە شارالار قابىلداۋدى تاپسىردى.

– باعدارلاما سىزدەردىڭ دە وبلىستارىڭىزدا قولدانىلادى. مەن سىزدەردىڭ ەڭبەكقور حالىق ەكەندەرىڭىزدى جاقسى بىلەمىن. سولتۇستىك، شىعىس وڭىرلەرگە قونىس اۋدارىپ، ەلىمىزدىڭ دامۋى مەن بولاشاعىنا زور ۇلەس قوسىپ كەلەسىزدەر. وسى باعىتتاعى جۇمىستى جالعاستىرۋ كەرەك. وبلىس اكىمىنە ۇكىمەتپەن بىرلەسىپ، حالىقتى جۇمىسپەن قامتۋ جانە ونى قونىستاندىرۋ دەڭگەيىن ارتتىرۋ جونىندە شارالار قابىلداۋدى تاپسىرامىن، – دەدى مەملەكەت باسشىسى.

ال، بۇگىن استانادا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا دا حالىقتى وڭتۇستىكتەن سولتۇستىككە كوشىرۋدىڭ جالعاساتىنىن «نۇر وتان» پارتياسىنىڭ باستاماسىمەن وتكەن جيىندا مالىمدەدى.

بيىل 2700 ازاماتتىڭ قونىس اۋدارۋىنا سۋبسيديا بولىنگەن. بۇل باعدارلاما ەڭبەك رەسۋرستارىن ايماقتاردا ءتيىمدى پايدالانىپ، دەموگرافيالىق تەڭدىكتى ساقتاۋعا باعىتتالعان. ويتكەنى، وڭتۇستىك وڭىردە حالىق تىعىز ورنالاسقان. سوندىقتان، بالاباقشا، مەكتەپتەردە ورىن تاپشىلىعى، جۇمىسسىزدىق دەڭگەيى جوعارى. ال تەرىسكەيدە كەرىسىنشە، قالاعا جاپپاي كوشۋدىڭ سالدارىنان ەلدى مەكەندەر بوس قالىپ جاتىر. سوندىقتان، جينالعاندار مينيسترلىككە بۇل باعىتتاعى جۇمىستى كۇشەيتىپ، ولقىلىقتاردىڭ ورنىن تولتىرۋ كەرەكتىگىن جەتكىزدى. 

ايتا كەتسەك، وڭتۇستىك حالقىن سولتۇستىككە قونىستاندىرۋ باعدارلاماسىنا 2017 جىلى 85 ملرد. تەڭگە بولىنگەن بولاتىن. بۇل تۋرالى 10 اقپاندا استانادا «كورپوراتيۆتىك سەكتوردا ايەلدەردىڭ مۇمكىندىگىن كەڭەيتۋ» اتتى حالىقارالىق فورۋمدا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتكەن ەدى.

ەلباسى نازاربايەۆ وتكەن جىلى 9 قىركۇيەكتە ۇكىمەتتە وتكەن جينالىستا دا وڭتۇستىك حالقىن سولتۇستىككە قونىستاندىرۋ تۋرالى ايتقان ەدى. «ەڭبەك ۇتقىرلىعى بويىنشا  جۇمىس بەرۋشى مەن جۇمىسشىلارعا ءبىرىن-بىر تابۋعا كومەكتەسۋ  قاجەت. وسىعان بايلانىستى ءبىز «سەرپىن» دەگەن جوبانى ىسكە اسىرىپ جاتىرمىز عوي. ول حالىق تىعىز تۇراتىن وڭىرلەردىڭ جاستارىنا ءبىلىم بەرىپ، ولاردى  كادر تاپشى ايماقتارعا جۇمىسقا ورنالاستىرۋعا  مۇمكىندىك بەرەدى. ءقازىردىڭ وزىندە مەندەگى بار دەرەكتەرگە سايكەس 12،5 مىڭ جاس مامان وقۋ ورىندارىندا دايىندالىپ جاتىر. مۇنان وزگە 20 مىڭداي ادام «جۇمىسپەن قامتۋ جول كارتاسى» بويىنشا ەڭبەك كۇشى تاپشى اۋداندارعا كوشىرىلدى»،-  دەگەن بولاتىن ەلباسى. وسى سوزىندە ق ر پرەزيدەنتى سولتۇستىكتەگى كاسىپتىك-تەحنيكالىق وقۋ ورىندارىنىڭ ۇشتەن ءبىر بوس تۇرعانىن قاپەرگە سالىپ وڭتۇستىك جاستارىن سولتۇستىككە قونىستاندىرۋ جۇمىستارىن جانداندىرۋدى ايرىقشا تاپسىرىپ ەدى.

بايقاعانىمىزداي پرەزيدەنتتىڭ اتالعان ماسەلەنى بىرنەشە رەت قاداپ ايتۋى وسى ساياساتقا مەملەكەتتىڭ ۇلكەن سالماق سالىپ وتىرعانىن كورسەتەدى. سونداي-اق شەتەلدەن ورالعان ەتنيكالىق قازاقتاردى دا سولتۇستىك وبلىستارعا قونىستاندىرۋدىڭ مەملەكەتتىك باعدارلاماسى ازىرلەنگەن. بۇل باعدارلامالار ءوز كەزەگىندە قازاق ەلىنىڭ دامۋى مەن وركەندەۋىنە ۇلكەن ۇلەسىن قوساتىنى ءسوزسىز.

نۇرعالي نۇرتاي