7 مامىر كۇنى استانادا ق ر قارۋلى كۇشتەرىنىڭ قۇرىلۋىنىڭ 25 جىلدىعى مەن 1941-1945 جىلدارعى ەكىنشى دۇنيەجۇزىلىك سوعىستاعى جەڭىسكە ارنالعان شەرۋ وتەدى. بۇل تاۋەلسىز قازاقستان تاريحىنداعى ەڭ ءىرى اسكەري پاراد بولادى دەپ حابارلايدى قامشى اقپاراتتىق اگەنتتىگى استانا اكىمدىگىنىڭ باسپا ءسوز قىزمەتىنە سىلتەمە جاساپ.  

«اسكەري پاراد جەكە قۇرام مەن تەحنيكالار سانى بويىنشا ەل تاريحىنداعى ەڭ ءىرى شەرۋ بولماق. وعان جاياۋ اسكەرلەردىڭ 30-عا جۋىق پارادتىق ەسەپتوبى قاتىسادى. ولاردىڭ قۇرامىندا 5 مىڭنان اسا اسكەري قىزمەتشى سالتاناتتى مارشپەن ءجۇرىپ وتەدى. سونداي-اق شەرۋگە 300-گە جۋىق اسكەري تەحنيكا، 80-گە جۋىق ۇشۋ اپپاراتى تارتىلادى.

2017 جىلعى اسكەري پارادتىڭ ەرەكشەلىگى - اۋماقتىق قورعانىس بريگادالارىنىڭ پارادتىق جاياۋ ەسەپتوپتارىنىڭ، بارلاۋشىلار روتاسىنىڭ جانە ەلىمىزدەگى ءتورت «جاس ۇلان» مەكتەبىنىڭ بارابانشىلار روتاسىنىڭ، سونداي-اق ق ر قورعانىس مينيسترلىگى اسكەري-تەحنيكالىق مەكتەبى تەحنيكالارىنىڭ تارتىلۋى.

ەلوردا اكىمدىگىنىڭ قاۋلىسىمەن 8 ءساۋىر - 8 مامىر ارالىعىندا شاراعا استانا قالاسىنىڭ 50 اۋماقتىق قورعانىس بريگاداسى شاقىرىلدى. ولار اسكەري پارادقا العاش رەت قاتىسپاق.

وقىرماننىڭ ەسىنە سالساق، 1992 جىلى 7 مامىردا قازاقستان پرەزيدەنتى ن.ءا.نازاربايەۆ: «قازاقستان رەسپۋبليكاسى مەملەكەتتىك قورعانىس كوميتەتىن قازاقستان رەسپۋبليكاسىنىڭ قورعانىس مينيسترلىگى ەتىپ قايتا قۇرۋ تۋرالى»، «قازاقستان رەسپۋبليكاسىنىڭ قارۋلى كۇشتەرىن قۇرۋ تۋرالى» جانە العاشقى قورعانىس ءمينيسترى ەتىپ گەنەرال پولكوۆنيك (1993 جىلدىڭ 9 مامىرىنان ارميا گەنەرالى) س.ق.نۇرماعامبەتوۆتى تاعايىنداۋ تۋرالى جارلىقتارعا قول قويدى. بۇل كۇن قازاقستاننىڭ دەربەس قارۋلى كۇشتەرىنىڭ قۇرىلعان كۇنى بولىپ تاريحقا ماڭگى وشپەستەي جازىلدى.

ايتا كەتەيىك، بيىلعى 2017 وقۋ جىلى «قارۋلى كۇشتەردىڭ 25 جىلدىعىنا – جوعارى جاۋىنگەرلىك ازىرلىك!» ۇرانىمەن ءوتىپ جاتىر.