وزبەكستان پرەزيدەنتىنىڭ قازاقستانعا جۇمىس ساپارى اياسىندا نۇرسۇلتان نازاربايەۆ شاۆكات ميرزيويەۆپەن كەزدەستى دەپ حابارلايدى قامشى اقپاراتتىق اگەنتتىگى akorda.kz-كە سىلتەمە جاساي وتىرىپ. كەزدەسۋدە وزبەك كوشباسشىسىنىڭ قازاقستانعا بيىلعى ناۋرىز ايىنداعى مەملەكەتتىك ساپارى بارىسىندا ەكى ەل اراسىندا قول جەتكىزىلگەن ۋاعدالاستىقتاردىڭ ىسكە اسىرىلۋ ماسەلەلەرى تالقىلاندى.
مەملەكەت باسشىسى وتكەن كەزدەسۋدەن بەرى ەكى ەل اراسىنداعى ىسكەرلىك بەلسەندىلىك ارتىپ وتىرعانى بايقالاتىنىن اتاپ ءوتتى.
– بيىلعى ءبىرىنشى توقساندا ەكونوميكانىڭ ءتۇرلى سالاسىنداعى ىسكەرلىك ءوزارا قارىم-قاتىناستىڭ دەڭگەيى ارتتى. وسى ورايدا، كولىك-لوگيستيكا سالاسىن، اۆتوونەركاسىپتى، سونداي-اق كەڭ اۋقىمدى ماسەلەلەرگە قاتىستى وڭىرلىك ىنتىماقتاستىقتى اتاپ وتۋگە بولادى. 2017 جىلعى العاشقى ءۇش ايدا تاۋار اينالىمى 37%-عا ءوستى، – دەدى قازاقستان پرەزيدەنتى.
ش.ميرزيويەۆ تىعىز ەكىجاقتى كەزدەسۋلەر مەملەكەتارالىق قارىم-قاتىناستىڭ تيىمدىلىگىنە تىكەلەي ىقپال ەتىپ وتىرعانىنا نازار اۋداردى.
– بيىلعى ناۋرىز ايىنداعى ساپاردان سوڭ ءبىز بىرلەسكەن جۇمىستاردىڭ بارلىق باعىتى بويىنشا جول كارتاسىن قابىلدادىق. مينيسترلەر، وڭىرلەر باسشىلارى دەڭگەيىندەگى كەزدەسۋلەر جيىلەدى، – دەدى وزبەك كوشباسشىسى.
وزبەكستان پرەزيدەنتى رەسەي فەدەراسياسىنان مۇناي تاسىمالداۋ ماسەلەسىنە بايلانىستى قولداۋ كورسەتكەنى ءۇشىن نۇرسۇلتان نازاربايەۆقا العىس ايتتى.
سوڭىندا ەكى ەل باسشىلارى قازاقستان مەن وزبەكستان اراسىنداعى ىنتىماقتاستىقتىڭ وڭ قارقىنى ساقتالىپ، ودان ءارى دامي بەرەتىنىنە سەنىم ءبىلدىردى.
پىكىر قالدىرۋ