استانادا 3-4 مامىر كۇندەرى سيرياداعى جاعداي بويىنشا حالىقارالىق كەزدەسۋدىڭ كەزەكتى وتىرىسى وتەدى. استانادا وتەتىن كەلىسسوزدەرگە سيريالىق قارۋلى وپپوزيسيانىڭ قاتىساتىنىن قازاقستاننىڭ سىرتقى ىستەر مينيسترلىگى راستادى. قارۋلى توپتار دەلەگاسياسىنىڭ مۇشەسى فاتەح حاسسۋننىڭ مالىمدەۋىنشە، شاراعا شاقىرتۋ رەسەيلىك دەلەگاسيادان كەلىپ تۇسكەن.
«سيريا ماسەلەسى بويىنشا استانادا وتەتىن حالىقارالىق كەزدەسۋدىڭ بارلىق قاتىسۋشىلارى، ونىڭ ىشىندە موحاممەد اللۋش باستاعان سيريالىق قارۋلى وپپوزيسيا وكىلدەرى كەزدەسۋگە قاتىساتىندارىن راستادى»، - دەپ حابارلادى ق ر ءسىم باسپا ءسوز قىزمەتىنىڭ باسشىسى ءانۋار جايناقوۆ. ونىڭ ايتۋىنشا، ازىرگە استاناعا بۇۇ ساراپشىلارى مەن كەپىل مەملەكەتتەردەن دەلەگاسيالار كەلىپ جاتىر. بۇۇ باس حاتشىسىنىڭ سيريا بويىنشا ارنايى وكىلى ستاففان دە ميستۋرا دا كەلىسسوزدەرگە قاتىساتىنىن راستادى. ول بۇگىن كەشكە استاناعا كەلەدى. اقش باقىلاۋشى رەتىندە قاتىسادى.
بۇگىن كەپىل مەملەكەتتەردەن كەلگەن ساراپشىلار اراسىندا تەحنيكالىق كەزدەسۋ وتەدى، جوعارى دەڭگەيدەگى كەلىسسوزدەر 3-4 مامىر كۇندەرىنە جوسپارلانعان.
استانا پروسەسىنىڭ اياسىندا 2017 جىلعى 23-24 قاڭتاردا جانە 15-16 اقپاندا استانادا سيريا بويىنشا جوعارى دەڭگەيدەگى حالىقارالىق كەزدەسۋدىڭ ەكى راۋندى، سونداي-اق 6 اقپاندا ساراپشىلاردىڭ تەحنيكالىق كەزدەسۋى وتكەن بولاتىن. 14-15 ناۋرىز كۇندەرى وتكەن ءۇشىنشى كەلىسسوزدە جاۋىنگەرلىك ءىس-قيمىلداردى توقتاتۋ رەجيمىنە كەپىل مەملەكەتتەر - رەسەي، تۇركيا، يران دەلەگاسيالارى قاتىستى. سونداي-اق، كەزدەسۋگە اقش، يوردانيا، سيريا ۇكىمەتى جانە بۇۇ وكىلدەرى كەلدى. ايتا كەتەرلىگى، كەپىلگەر ەلدەردىڭ بىرلەسكەن مالىمدەمەسىندە استانا پروسەسى سيرياداعى تۇراقتىلىقتى قامتاماسىز ەتۋدە ءتيىمدى جۇمىس ىستەپ جاتقاندىعى اتالىپ وتىلگەن. دەگەنمەن، ماڭىزدى ىلگەرىلەۋشىلىك بولماعانىمەن استانا جانە جەنيەۆا پروسەستەرى سيرياداعى سوعىستى جانە اتىس قيمىلدارىن توقتاتۋ رەجيمىنىڭ جۇزەگە اسىرىلۋىنا سەپتىگىن تيگىزگەندىگى باسا اتاپ وتىلگەن. جەنيەۆا پروسەسىنىڭ اجىراماس بولىگى بولىپ تابىلاتىن بۇل كەلىسسوزدەر 6 جىل بويى قارۋلى قاقتىعىس زاردابىن تارتىپ كەلە جاتقان سيريا حالقىنىڭ بەيبىت ومىرگە دەگەن ءۇمىتىن قايتا وياتقان.
بۇل كەزدەسۋلەردىڭ نەگىزگى ناتيجەسى بۇۇ قاۋىپسىزدىك كەڭەسىنىڭ 2254-قارارىنا (2015) سايكەس تاراپتارعا جەنيەۆا پروسەسىنىڭ اياسىندا كۇن ءتارتىبىنىڭ ساياسي ماسەلەلەرىن تالقىلاۋعا كوشۋ مۇمكىندىگىن بەرگەن – سيرياداعى سوعىس امالدارىن توقتاتۋ رەجىمىن باقىلاۋ بويىنشا بىرلەسكەن جەدەل توپ تۋرالى ەرەجەنى كەلىسۋ بولىپ تابىلدى.
«سيرياداعى قاقتىعىستاردىڭ اياقتالۋى جايىندا ايتۋعا ءالى ەرتە. دەگەنمەن، ءبىزدىڭ الدىمىزدا كۇردەلى جول جاتىر. ءبىراق، ءبىز كۇش-جىگەرىمىزدى بىرىكتىرۋ ارقىلى تەرروريزممەن جانە ەكسترەميزممەن كۇرەسە الامىز. ءبىزدىڭ استانا پروسەسى ءوزىنىڭ تاجىريبەلىك ۇلەسىن قوساتىندىعىنا سەنىمىمىز مول»، - دەلىنگەن قاتىسۋشىلاردىڭ بىرلەسكەن مالىمدەمەسىندە.
الدىڭعى ءۇش راۋند كەزدەسۋدەن سيرياداعى جاعداي وڭالىپ كەتپەسە دە، اقش پەن رەسەي ناتيجەلى دەپ باعالادى. «ءبىز بۇۇ-نىڭ جەنيەۆاداعى كەلىسسوزدەرىن جاڭعىرتۋ ءۇشىن جول سالۋعا باعىتتالعان استاناداعى كەزدەسۋدىڭ ۇلەسىن مويىندايمىز»، دەلىنگەن اقش-تىڭ مەملەكەتتىك دەپارتامەنتىنىڭ باسپا ءسوز قىزمەتى تاراتقان اقپاراتتاردا. ءپۋتيننىڭ ءوزى دە سيريا بويىنشا استاناداعى كەلىسسوزدەرگە وڭ باعاسىن بەردى.
جاقىندا عانا سيريادا حيميالىق قارۋ قولدانىلىپ، جۇزدەگەن ادامنىڭ جان بەرىپ، بالالاردىڭ جانتۇرشىگەرلىك قينالىستا جاتقانى تۋرالى ۆيدەو الەمدى ءدۇر سىلكىندىردى. الەۋمەتتىك جەلىدە الەمنىڭ تۇكپىر-تۇكپىرىنەن سوعىستى سىناعان، سيرياداعى شيەلەنىستىڭ توقتاتىلۋىنا مۇددەلى پوستتار جازىلدى. ساراپشىلار دا ەۋروپاداعى بوسقىندار داعدارىسىنا سەبەپ بولعان، تاياۋ شىعىستى ءورت وشاعىنا اينالدىرعان، ونداعان ميلليون ادامنىڭ تاعدىرى تارازىلانعان سيرياداعى شيەلەنىستىڭ بىتەر ۋاقىتى جەتتى دەپ سانايدى. ال، بۇل تۇرعىدا استانا پروسەسىنىڭ وڭ ناتيجە بەرۋىنە تاراپتاردىڭ بارلىعى تىلەكتەس بولىپ وتىر.
دەرەكتەر بويىنشا، سيرياداعى ازاماتتىق سوعىستان 320 مىڭنان استام قازا تاپتى. ونىڭ 15 مىڭنان استامى بالالار. ال، Reuters شىنايى ساننىڭ 450 مىڭعا جاقىنداپ قالعانىن حابارلاعان.
