قامشىنىڭ حات قورجىنىنا كوپبالالى انا ءاليا سادىربايەۆانىڭ اتىنان حات كەلىپ ءتۇستى. الەمدى وزگەرتكىڭ كەلسە، وزىڭنەن باستا دەگەن ۇستانىممەن كەلىسەتىن ءاليا حانىمنىڭ بارشا قازاقستان جۇرتشىلىعىنا تاستالعان ۇندەۋ حاتىن ورىس تىلىنەن قازاقشاعا اۋدارىپ وقىرمان نازارىنا ۇسىنامىز.

قىمباتتى دوستار!

مەن ق ر پارلامەنت سەناتىنىڭ دەپۋتاتتىعىنا ءوزىمنىڭ كانديداتۋرامدى ۇسىنامىن دەپ شەشىم قابىلدادىم.

«سىزدەر حالىق قالاۋلارىن سىناعاندى ۇناتاسىزدار، ەندەشە وزدەرىڭىزگە سۇراق قويايىن: «ولاردى سايلاعان كىم؟». سايلاۋشىلار سايلاعان. دەمەك ءماسليحات ارقىلى دەپۋتاتتىققا جاناما تۇردە سايلايسىزدار. تالاپ ەتىڭىزدەر. كوڭىلدەن شىعاتىن ازاماتتاردى سايلاڭىزدار»... – ءبىرعانىم ءايتىموۆانىڭ بۇل سوزدەرى كۇلدىرتتى دە، جىلاتتى دا. ءبىرعانىم حانىمنىڭ العاشقى ويى كوپ تالقىعا ءتۇستى دە، ءتۇيىنى نازارعا الىنبادى.

شىن مانىسىندە، دەپۋتات حانىمنىڭ ايتقانى دۇرىس. ءماسليحات دەپۋتاتتارىن سايلايتىن ءوزىمىزبىز. ءقازىر سايلاۋ دۇرىس ۇيىمداستىرىلمادى، دۇرىس تاڭدالىنبادى دەپ اڭگىمە وربىتكىم كەلمەيدى. الايدا ولاردىڭ قانداي سەناتوردى نەلىكتەن تاڭداعانىن سۇراۋعا قۇقىعىمىز بار.

سونىمەن قاتار سەناتتا وتىرعا 47 ازاماتتىڭ جارتىسى نەلىكتەن زەينەت جاسىنداعىلار دەپ تە سۇراي الامىز. (23 ادام – 63-72 جىلعىلار).

ولار دەپۋتات بولىپ نە ىستەپ وتىر؟ سەرىك اقىلبايەۆ ەسىمدى سەناتور (ايتپاقشى، قاراعاندى وبلىسىنىڭ تۋماسى) جاقىندا ۇكىمەت ساعاتى بارىسىندا كولىكتىڭ كوپتىگىنەن ءوز ۇيىنە ۋاقىتىندا جەتە المايتىندىعىن ايتىپ الاڭدادى.

ءبىز سايلاعان ءماسليحات دەپۋتاتتارى سەناتقا جاسارىن جاساپ، اسارىن اساعان ازاماتتاردى نەلىكتەن سايلايدى؟ مەنىڭشە، ولار بەينەتتىڭ ءتۇبى زەينەتتىڭ راحاتىن كورىپ، بالا-شاعا، نەمەرە-شوبەرەنىڭ جەتىستىگىنە قۋانىپ، ۇيلەرىندە وتىرۋى ءتيىس سياقتى. اتالمىش ايماقتا ءوز قالاسىنىڭ، ەلدىمەكەنىنىڭ ماسەلەسىن قاۋزاي الاتىن، جەرلەستەرىنىڭ جان ايقايىن رەسپۋبليكالىق دەڭگەيدە ماسەلە قىلىپ كوتەرە الاتىن باسقا ازاماتتار قالماعان با؟

جاقىندا سەناتتا سايلاۋ بولماق. پرەزيدەنتتىڭ بۇيرىعى بويىنشا سايلاۋ ۇستىمىزدەگى جىلدىڭ 28 ماۋسىمىنا بەلگىلەندى. دەمەك سايلاۋعا ەكى ايدان از ۋاقىت قانا قالدى.

دەپۋتاتتارعا كوڭىلى تولماعان بارشا ازاماتتارعا ءوز ىس-ارەكەتتەرىمەن ازاماتتىق پوزيسيانى دالەلدەيتىن كەز جەتتى دەگىم كەلەدى.

سول سەبەپتى بۇل ماسەلەگە بەيجاي قارامايتىن ءوز ەلىنىڭ پاتريوتتارىن وزدەرىنىڭ ءماسليحات دەپۋتاتتارىنا كىمدى سەناتقا سايلايسىز دەپ سۇراۋلارىن وتىنەمىن. پارلامەنتتەگى جۇمىستى كەلەسىدە سىنعا الماس ءۇشىن ءماسليحات دەپۋتاتتارىنىڭ جاۋاپكەرشىلىگىن كۇشەيتۋ، ولاردان تۇسىنىكتەمە تالاپ ەتۋ ءوز قولىمىزدا.

ءوز كەزەگىمدە دوستارىمنىڭ كەڭەسى، ءوتىنىشى بويىنشا ءوز-وزىمدى ق ر پارلامەنت سەناتىنىڭ دەپۋتاتتىعىنىڭ كانديداتتىعىنا ۇسىنامىن.

«شەشىنگەن سۋدان تايىنباس» دەمەكشى قاراعاندى وبلىسىنىڭ اتىنان ق ر پارلامەنت سەناتىنىڭ دەپۋتتاتتىعىنا كانديداتۋرامدى ۇسىنۋ بويىنشا تىركەلۋ جۇمىستارىن باستايمىن.

دوستار، وزدەرىڭىزدەن قولداۋ كۇتەمىن!

كىشى دجوردج بۋشتىڭ مىنا سوزدەرىن كەلتىرە كەتەيىن: سىزدەر سينيزم ساياساتىنان شارشاساڭىزدار مەنىڭ كامپانياما قوسىلىڭىزدار.

ءاليا سادىربايەۆا،

قاراعاندى قالاسىنىڭ تۇرعىنى، قوعام قايراتكەرى، «اتامەكەن» ق ر ۇلتتىق كاسىپكەرلەر پالاتاسىنىڭ قاراعاندى وبلىسى بويىنشا ءتوراعاسى، «كۇمىس القا» ماراپاتىمەن ماداقتالعان كوپبالالى انا

اۋدارعان: جازيرا بايدالى