جاقىندا قىتايدا جەرگىلىكتى كومپانيالاردىڭ ءبىرى مەكتەپ وقۋشىلارىنىڭ اراسىندا سۇلۋلىق بايقاۋىنا ىرىكتەۋ وتكىزدى. كەنەتتەن سين سي ەسىمدى قاتىسۋشىنىڭ ۇمىتكەر رەتىندە جەلىگە جاريالاعان سۋرەتى كوپشىلىكتىڭ نازارىن اۋدارتتى، دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساپ.

ەسىمىن «ۇيرەكتىڭ جۇمىرتقاسى» دەپ كورسەتىپ، «وز-وزىمە سەنىمدىمىن» دەگەن جازبامەن №20 قاتىسۋشى بولىپ تىركەلگەن ەكەن. ينتەرنەت قولدانۋشىلارى بويجەتكەننىڭ سۋرەتىن كورىپ، تاڭدانىستارىن جاسىرا المادى. كوپتەگەن جەلى قولدانۋشىلارى قىزعا پىكىر قالدىرىپ، «ونىڭ وزىنە دەگەن سەنىمدىلىگىن قۇرمەتتەيمىن، وعان داۋىس بەرگەن دۇرىس» دەپ جازعان. باسقا ويىنشىلارعا قاراعاندا سين سيگە بەرىلگەن داۋىس سانى ەداۋىر ءوسىپ، ءبىر كۇندە 360 000-عا جەتكەن.

الايدا سۇلۋلىق بايقاۋىن ۇيىمداستىرۋشىلار بۇل قىزدىڭ فوتوسۋرەتەرىنىڭ ۇرلانعاندىعىن انىقتاپ، ونىڭ سۋرەتتەرىن قاتىسۋشى رەتىندە جۇكتەگەن ءوزى ەمەس، دوستارى بولىپ شىقتى. ۇيىمداستىرۋشىلار «ۇيرەكتىڭ جۇمىرتقاسى» دەگەن اتپەن تىركەلگەن قاتىسۋشىنى بايقاۋدان شىعارىپ، سۋرەتتەرىن ءوشىرىپ تاستاعان. الايدا، جەلى قولدانۋشىلارى ۇيىمداستىرۋشىلاردىڭ بۇل ىسىنە نارازىلىق ءبىلدىرىپ، قارسى شىققان. كەيىننەن بايقاۋعا جاۋاپتى ادامدار سين سيگە قايتادان حابارلاسىپ، ءمان-جايدى تۇسىندىرگەننەن سوڭ قىزدىڭ ءوزى بۇل بايقاۋعا قاتىسۋعا كەلىسىم بەرگەن. سين ءسيدىڭ سۋرەتىن جەلىگە قايتادان جۇكتەپ، نولدەن باستاپ داۋىس جيناۋ قاجەت بولعان. تاڭقالارلىعى، قاتىسۋشى ءبىر كۇننىڭ ىشىندە 310 000 داۋىس جيناپ ۇلگەردى.

ناتيجەسىندە، «ۇيرەكتىڭ جۇمىرتقاسى» داۋىس ساناعى بويىنشا العاشقى مەكتەپ وقۋشىلارى اراسىنداعى سۇلۋلىق بايقاۋىنىڭ جەڭىمپاز اتانىپ، جەكە ماراپاتقا يە بولدى. جەلى قولدانۋشىلارى: «بۇل ءادىل جانە اشىق تۇردەگى باسەكەلەستىك بولىپ تابىلادى!» دەپ، سين سيگە قولداۋ كورسەتتى.