انانىڭ كوڭىلى بالادا، بالانىڭ كوڭىلى دالادا. مەملەكەت دەپۋتاتتاردى ويلاپ، ەركەلەتىپ، ايلىعىن كوتەرىپ، قاس-قاباعىنا قاراۋمەن بولدى. ولار بولسا، ەلدى، جەردى ويلاۋدىڭ ورنىنا، تەرەزەگە تەلمىرىپ وتىرا بەردى. (بارىنە قاتىستى ايتىلماعان) بۇل جەردە دەپۋتاتتاردى بالامەن سالىستىرۋدىڭ دا سىرىن وقىرمان تۇسىنگەن بولار... بالانى جەتى جاسقا دەيىن حانداي كۇت، جەتى جاستان كەيىن قۇلشا جۇمسا. مەملەكەت وسىنى ۇستانعانداي. وعان دالەل قوعام بەلسەندىلەرى دەپۋتاتتاردىڭ «ەركەلىكتەرىن» كوتەرە بەرمەي، ولارعا جۇمسالىپ جاتقان شىعىن، حالىقتىڭ قالتاسىنان بەرىلىپ جاتقان قاراجاتتى قىسقارتۋدى ۇسىنىس ەتىپتى.
«حالىق بىرلىگى» قوعامدىق بىرلەستىگىنىڭ جەتەكشىسى، زاڭگەر ماقسات ءىلياس ۇلى دەپۋتاتتاردى قىزمەتتىك كولىك پەن پاتەردەن ايىرۋ جونىندە ۇسىنىس تاستاپتى، دەپ حابارلايدى قامشى اقپاراتتىق اگەنتتىگى. بۇل جونىندە زاڭگەر ءوزىنىڭ فەيسبۋك پاراقشاسىندا جازعان. مازمۇنى تومەندەگىدەي:
«ق ر قوس پالاتالى پارلامەنتىندەگى دەپۋتاتتار سانى – 154. كەيبىر دەرەكتەرگە سۇيەنسەك، قوس پالاتالى پارلامەنتى دەپۋتاتتارىنىڭ شىعىنى جىل سايىن 15 ميلليارد تەڭگەگە دەيىن جەتەدى ەكەن. ياعني مەملەكەت ءبىر دەپۋتاتقا 100 ميلليون تەڭگە جۇمساسا، ءار دەپۋتات ءۇشىن قازىنادا كۇنىنە 380 مىڭ تەڭگە ساقتالعان. پارالمەنت مۇنداي شىعىنعا لايىق پا؟ مەنىڭشە، جوق. بارىمىزگە ءمالىم، دەپۋتاتتار اراسىندا ۇيسىز-كۇيسىز جۇرگەندەر جوق، ءبارىنىڭ جاعدايى جاقسى: پاتەر دەيسىڭ بە، كولىك دەيسىڭ بە، ءبارى بار، اقشالارى دا جەتىپ ارتىلادى».
وسىلاردى نەگىزگە الا وتىرىپ، داعدارىس ۋاقىتىندا دەپۋتاتتاردى قىزمەتتىك كولىك پەن پاتەردەن ايىرۋ جونىندە ۇسىنىس تاستادى.
«سونداي-اق، پرەزيدەنت اكىمشىلىگىنىڭ، بيلىك پەن وبلىس اكىمدىگىنە بولىنەتىن قىزمەتتىك كولىكتەر سانىن ازايتۋدى ۇسىنامىن. قىزمەتتىك كولىكتەر مەن گاراجداردى قامتاماسىز ەتۋ ءۇشىن مەملەكەتتىك قازىنادان قوماقتى سوما كەتەدى» دەيدى ءىلياسوۆ.
قوعام قايراتكەرى سول اقشا بالالاردى تاماقتاندىرۋعا جۇمسالسا دەگەن يگى ويىمەن دە ءبولىسىپ قالدى.
قوعام قايراتكەرىنىڭ مىنا ايتقانىن ەسكەرىپ، ءبىر ماسەلەگە توقتالىپ كەتكەندى ءجون كوردىك. ءساۋىردىڭ باسىندا دەپۋتاتتاردىڭ جالاقىسىن كوتەرۋ جونىندە اقپارات تارالعانى بارىمىزگە ءمالىم. اقپارات تاراتۋشىلاردىڭ كەلتىرگەن دەرەگىنە ساي 1 ناۋرىزدان باستاپ ءماجىلىس دەپۋتاتتارىنىڭ ايلىعى 30 پايىزعا ارتقان. جالپى العاندا، ماجىلىسمەندەردىڭ ورتاشا جالاقىسى بۇعان دەيىن 500 مىڭ تەڭگەنى قۇراعان. ال ءقازىر 50 پايىزعا، ءتىپتى 30 پايىزعا كوتەرىلسە، ەندىگى جالاقىسى قانشا بولاتىنىن ەلەستەتىپ كورىڭىزدەر.
بۇعان دەپۋتاتتاردىڭ توبەسى كوككە جەتىپ، قۋانعان ەدى. ق ر پارلامەنتى ءماجىلىسى ءتوراعاسىنىڭ ورىنباسارى ۆلاديمير بوجكونىڭ پىكىرىنەن وسىنى بايقاۋعا بولادى.
«ساياسي قىزمەتكەرلەر اراسىندا جالاقىسى سوڭعى بوپ وسكەن وسى دەپۋتاتتار، نەگىزى بۇل شەشىم وسىدان 4 جىل بۇرىن قابىلدانىپ قويىلعان ەدى. مينيسترلىكتەر مەن وزگە دە ۆەدومستۆولارداعى جالاقىنى بىرتىندەپ وسىرەمىن دەگەنشە 4 جىل ءوتىپ كەتتى. مىنە، ەندى ءبىزدىڭ كەزەگىمىز كەلدى»، - دەپ ماز-مەيرام بولعان بولاتىن ۆلاديمير بوجكو.
توبەلەرى كوككە جەتكەن دەپۋتاتتار مىنا ۇسىنىستى ەستىگەندە قۋانشىتارى سۋ سەپكەندەي باسىلادى-اۋ. بيلىك تاراپى اتالمىش ۇسىنىستى قابىلداي ما، قابىلداماي ما، بىزگە بەيمالىم، الايدا قاراپايىم حالىق ءۇنسىز قالماي، قولداپ-قولپاشتارى ءسوزسىز.
