اقتوبەدە مەكتەپ وقۋشىسىن وگەي اكەسى زورلاپ، قورلىق كورسەتكەن. 6 كلاسس وقۋشىسى ۇيىنە قايتقىسى كەلمەيتىنىن ايتىپ، اپايىنان كومەك سۇراعان. اناسى باسقا قالاداعى اۋىلىنا كەتكەندە وگەي اكەسى 13 جاستاعى قىزعا ويىنا كەلگەنىن جاسايتىنى بەلگىلى بولدى دەپ حابارلايدى قامشى اقپاراتتىق اگەنتتىگى Nur.kz پورتالىنا سىلەمە جاساپ.

«بۇل وقيعانى ءبىز 3 مامىر كۇنى ەستىدىك. جاعدايدى مەكتەپ قىزمەتكەرلەرى انىقتادى. سوڭعى كۇندەرى بالانىڭ كوڭىل كۇيى بولماي جۇرگەن. جەتەكشىسى وقۋشىمەن سويلەسكەندە بالا ۇيىنە بارعىسى كەلمەيتىنىن ايتقان.

«سوڭعى كەزدەرى پاپام ىشىمدىككە سالىنىپ ءجۇر، ۇيگە بارسام ۇرىسادى» دەگەن. سىنىپ جەتەكشىسى جاعدايدى ماعان باياندادى. مەن بىردەن ۋچاسكەلىك پوليسيانى شاقىردىم. كومەلەتتىك جاسقا تولماعاندارمەن جۇمىس ءبولىمىنىڭ ينسپەكتورلارى كەلدى.

بالا ءبىرىنشى كۇنى «اكەم ىشسە ۇرادى» دەگەننەن باسقا ەشتەڭە ايتقان جوق. ول قورقىپ تۇرعاننان كەيىن ۇيىنە جىبەرمەي، سول كۇنى اپايىنىڭ ۇيىنە قوندى»، - دەيدى سازدى ورتا مەكتەبىنىڭ ديرەكتورى مارات ماحامبەتالييەۆ.

پوليسيا قىزمەتكەرلەرىن ەرتىپ، مەكتەپ ديرەكتورى بالا تۇرعان ۇيگە دە بارعان. اناسى ۇيىندە بولماپتى. قىزدىڭ شەشەسى مۇگەدەك بولىپ تۋىلعان ەكىنشى بالاسىن قىزىلورداعا الىپ كەتكەن. سول جاقتا قۇجاتتارىن رەتتەگەنشە ءبىرىنشى قىزىن وگەي اكەسىمەن قالدىرادى.

كىشكەنتاي قىزبەن جالعىز قالعان وگەي اكەسى ونى ۇرىپ، جىنىستىق قاتىناسقا تارتقان.

«ءبىز العاشىندا بالاعا وگەي اكەنىڭ قول كەتەرگەنى تۋرالى قۇجات جاساپ، قالالىق ءبىلىم بولىمىنە حابارلادىق. كەيىن بالامەن مەكتەپ پسيحولوگى قايتا سويلەسكەندە وقۋشى بارلىق جاعدايدى بايانداپ بەردى.

ياعني، ەر ادام بالاعا قول كوتەرىپ قانا قويماعان، جىنىستىق قاتىناسقا تارتقان. سول جەردە بىردەن بالامەن جۇمىس جاساعان مەكتەپ قىزمەتكەرلەرىن شاقىردىم. پوليسياعا حابار بەردىك.

وگەي اكەسىن تۇرعىلىقتى مەكەن-جايى بويىنشا ىزدەپ بارىپ، سول جەردە قاماۋعا الدى. ءبىز بارعان كەزدە ەر ادام ىشىمدىك ءىشىپ العان»، - دەيدى مەكتەپ ديرەكتورى.

مەكتەپ باسشىسى ءجاسوسپىرىمنىڭ ساباق ۇلگەرىمى جاقسى ەكەنىن ايتتى. سىنىپتا ۇزدىك وقۋشى سانالاتىن ول قوعامدىق جۇمىستارعا دا بەلسەنە ارالاسىپ كەلگەن.

قازىرگى ۋاقىتتا ءزابىر كورگەن وقۋشى دا، ونىڭ اناسى دا مەكتەپ ءمۇعالىمىنىڭ ۇيىنە قونىپ ءجۇر.

وتباسى اقتوبەگە قىزىلوردادان كوشىپ كەلگەن. ايەل ادام ەكىنشى كۇيەۋىمەن ازاماتتىق نەكەدە تۇرىپتى.

قازىرگى ۋاقىتتا وقيعاعا قاتىستى تەرگەۋ شارالارى ءجۇرىپ جاتىر.

وقۋشى قىزعا قاتىستى مەديسينالىق تەكسەرۋلەر جاسالىندى. وگەي اكەسىنىڭ مەكتەپ وقۋشىسىن جىنىستىق قاتىناسقا ماجبۇرلەگەنى ءبىرىنشى رەت بولماۋى مۇمكىن.