عالامشارداعى ادامداردىڭ كوپشىلىگى قولداناتىن بۇل ءادىس ءبىراز ادامنىڭ ءومىرىن ويراندادى. زياندى حيميالىق قىشقىلمەن شابۋىل جاساۋ بۇگىنگى كۇندە كەڭ قولدانىسقا يە، دەپ حابارلايدى قامشى اقپاراتتىق اگەنتتىگى. مۇنداي شابۋىل سالدارىنان ادامنىڭ بەت، دەنە بولىكتەرىندە سول قايعىلى وقيعانىڭ ءىزى ماڭگىلىككە قالىپ قويىپ جاتادى.
- كەتي پايپەر
2008 جىلى اتاقتى سانبيكە كەتي پايپەرگە كۇكىرت قىشقىلىمەن شابۋىل جاسالعان بولاتىن. الىستاعى وزگە بىرەۋ ەمەس ءوزىنىڭ 35 جاستاعى دەنني لينچ ەسىمدى جىگىتىنىڭ ارەكەتى سالدارىنان كورىكتى قىزدىڭ كوز تارتار كەلبەتىنىڭ ءبىراز بولىگىن كۇيىك شالادى. كۇيىك ءۇشىنشى دارەجەلى بولىپ، جاس قىزدىڭ قاس، سول قۇلاعىنىڭ جارتىسى، مۇرنىنىڭ ءبىراز بولىگى كۇيىپ كەتەدى. كوز تۇسى، ءتىل جانە وڭەش، قول مەن مويىن تۇستارى زيان شەگەدى. كەتي سول كۇنى اۋرۋحاناعا جەتكىزىلەدى. دارىگەرلەردىڭ ايتۋى بويىنشا، ولار بۇرىن سوڭدى مۇنداي اۋىر جاراقاتتى كەزىكتىرمەگەن. سوڭعى ءۇش جىلدا كەتي ىشكى اعزالارىنا 80-گە تارتا وتا جاساتقان. ونىڭ ءبارى تەك قانا قالىپتى تاماقتانۋ ءۇشىن ەكەنى ءمالىم بولىپ وتىر. پلاستيكالىق وتا جاساۋشىلار قولدان كەلمەس ىسكە ۇمتىلىپ، سانبيكەنىڭ بەت-بەينەسىن قالپىنا كەلتىرۋ ءۇشىن بىرنەشە كۇردەلى وتا جاساعان. بۇگىندە كەتيدىڭ سۇلۋلىعى وزىنە ورالعان. ال بۇرىنعى عاشىعى بولسا بريتانيانىڭ ءبىر تۇرمەسىندە ءومىر بويىنا سوتتالىپ، قاماۋدا وتىر.
دجەسسيكا ناتارو
يتاليالىق سانبيكە جانە «ميسس يتاليا - 2007» بايقاۋىنىڭ اقتىق مارەسىندە ب ا ق سىناعان دجەسسيكا ناتاروندى زياندى قىشقىلمەن بۇرىنعى سۇيىكتىسى كۇيدىرگەن. دجەسسيكا كەزدەسىپ جۇرگەن جىگىتىمەن بولاشاعىنىڭ جوق ەكەنىن سەزىپ، ارا قاتىناسىن ۇزبەك بولعان. جىگىتىنىڭ مۇنداي قاتىگەزىككە باراتىنىن ويلاماعانى انىق. ورىن العان قايعىلى جاعدايدىڭ ناتيجەسىندە دجەسسيكانىڭ بەتىن كۇيىك شالىپ، كوز جانە دەنەسى زاقىمدانعان. بۇگىندە بويجەتكەن اۋرۋىن باساتىن دارى-دارمەك ءۇشىن اي سايىن 800 ەۆرو جۇمساپ وتىر. پاستيكالىق وتانى تەك ءبىر جىلدان سوڭ عانا جاساۋعا بولادى دەگەن دەرەكتەر دە بار. جاقىن ارادا دجەسسيكا ءبىر تەلەباعدارلامانىڭ قوناعى بولىپ، ءبىرىنشى رەت ءوزىنىڭ بەتپەردەسىن شەشتى. ءوزىنىڭ بۇرىنعى قاتىگەز جىگىتىنە ارناپ : «ماعان نە ىستەگەنىڭدى قارا. بۇل ماحاببات ەمەس» دەپ ايتقان بولاتىن. سوعان قاراعاندا شابۋىل جاساعان جىگىت بوستاندىقتا بولۋى كەرەك.
دانا ۆۋلين
2012 جىلى اۆستراليالىق دانا ۆۋلين ءوزىنىڭ ءبىر تانىسىنىڭ قىزعانشاق ايەلىنىڭ شابۋىلىنا تاپ بولادى. دانا ءۆۋليندى كۇيەۋىنە قاستاندىق جاسادىعا بالاعان. قىزعانىشتىڭ سالدارىنان دانا ۆۋلينگە ەتيل ءسپيرتىن قۇيىپ، ورتەپ جىبەرگەن. قايعىلى جاعدايدىڭ ناتيجەسىندە دانانى ءۇشىنشى دارەجەلى كۇيىك شالعان. ءبىراز ۋاقىت كومادا جاتقانى بەلگىلى بولىپ وتىر. اۆستراليا تۇرعىنىنىڭ ايتۋى بويىنشا، ول ەكى جىل بويى ارنايى بەتپەردەمەن جۇرگەن. اينانىڭ جانىنان وتۋگە جۇرەكسىنگەن. ونىڭ باستى سەبەبى، جۇزىمە ادام قارايتىنداي بولماعاندىقتان دەيدى.
ەلەونورا كوندراتيۋك
رەسەي تۇرعىنى ەلەونورا كوندراتيۋك «كراسا سوچي» جانە «ميسس وچاروۆانيە» بايقاۋلارىنىڭ جەڭىمپازى. ەلەونورا كوندراتيۋك 1999 جىلى ءبىر جىگىتتىڭ بەتىن قايتارعان. بىرنەشە جىل وتكەن سوڭ سول جىگىت ەلەونورانىڭ سوڭىنا قايتا تۇسەدى. ۇيىنە قايتىپ كەلە جاتقان تۇستا، ارتىنان جاسىرىنىپ كەلىپ كۇكىرت قىشقىلىمەن كۇيدىرگەن. قىشقىل قىزدىڭ كوز، تىنىش جولدارىن، بەت تەرىسىن جانە مويىن مەن ارقا تۇستارىن كۇيدىرگەن. اۋىر حالدە اۋرۋحاناعا جەتكىزىلگەن ەلەونورا 300-دەن استام وتانى وتكەرەدى. جاسالعان قانشاما وتانىڭ اسەرى بولماعان. بۇگىندە بۇرىنعى سانبيكە ءوزى سياقتى كۇيىكتەن زيان شەككەن ورتادا ءجيى كورىنۋدە.
لاكسمي ساا
ءۇندى قىزى لاكسمي ساا ۇسىنىسىن قابىل الماعان جىگىتتىڭ شابۋىلىنا تاپ بولادى. وكپە-رەنىشكە تولى عاشىق جىگىت لاكسميدىڭ جۇرەك تۇسىن زياندى قىشقىلمەن كۇيدىرەدى. ول كەزدە لاكسميدىڭ جاسى نەبارى 15-تە بولاتىن. كۇيىك شالعانىنا قاراماستان ءسان الەمىندە ءوز باعىن سىناپ، قۇقىعىن قورعاي بىلگەن. سۇلۋلىعىنا سىزات سالىنعانىنا قاراماستان، بيىل لاكسمي Viva N Diva ماركالى كيىم كورسەتىلىمىنىڭ باستى بەينەسى اتاندى.
رەشما كۋشەرا
رەشما كۋشەرا- 18 جاسىندا قىشقىلدان جاپا شەككەن ءۇندى قىزى. ءوزىنىڭ تۋعان اعاسىنىڭ ىس-ارەكەتىنىڭ قۇربانى بولعان. رەشما كۇيىكتەن اۋىر جاراقات الىپ، كوزىنەن ايىرىلعان. سوعان قاراماستان ءتۇرلى ۆيدەولاردى الەۋمەتتىك جەلىلەرگە جۇكتەۋدە. شابۋىلعا تاپ بولعان قۇرباندار مۇگەدەك بولىپ قالمايدى، ولاردىڭ دا ومىرمەن كۇرەسۋگە قاقىسى بار دەيدى ، رەشما. بۇگىندە ءتۇرلى ءسان كورسەتىلىمدەرىنە قاتىسىپ، ءۇندىستانداعى قۇرباندارعا دەگەن كوزقاراستى وزگەرتكىسى كەلەتىنىن مالىمدەدى.
شيرين موحومادي
شيرين موحامادي كۇيەۋ جىگىتىنىڭ شابۋىلىنا ۇشىراعان كەزدە 18 جاستا بولعان. جاس بويجەتكەن قىشقىل سالدارىنان وڭ كوزى مەن قۇلاعىنان ايىرىلعان. اۋىز بولىگى زاقىمدانىپ، دەنەسىنىڭ ءبىراز بولىگىن كۇيىك شالعان. بۇگىندە شيرين بىرنەشە كۇردەلى وتانىڭ باسىنان وتكەرگەن. دەسەك تە، بۇرىنعى قالپىنا كەلە قويعان جوق.
دايىنداعان: ايگەرىم تاۋباي
پىكىر قالدىرۋ