بۇگىن قازاقستان پرەزيدەنتى نۇرسۇلتان نازاربايەۆ ەكىنشى دۇنيەجۇزىلىك سوعىسىنداعى جەڭىستىڭ 72 جىلدىعىنا وراي استاناداعى "وتان قورعاۋشىلار" مونۋمەنتىنە گۇل شوقتارىن قويدى، دەپ حابارلايدى قامشى اقپاراتتىق اگەنتتىگى.

«ءبىز - جەڭىسكە جەتكەن بابالاردىڭ ۇرپاعىمىز. سول بابالارىمىزدىڭ، اكەلەرىمىزدىڭ، اتالارىمىزدىڭ ارقاسىندا، مىنەكەي، 70 جىل بويى بەيبىت ءومىر ءسۇرىپ كەلە جاتىرمىز. ونى ەش ۋاقىت ۇمىتپاۋ كەرەك. ەگەر ءبىزدىڭ بابالارىمىز سول سوعىستا جەڭىسكە جەتپەسە، ءحالىمىز قالاي بولار ەدى؟ قازاقستان بۇگىنگىدەي بولار ما ەدى، بولماس پا ەدى؟ مىناۋ اسپانىمىز وسىنداي اشىق بولار ما ەدى؟ مىناۋ جاستارىمىز جارقىراپ كۇلەر مە ەدى، كۇلمەس پە ەدى؟ مۇنىڭ بارلىعى وسى ارداگەرلەرىمىزدىڭ جەڭىسى»، - دەدى ەلباسى ءوز سوزىندە.

پرەزيدەنت جانە الاڭعا جينالعان قاۋىم ەكىنشى دۇنيەجۇزىلىك سوعىستا قازا بولعان جاۋىنگەر قازاقستاندىقتاردى ءبىر ءسات ۇنسىزدىكپەن ەسكە الدى.  رەسمي راسىمنەن كەيىن ق ر رەسپۋبليكالىق ۇرمەلى اسپاپتار وركەستەرى ەلىمىزدىڭ گيمنىن ورىندادى. وسىدان كەيىن قۇرمەتتى قاراۋىل روتاسى ق ر قارۋلى كۇشتەرىنىڭ جوعارعى باس قولباسشىسىنىڭ جانە ۇلى وتان سوعىسى ارداگەرلەرىنىڭ الدىندا سالتاناتپەن ساپ تۇزەپ ءجۇرىپ ءوتتى.

گۇل شوقتارىن قويۋ راسىمىنە ەكىنشى دۇنيەجۇزىلىك سوعىس ارداگەرلەرى، ق ر پرەزيدەنتى اكىمشىلىگىنىڭ، ق ر ۇكىمەتىنىڭ، ق ر پارلامەنتىنىڭ، ورتالىق مەملەكەتتىك ورگاندارىنىڭ، ديپلوماتيالىق كورپۋستاردىڭ وكىلدەرى جانە قالا جۇرتشىلىعى قاتىستى.

سوڭعى دەرەكتەر بويىنشا، قازاقستاننان مايدانعا اتتانعان 1 ملن 200 مىڭ جاۋىنگەردىڭ 600 مىڭى ۇيلەرىنە قايتىپ ورالمادى. جالپى، بۇرىنعى كەڭەس وداعىنىڭ 27 ميلليونعا جۋىق ادامىن جالماعان قاندى قىرعىندا ەلىمىزدەن اتتانعان 500-دەن استام جاۋىنگەر 1934 جىلى بەكىتىلگەن ەڭ جوعارعى كەڭەس وداعىنىڭ باتىرى اتانعان بولاتىن، ونىڭ 100-دەن استامى - قازاقتار. سونىمەن قاتار 142 قازاقستاندىق داڭق وردەنىنىڭ تولىق يەگەرى اتانسا، كەڭەس وداعىنىڭ وردەن، مەدالدارىمەن ماراپاتتالعان قازاقستاندىقتار سانى 100 مىڭعا جۋىقتايدى. سوعىس ارداگەرلەرىنىڭ قاتارى جىل وتكەن سايىن سيرەپ بارادى. بۇگىندە قازاقستاندا ۇلى وتان سوعىسىنىڭ 2 مىڭعا جۋىق ارداگەرى تۇرادى.

شولۋشى: گۇلىم جاقان