10 مامىر كۇنى اقتوبە وبلىسىنىندا ءوز بالاسىن 60 مىڭ تەڭگەگە ساتقان 33 جاستاعى جاننا اقالاسوۆاعا سوت ۇكىم شىعاردى، دەپ حابارلايدى قامشى اقپاراتتىق اگەنتتىگى informburo.kz-كە سىلتەمە جاساپ.

سوت شەشىمى بويىنشا ايىپتالۋشىنىڭ مۇلكىن تاركىلەپ،  7 جىلعا باس بوستاندىعىنان ايىرۋ جازاسى تاعايىندالدى.

ج.اقالاسوۆامەن بىرگە بالا ساتۋ ىسىنە قاتىسى بار  داناگۇل وتەشوۆا دا 7 جىلعا باس بوستاندىعىنان ايىرۋ جازاسى تاعايىندالعان بولاتىن. الايدا ايىپتالۋشىنىڭ بالالارىنىڭ جاسىن ەسكەرە كەلە 5 جىلعا تەمىر توردا وتىرۋ جايىندا شەشىم قابىلداندى.

ءسابيدى ساتىپ الماق بولعان 56 جاستاعى دينا دوساقوۆاعا شارتتى تۇردە 7 جىل بەرىلىپ وتىر. ءىس اياقتالعانشا ءوزىنىڭ مەكەن-جايىن وزگەرتپەۋگە سوت شەشىم قابىلدادى.

ەستەرىڭىزگە سالا كەتسەك، جاننا اقالاسوۆا «كامەلەتكە تولماعاندار ساۋداسى» بابى بويىنشا ايىپتالعانى جايلى حابارلانعان بولاتىن . ءىس ماتەريالدارىنا سۇيەنسەك، 32 جاستاعى جاننا اقالاسوۆا بۇرىن تۇرمىس قۇرماعان. ەكى بالاسى بار. ءبىرىنشىسىن 2009 جىلى دۇنيەگە اكەلگەن. ونى سابيلەر ۇيىنە تاپسىرعان. ال ەكىنشى ۇلىن 2017 جىلدىڭ 16 قاڭتارى كۇنى بوساندى. پەرزەنتحانادا جاتقان كەزدە ول دينا دوساقوۆادان حات الىپ تۇرعان. ول پەرزەنتحانادان 18 قاڭتار كۇنى شىعىپ، سول جەرگە كەلىپ تۇرعان دينا دوساقوۆاعا بالانى ۇستاتادى. كەشكىلىك اقالاسوۆاعا بالادان باس تارتۋ تۋرالى قولحات جازىپ بەرىپ، 60 مىڭ تەڭگە كولەمىندە اقشا العان بولاتىن. 

شولۋشى: ايگەرىم تاۋباي