اقتوبە وبلىسىندا سۋ تاسقىنىنان زارداپ شەگىپ، بيلىككە ۇندەۋ ايتقان وقۋشى قىزدىڭ كورشىلەرى ولاردىڭ ءۇيىن سۋ باسپاعانىن مالىمدەپ وتىر. ءاتى-جونىن اتاعىسى كەلمەگەن ايەل ينتەرنەتتە ۆيدەوسى تارالىپ، كوپتى ەلجىرەتكەن قىز بەن ونىڭ شەشەسىن باسقا بىرەۋدىڭ سۋ العان ءۇيىنىڭ فونىندا ۆيدەو ءتۇسىرىپ، قولدانىپ كەتتى دەگەندى ايتتى، - دەپ حابارلايدى قامشى اقپاراتتىق اگەنتتىگى Tengrinews.kz پورتالىنا سىلتەمە جاساپ.

ال قىزعا وسى ۆيدەو قازنەتتە تارالعاننان كەيىن بيزنەسمەندەردىڭ ءۇش بولمەلى پاتەر سىيلاعانى بەلگىلى.  ەشىموۆتەر وتباسىنىڭ كورشىسى ب ا ق وكىلدەرىنە وقۋشى قىز جىلاپ تۇرعان ۆيدەودا تالعات لەپەسوۆتەر وتباسىنىڭ سۋ العان ءۇيى ەكەنىن حابارلادى. 

"ولاردىڭ الەۋمەتتىك جەلىلەردە تاراتقان ۆيدەوسىندا كورسەتىلگەن ءۇيدىڭ قۇلاعانى راس، ءبىراق ول ولاردىڭ ءۇيى ەمەس، ولاردىڭ ءۇيى ساۋ تۇر، ءبىراق سوندا دا ولار تالعات لەپەسوۆتەردىڭ قۇلاعان ءۇيىنىڭ الدىندا ۆيدەو تۇسىرگەن"، - دەدى ماحاببات ەشىموۆانىڭ كورشىسى. ايەلدىڭ ب ا ق وكىلدەرىنە بەرگەن سۇحباتى Instagram جەلىسىنە جۇكتەلىپ ۇلگەردى. قازىرگى ۋاقىتتا قازنەتتە وسى ماسەلەگە قاتىستى داۋ شىقتى. 

وسى داۋعا قاتىستى قىزدىڭ اناسى تۇرعانگۇل ەشىموۆا پىكىر ءبىلدىردى. 

"ءبىز بۇل تۋرالى بىلەمىز، كورشىلەردىڭ وسىنداي ايىپ تاعىپ وتىرعانى بىزگە بەلگىلى، بۇل جالعان. 14 ساۋىردە ءبىزدىڭ ءۇيدى سۋ شايىپ كەتتى، تۇرعىنداردىڭ ەشقايسىسىنىڭ ءۇيى ساۋ بولمادى. بارلىعىنىڭ ءۇيىن سۋ شايىپ كەتتى. مەنىڭ كۇيەۋىم جۇرەك تالماسىنا ۇشىراپ، ءتىپتى سويلەي دە الماي قالدى، ەندى ارى قاراي قالاي ءومىر سۇرەمىز؟ ول اۋرۋحانادا بولعاندا ءبىزدى مەكتەپكە ەۆاكۋاسيالادى. سوسىن ءبىز پاتەردە تۇرىپ كەلدىك. جۋرناليستەر سيۋجەت ءتۇسىرىپ جاتقاندا سۋ العان ۇيلەردىڭ تۇرعىندارىنا سۇراق قويدى. قىزىم ماحاببات سول كەزدە مەنىڭ الدىما شىعىپ الىپ، وتە قاتتى اشۋلانىپ، سويلەپ تاستادى. سول كەزدە ول اكەسىن قاتتى ۋايىمدادى، ءۇيدى دە ۋايىمدادى، ءسويتىپ، جىلاعان بولاتىن"، - دەدى شەشەسى.

ايەل ينتەرنەتتە تارالعان ۆيدەونى بوتەن ادامداردىڭ تۇسىرگەنىن ايتىپ وتىر. ماحابباتتىڭ وتباسى روليكتىڭ بۇلايشا تارالىپ كەتەتىنىن بىلمەگەن ەكەن.

"ول ءبىزدىڭ ءۇيدى سۋ العانىن ايتتى، بۇل راس. ۆيدەودا قاي ءۇيدىڭ تۇرعانىندا نە بايلانىسى بار؟ قىزىم ارتىمىزدا تۇرعان ءۇيدى ايتقان جوق. سوسىن بيزنەسمەن قايرات قۇدايبەرگەن كەلىپ، پاتەر سىيلادى. وسىدان كەيىن ادامدار بىزدەن وسى جاعدايىمىزدى قىزعانا باستادى. كورشىلەر وسى ۆيدەونى جازىپ، وتىرىك ايتىپ جاتىر دەپ مالىمدەدى"، - دەپ نارازىلىعىن ءبىلدىردى ەشىموۆا.

قىزدىڭ اناسىنىڭ ايتۋىنشا، ماحابباتتى مەكتەپتەگىلەر وتىرىكشى دەپ اتايدى. وزىنە تىم كوپ ادامنىڭ نازارى اۋعاندىقتان، قىزى كوپ جىلاپ ءجۇر ەكەن. 

"كورشىلەرىمىز مەملەكەتتەن ءۇي الادى، ءبىز المايمىز. ەندى نەگە بۇلاي جاساپ جاتىر؟ مەن ەندى پروكۋراتۋراعا جانە سوتقا وسى ايەلدىڭ بىزگە جالا جابۋى ءىسى بويىنشا ارىز تۇسىرەمىن، ەلدىڭ كوزىنشە ءبىزدى الاياق قىلىپ كورسەتتى"، - دەيدى قىزدىڭ اناسى تۇرعانگۇل ەشىموۆا.

وسى وقيعاعا قاتىستى ءوز كەزەگىندە اقتوبە اكىمىنىڭ ورىنباسارى رۋزيا ايدانوۆا پىكىر ءبىلدىردى. "ءبىز لەپەسوۆتەر وتباسىنا 2 بولمەلى پاتەردى بەردىك، ولار سوڭىندا وسى ءۇيدى ساتىپ الا الادى. ونىڭ ءتورت بالاسى بار. ءبىراق ءبىز ءۇش ادامدى عانا كوردىك، ءوزى، كۇيەۋى جانە مااحابباتپەن بىرگە وقيتىن بالاسى. ءبىراق لەپەسوۆ قىزدى ءۇيىن پايدالانىپ كەتتى دەپ داۋلاسىپ جاتىر. سەبەبى سول ءۇيدىڭ الدىندا ۆيدەو تۇسىرىلگەن. ءبىراق ول قىزعا ءۇيدى مەملەكەت بەرگەن جوق قوي، بيزنەسمەن سىيلادى. بۇل اركىمنىڭ ءوز قالاۋى. اركىم نەنى كىمگە سىيلايتىنىن ءوزى بىلەدى. ال وسى ايىپتاۋلارعا كەلەر بولساق، بۇل وتباسىلاردىڭ اراسىنداعى ءوزارا داۋ"، - دەپ مالىمدەدى شەنەۋنىك.

ايتا كەتەيىك، وسىعان دەيىن اقتوبەدە سۋ تاسقىنىنان زارداپ شەككەن 10 جاستاعى قىز بيلىككە ۇندەۋ ايتقان بولاتىن. ەشىموۆتەر وتباسى سۋ تاسقىنىنان باسپاناسىنان ايىرىلعان ەدى. شەشەسى تۇرعانگۇل ەشىموۆانىڭ ايتۋىنشا، كۇيەۋىنىڭ جۇرەگى ءالسىز جانە ول ءۇيىنىڭ قيراپ قالعانىن ءالى كورمەپتى. باسىلىمنىڭ مالىمەتىنشە، ايەلدىڭ كەنجە قىزى ماحاببات № 36 مەكتەبىنىڭ ءتورتىنشى سىنىپ وقۋشىسى ەكەن. ول مەكتەپ فورماسىنان، وقۋلىقتارىنان دا ايىرىلىپ، تابيعي اپاتتان ەسەڭگىرەپ قالعان. 

كەيىن الماتىلىق كاسىپكەر قايرات قۇدايبەرگەن ءاتى-جونىن اتاعىسى كەلمەگەن بيزنەسمەنمەن بىرگە سۋ تاسقىنىنان زارداپ شەككەن اقتوبەلىك 10 جاستاعى قىزعا باسپانا سىيلاماقشى بولعان. الايدا وسى باسپانانى سالۋدا ولار قيىندىقتارعا تاپ بولدى. سىيلاناتىن ءۇي دە سۋ تاسقىنى بولۋى مۇمكىن دەگەن ايماققا جاتقىزىلدى. الايدا بيزنەسمەن 10 جاستاعى ماحابباتقا كوپپاتەرلى ۇيدەن ءۇش بولمەلى پاتەر سىيلادى.