قازاقستاننىڭ حالىقارالىق قاتىناستار جونىندەگى كەڭەسىنىڭ قۇرىلتاي جينالىسىندا پارلامەنت سەناتىنىڭ ءتوراعاسى قاسىم-جومارت توقايەۆ وسى بىرلەستىكتىڭ قۇرمەتتى ءتوراعاسى بولىپ سايلاندى دەپ حابارلايدى قامشى اقپاراتتىق اگەنتتىگى ق ر پارلامەنتى سەناتىنىڭ باسپا ءسوز قىزمەتىنە سىلتەمە جاساپ.

كەڭەس حالىقارالىق قاتىناستار سالاسىنداعى وتاندىق ساراپشىلاردى بىرىكتىرۋ جانە پرەزيدەنت نۇرسۇلتان نازاربايەۆتىڭ ماڭىزدى باستامالارىن ىلگەرىلەتۋ، سونداي-اق جاھاندىق تۇرعىداعى كۇن تارتىبىندە تۇرعان ەڭ وزەكتى ماسەلەلەردى تالقىلاۋ جانە ۇسىنىستار ازىرلەۋ ءۇشىن قۇرىلدى.

قاسىم-جومارت توقايەۆ ءوزىنىڭ سوزىندە «الەم دامۋىنداعى اعىمداردى جان-جاقتى ءارى تەرەڭ تالداۋ نەگىزىندە كەڭەس قازاقستاننىڭ سىرتقى ساياساتىنداعى نەگىزگى ماسەلەلەر بويىنشا يننوۆاسيالىق قادامدار ازىرلەيتىن الاڭ بولۋى ءتيىس»، دەپ اتاپ وتكەن بولاتىن.

وتىرىس بارىسىندا قۇرىلعان ورگاننىڭ 2017 جىلى قىزمەتىنىڭ نەگىزگى باعىتتارى بەلگىلەندى. شەتەلدىك ارىپتەستەردىڭ قاتىسۋىمەن ساراپشىلار فورۋمىن وتكىزۋ، زەرتتەۋ گرانتتارى مەن ستيپەنديالار تاعايىنداۋ، سونداي-اق جاس ساراپشىلارعا ارنالعان جازعى مەكتەپ ۇيىمداستىرۋ جوسپاردا تۇر.

ساياساتتانۋشى ەرلان كارين كەڭەستىڭ ءتوراعاسى بولدى. سىرتقى ىستەر ءمينيسترى قايرات ءابدىراحمانوۆ، پارلامەنت ءماجىلىسى حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ماۋلەن اشىمبايەۆ، وتاندىق جەتەكشى تالداۋ ورتالىقتارىنىڭ باسشىلارى كەڭەس ءتورالقاسىنىڭ قۇرامىنا ەندى.
_