نەمىستەر ءبىزدىڭ ەلدە وتەتىن ەحرو قوناقتارىن «ەلدەن ەرەك قايران قالدىرۋ» ءۇشىن  قاۋىرت قامدانىپ جاتىر، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ.

بۇل تۋرالى وسى ەلدىڭ پاۆيلونىن تانىستىرۋ كەزىندە فەدەراتيۆتىك رەسپۋبليكانىڭ قازاقستانداعى ەلشىسى ءمالىم ەتتى. رولف مافاەلدىڭ ايتۋىنشا، ولاردىڭ كورمە الاڭى كولەمى جاعىنان ەڭ ۇلكەن پاۆيلونداردىڭ ءبىرى بولماق. اۋقىمدى نىسان بىرنەشە الاڭقايعا بولىنگەن. ماسەلەن، ءبىرىنشى زالدا الەم كارتاسى كوپشىلىك نازارىنا ۇسىنىلادى. بۇدان بولەك، ۇيىمداستىرۋشىلار قوناقتارعا ارنايى ەلەكتروندى كىلت تاراتپاق. سول ارقىلى كەز كەلگەن ەكسپونات تۋرالى مالىمەت الۋعا مۇمكىندىك بار. سونداي-اق پاۆيلوننىڭ ءبىر بولىگىندە دۇكەندەر اشىلادى. وندا كەلۋشىلەرگە نەمىستىڭ ۇلتتىق تاعامدارى ۇسىنىلادى. ەستەلىك رەتىندە ساتىلاتىن كادەسىيلار دا كوپ بولماق.

اندرەاس حوربەلت، كرەاتيۆتى ديرەكتور: - گەرمانيا ەحرو الاڭىنداعى ەڭ ۇلكەن پاۆيلوننىڭ بىرىنە يە. سوندىقتان نىساندى بارىنشا تارتىمدى ءارى كوپكە پايدالى ەتىپ دايىنداۋعا تىرىسىپ جاتىرمىز. ويتكەنى «بولاشاقتىڭ ەنەرگياسى» تاقىرىبى ءبىزدىڭ ەل ءۇشىن دە ماڭىزدى. گەرمانيا سوڭعى 20 جىلدا ەنەرگوتيىمدىلىك، قورشاعان ورتانى قورعاۋ سالاسىنداعى كۇردەلى ماسەلەلەردىڭ كۇرمەۋىن شەشۋگە اتسالىسىپ كەلەدى. استانادا وتەتىن اۋقىمدى شاراعا ايرىقشا ىنتا-ىقىلاس ءبىلدىرۋىمىزدىڭ ءبىر سەبەبى وسى.

شولۋشى: ايگەرىم تاۋباي