الماتى اكىمى باۋىرجان بايبەك ناۋرىزباي اۋدانىن دامىتۋ بويىنشا كوشپەلى جيىن وتكىزدى، مۇندا جاقىن ارادا جاڭا اكىمشىلىك ورتالىقتىڭ، 1200 ورىندى مەكتەپتىڭ، كۇنىنە 500 جانە 200 ادام قاتىنايتىن ەكى ەمحانانىڭ قۇرىلىس جۇمىستارى اياقتالاتىن بولادى، دەپ حابارلايدى قامشى اقپاراتتىق اگەنتتىگى قالا اكىمدىگىنىڭ باسپا ءسوز قىزمەتىنە سىلتەمە جاساپ.

ناۋرىزباي اۋدانىنىڭ اكىمى سايران سايفەدەنوۆ بيىلعى جىلى قالقامان ىقشام اۋدانىندا جاڭا جولدار سالۋ جوسپارلانعانىن، ۇزىندىعى 17 كم بولاتىن 32 كوشەنىڭ جاڭارتىلاتىنىن، ۇزىندىعى 26 كم بولاتىن 22 كوشەگە ورتاشا جوندەۋ جۇمىستارى جۇرگىزىلەتىنىن ايتتى.

بۇلاردان وزگە، جاندوسوۆ كوشەسى كۇردەلى جوندەۋدەن وتەدى، سايىن كوشەسىنىڭ قيىلىسىنان تاۋسامالى پوسەلكەسىنە دەيىن جالپى ۇزىندىعى 2،08 كم بولاتىن جول سالىنادى. جوندەۋ جۇمىستارى بارىسىندا جولداردىڭ كولىك قوزعالاتىن بولىكتەرى ءتورت جولاققا دەيىن كەڭەيەدى، قارعالى وزەنىنىڭ بويىنداعى كوپىر قايتا جاسالادى، ۆەلوجولدار مەن تروتۋارلار سالىنادى. قالا باسشىسىنا كوشەلەردى كۇردەلى جوندەۋدەن وتكىزۋ جۇمىستارىن مەرزىمىنەن بۇرىن، قىركۇيەك ايىندا اياقتاۋدى جوسپارلانعانى ايتىلدى.

ءوزىنىڭ جۇمىس ساپارى بارىسىندا قالا اكىمى اقجار ىقشام اۋدانىنداعى ىسكە قوسىلماعان «ەدەلۆەيس» بالا باقشاسىندا بولدى. نىساننىڭ جالپى الاڭى 1805 كۆ.مەتر، 2007 - 2017 جىلدارى مەملەكەتتىك مۇلىك جانە جەكەشەلەندىرۋ كوميتەتى بالا باقشانى «سەنتر ۆيد» ج ش س سەنىمدى باسقارۋعا بەرگەن. الايدا، بالا باقشا كۇنى بۇگىنگە دەيىن بوس تۇرعان. قالا باسشىسى بالا باقشانى اشۋ ءۇشىن ءتيىستى شارالار قابىلداۋدى تاپسىردى. اتاپ وتەرلىك جايت، ناۋرىزباي اۋدانىندا 3 جاستان 6 جاستاعى 668 بالاعا مەكتەپ جاسىنا دەيىنگى بالالار مەكەمەلەرىندە ورىن جەتپەيدى، ال 1 جاستان 6 جاسقا دەيىنگى 1419 بالدىرعان بالا باقشاعا ءزارۋ.

شولۋشى: گۇلىم جاقان