انا ماحابباتىنىڭ بولاشاق ۇرپاعى ءۇشىن ماڭىزدىلىعىن ەسەپتەپ ولشەۋ مۇمكىن ەمەس. جابايى تابيعاتتا دا ەرەسەكتەر قاراۋىنسىز، ماحابباتىنسىز قالعان جانۋارلار بالالارى ءاردايىم قۇردىمعا كەتەدى.
سول سياقتى بىزدە دە، ادامدار اراسىندا، جەتىمدەردىڭ تىرشىلىگى وتە اۋىر. تەوريا جۇزىندە اتا-انانىڭ قاراۋىنسىز قالعان بالالاردى ءتۇرلى قامقورلىق ۇيلەرى باعىپ-قاعادى. ءبىراق ءدال وسى بالالار ءۇيى مەن باسپانالار قانداي سۇمدىقتاردى جاسىراتىنىن ءبىرىمىز بىلسەك، ەندى ءبىرىمىز بىلمەي جاتامىز. قامشى اقپاراتتىق اگەنتتىگى وسىنداي باسپانالاردىڭ بىرىندەگى جاعدايدىڭ شىنايى كورىنىسىن كورسەتەتىن كادرلاردى ۇسىنادى.
بۇل بەلورۋسسياداعى بالالار ءۇيى. ازىپ-توزعان بالالار دەنەسىن كورگەندە ادامدار جاعاسىن ۇستادى. كورەرمەن كوز نە ويلارىن دا بىلمەي قالدى.
كەيبىرەۋلەر بۇل بالالاردى نەمىس لاگەرىنىڭ تۇتقىندارى مەن قۇرباندارىنا تەڭەۋدە. شىن مانىندە سۋرەتتەردى ءبىرىنشى رەت كورگەن ادام سولاي ويلاپ قالاتىن سياقتى.
جەرگىلىكتى دارىگەرلەر بۇل بالالارعا بارىن جاساۋدا. وسى سۋرەتتەردى تۇسىرگەن رەپورتەر بۇل بالالار باسپاناسىنا جاسىرىنىپ بارماعان، كەرىسىنشە باسپانا قىزمەتكەرلەرىنىڭ وزدەرى بۇل كورىنىستى كوپكە جاريا ەتكىلەرى كەلگەن.
بۇل بالالار ۇيىندە ءتۇرلى پسيحوفيزيكالىق اۋرۋلارعا شالدىققان مۇگەدەك بالالار تۇرادى. دەنساۋلىعىندا پروبلەماسى جوق بالا مۇلدەم جوق، ءبارى دە اۋرۋ-سىرقاۋ. كوپشىلىگى دسپ، سانانىڭ جەتىلمەۋى سياقتى تۋا بىتكەن اۋرۋلارعا شالدىققان.
مۇنداي بالالاردىڭ اتا-انالارى بالا تۋىلعاننان كەيىن ولاردان بىردەن باس تارتادى. بۇل اۋرۋ بالالاردىڭ كوپشىلىگى جۇرە المايدى. وزدەرىنىڭ قىسقا عۇمىرلارىن جاتۋمەن وتكىزەدى. بالالار ءۇيىنىڭ قىزمەتكەرلەرى ءوز جۇمىستارىن دۇرىس اتقارمايدى دەپ ايتا المايمىز. بارىنشا تىرىسىپ باعىپ-قاعادى، الايدا بۇل باسپاناداعى باستى پروبلەما- بالالارعا ارنالعان ارنايى استىڭ جوقتىعى.
ساۋ بالانىڭ كۇندەلىكتى جەي الاتىن تاعامى بۇل بالالارعا جارامايدى. سەبەبى ولار كۇنى بويى تەك جاتاتىن بولعان سوڭ تاماق قورىتىلماي قالادى. ارنايى مامانداندىرىلعان بالالار ۇيلەرىنە قۇنارلىلىعى جوعارى ەمدىك تاعامدار قاجەت. ءار بالانىڭ ۇستانۋعا ءتيىستى دياتاسى بار. ونى ولشەيتىن ارنايى قۇرال دا قاجەت. ارينە، مۇنىڭ بارىنە قاراجاي جوق.
بالالار ءۇيىنىڭ قىزمەتكەرلەرى كومەك سۇراپ، ب ا ق وكىلدەرىنە جۇگىنگەن. وسى ورايدا شەنەۋنىكتەر بالالاردى ارنايى اسپەن قامتاماسىز ەتەتىنىنە سەندىرگەن.
دايىنداعان: نازەركە مۇسا
پىكىر قالدىرۋ