مەملەكەت باسشىسىنىڭ تاپسىرماسىمەن ق ر پرەمەر-مينيسترى باقىتجان ساعىنتايەۆ قوستاناي وبلىسىنا باردى، وندا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالاسىندا العا قويىلعان مىندەتتەردى ءتۇسىندىرىپ، ونىڭ ىسكە اسىرىلۋ بارىسىن تەكسەرەدى. بۇل تۋرالى قامشى اقپاراتتىق اگەنتتىگى ۇكىمەت باسشىسى سايتى primeminister.kz -كە سىلتەمە جاساپ حابارلايدى.

باقىتجان ساعىنتايەۆ ءوڭىردىڭ ونەركاسىپتىك الەۋەتى مەن جاڭعىرتۋ 3.0 اياسىندا قابىلدانىپ جاتقان شارالاردى باعالايدى، كتبب تەگىن وقىتۋ باعدارلاماسىن ىسكە اسىرۋ بارىسى مەن ءمجا تەتىكتەرىن قولدانۋ تۋرالى باياندامانى تىڭدايدى، سونداي-اق، «نۇرلى جەر» مەملەكەتتىك باعدارلاماسى بويىنشا تۇرعىن ءۇي سالۋ جۇمىستارىن تەكسەرەدى.

ق ر پرەمەر-مينيسترى جۇمىس ساپارىنىڭ كەستەسىندەگى نەگىزگى شارا  وبلىس جۇرتشىلىعىمەن كەزدەسۋ بولادى، وندا ءوڭىردى دامىتۋدىڭ وزەكتى ماسەلەلەرىن تالقىلاۋ جوسپارلانعان. كاسىپكەرلەر قاۋىمىمەن كەزدەسۋ بارىسىندا شاعىن جانە ورتا بيزنەستى دامىتۋ كەلەشەگى، مەملەكەتتىك قولداۋ كورسەتۋ تەتىكتەرى قارالاتىن بولادى. باقىتجان ساعىنتايەۆ جاستارمەن ۇكىمەتتىڭ قازاقستاندىق جاستاردىڭ جەكە باسەكەگە قابىلەتتىلىگىن ارتتىرۋ ماقساتىمەن ساپالى ءبىلىم الۋى ءۇشىن جاساپ جاتقان مۇمكىندىكتەرىن تالقىلايدى.

ق ر پرەمەر-مينيسترىنىڭ جۇمىس ساپارىنداعى العاشقى نىسان «قوستاناي» حالىقارالىق اۋەجايى بولدى. مۇندا ب. ساعىنتايەۆقا قاۋىپسىزدىكتى قامتاماسىز ەتۋ جۇيەسى مەن اۋە ايلاعىن قايتا جوندەۋ جوباسىن ىسكە اسىرۋ بارىسى تۋرالى ەسەپ بەرىلدى.

جاڭعىرتۋ ناتيجەسى رەتىندە جولاۋشىلار اعىنى ەكى ەسەگە، ساعاتىنا 400 ادامعا دەيىن ۇلعايتىلادى. يكاو حالىقارالىق ازاماتتىق اۆياسيا ۇيىمى سەرتيفيكاتتاۋ جۇمىستارىن جۇرگىزگەن سوڭ، اۋەجايدىڭ بارلىق ۇشاقتاردى تۇرىنە، ۇشۋ-قونۋ ماسساسىنا، رەيس جيىلىگىنە قاراماستان، ەشقانداي شەكتەۋسىز قابىلداۋ مۇمكىندىگىن راستاۋى ۇلكەن ماڭىزعا يە.

بۇعان دەيىن ق ر پرەمەر-مينيسترى باقىتجان ساعىنتايەۆ استانا حالىقارالىق اۋەجايىنىڭ جاڭا جولاۋشىلار تەرمينالىنىڭ قۇرىلىسىمەن تانىسىپ، سەمەي اۋەجايىن قايتا جوندەۋ جۇمىستارىنىڭ بارىسىن باعالاپ، سونداي-اق ورال مەن تالدىقورعان اۋەجايلارىنىڭ جۇمىسىن تەكسەرگەن بولاتىن.

ەسكە سالا كەتەيىك، ق ر پرەمەر-مينيسترى باقىتجان ساعىنتايەۆ قازاقستان وڭىرلەرىنە جۇمىس ساپارىن جالعاستىرۋدا. وسىعان دەيىن ول شىعىس قازاقستان، باتىس قازاقستان، اقتوبە جانە الماتى وبلىستارىندا جۇمىس ساپارىمەن بولدى.