ەلوردا باسشىلىعى مەملەكەتتىك قور پاتەرلەرىن الۋعا كەزەكتى قىسقارتۋ ءۇشىن ەرەكشە شەشىمدەر قابىلداۋدا، دەپ حابارلايدى قامشى اقپاراتتىق اگەنتتىگى Elorda.info-عا سىلتەمە جاساپ.

استانادا تەگىن باسپانا الۋ شارتتارى ودان سايىن قاتاڭداتىلماق.

ەلوردادا باسپاناعا ءزارۋ ادامدار ەسەبىنە تىركەۋ ءۇشىن تالاپ ەتىلەتىن تىركەلۋ مەرزىمىن ءۇش جىلدان بەس جىلعا دەيىن ۇزارتۋدى، ال «تولىق ەمەس وتباسى» ۇعىمىنا تەك جەسىرلەر مەن ايەلى قايتىس بولعان ەر ازاماتتاردى عانا جاتقىزۋ ۇسىنىلۋدا.

«كەزەكتىڭ ۇزارۋىن تەجەۋگە باعىتتالعان قوسىمشا شەكتەۋ شارالارىن ەنگىزۋ ءۇشىن باسقارما تۇرعىن ءۇي زاڭناماسىنا تۇزەتۋلەر ەنگىزۋدى ۇسىنادى. ۇسىنىستار باسپاناعا ءزارۋ ادامدار ەسەبىنە تىركەۋ ءۇشىن تالاپ ەتىلەتىن ەلوردادا تۇراقتى تۇرۋ مەرزىمىن ءۇش جىلدان بەس جىلعا دەيىن ۇزارتۋدى، الەۋمەتتىك تۇرعىدان وسال توپ كاتەگورياسىنا قولدانىلاتىن كىرىستى شەكتەۋ تالاپتارىن وزگەرتۋدى، ال كەزەككە تۇرۋعا قۇقىق بەرەتىن مارتەبەگە يە بولۋ جولىندا جاسالاتىن جالعان اجىراسۋدى بولدىرماۋ ءۇشىن «تولىق ەمەس وتباسى» ۇعىمىن ناقتىلاۋدى قاراستىرادى. اتالعان كاتەگورياعا جەسىر ايەل مەن ايەلى قايتىس بولعان ەر ازاماتتاردى عانا جاتقىزۋ قاجەت»، - دەپ كەلتىرەدى قالالىق تۇرعىن ءۇي باسقارماسىنىڭ باسشىسى رۋسلان احمەتوۆ.

ر.احمەتوۆتىڭ ايتۋىنشا، اكىمدىك باسپانا الۋ كەزەگىندە تۇرعان ازاماتتاردىڭ تىزىمىنە ينۆەنتاريزاسيا جۇرگىزىپ جاتىر. 2016 جىلى ەلوردادا كەزەكتە تۇرعاندارعا 93 پاتەر بەرىلدى.

بيىلعى جىلدىڭ ءساۋىر ايىندا تۇرعىن ءۇي كوميسسياسىنىڭ وتىرىسىنا 260 پاتەر ۇسىنىلدى. ولار ءتورت سوعىس ارداگەرىنە، 49 جەتىم بالاعا، الەۋمەتتىك وسال توپ كاتەگورياسىنا جاتاتىن 137 وتباسىنا بەرىلدى.

بۇدان بولەك، I توقساندا 2008-2010 جىلدارعا ارنالعان تۇرعىن ءۇي قۇرىلىسى باعدارلاماسى اياسىندا سالىنعان باسپانالاردى بەرۋ اياقتالدى. تاعى 65 ادام باسپانامەن قامتىلدى.

بۇعان دەيىن حابارلانعانداي، تاياۋدا ەلوردا باسشىلىعى قازاقستانعا كىرەردە باسپانا الۋعا اقشالاي وتەماقى العان رەپاتريانتتاردى مەملەكەتتىك قور باسپاناسى كەزەگىنەن الىپ تاستاۋدى ۇسىنعان بولاتىن.

سونداي-اق، باسپانا كەزەگىنەن اسكەري قىزمەتشىلەردى الىپ تاستاۋ ماسەلەسى دە تۇر. ولار بولەك تىزىمگە تۇرعىزىلادى جانە نەسيەلەۋدىڭ جەڭىلدىك شارتتارى ويلاستىرىلادى.

وسىلايشا، باسقارما ماماندارى كەزەكتە تۇرعاندار سانىن ەكى ەسە ازايتپاق.

بۇگىنگى كۇنى 45 516 ادام كوممۋنالدى تۇرعىن ءۇي قورى باسپاناسىنا ءزارۋ.

شولۋشى: ايگەرىم تاۋباي