قازاقستان كۇيشىلەرىنىڭ وداعى قۇرىلادى دەپ حابارلايدى قامشى اقپاراتتىق اگەنتتىگى. بۇل تۋرالى بەلگىلى كۇيشى ەربولات مۇستافا جازدى.
«ءسۇيىنشى! قۇرمەتتى اعايىن! قازاق تاريحىندا تۇڭعىش رەت قازاقستان كۇيشىلەرىنىڭ وداعى قۇرىلماقشى. كونسەرت زالدارىنىڭ ەسىگىنەن سىعالاپ، جەتىم بالانىڭ كۇيىن كەشىپ جۇرگەن كيەلى كۇي ونەرىنىڭ جاناشىرلارى ءۇن قوسادى دەپ سەنەمىز. اسقار تاۋدان باستاۋ العان ءمولدىر بۇلاق ۇشان تەڭىزگە اينالاتىنى سياقتى، ۇلتتىق ونەرمەن سۋسىنداعان ونەرپاز عانا بيىك بەلەستەرگە جەتە الادى. ال، اعايىن، ىسكە ءسات! "كۇي ونەرى" اتتى تاۋدىڭ شىڭىندا تۇرعان ءشامىل اعاعا قولقابىس تيگىزەيىك» دەگەن كۇيشى ءوزىنىڭ الەۋمەتتىك جازباسىندا.
بەلگىلى بولعانداي، كۇيشى-دومبىراشى، قازاقستاننىڭ ەڭبەك سىڭىرگەن قايراتكەرى ءشامىل ءابىلتاي پرەزيدەنت نازاربايەۆتىڭ اتىنا كۇي مۇراسىنا جاناشىر بولۋىن سۇراپ حات جازعان. وعان جاۋاپ بەرگەن مادەنيەت جانە سپورت ۆيسەمينيسترى مۇسايبەكوۆ كۇيشىگە الماتى قالاسىنىڭ ادىلەت دەپارتامەنتىنە ءتيىستى قۇجاتتى وتكىزۋىن سۇراعان.
ايتا كەتسەك، كۇي – قازاق حالقىنىڭ ءتول مۇراسى. كۇي XIV عاسىردا جەكە مۋزىكالىق جانر بولىپ قالىپتاستى. كۇيلەر مازمۇنى اڭىز-ەرتەگىلەرگە، ناقتىلى تاريحي وقيعالارعا قۇرىلىپ، كوبىنە باعدارلامالى تۇرىندە دامىدى. وندا حالىقتىڭ باسىنان وتكەن تاۋقىمەت مەن ادىلەتسىزدىككە قارسى كۇرەسى، ازات ءومىردى اڭساعان اسىل ارمانى مەن قۋانىش سەزىمى تەرەڭ تولعانىسپەن ورنەك-بوياۋىن تاپتى.
