ماجىلىستە كەيبىر زاڭنامالىق اكتىلەرگە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ماقۇلداندى، دەپ حابارلايدى قامشى اقپاراتتىق اگەنتتىگى Sputnik باسىلىمىنا سىلتەمە جاساپ.
2017-2018 جىلدارى بيۋدجەتتەن تولەنەتىن زەينەتاقىنىڭ مولشەرى 3 كەزەڭدە ارتتىرىلادى، دەپ حابارلادى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا.
"ەلباسىنىڭ بيىلعى جولداۋىندا بەرگەن تاپسىرماسىنا سايكەس 2017-2018 جىلدارى بيۋدجەتتەن تولەنەتىن زەينەتاقىلار مولشەرى 3 كەزەڭدە ارتتىرىلاتىن بولادى. ءبىرىنشى كەزەڭدە، ياعني، 2017 جىلعى ءبىرىنشى قاڭتاردان باستاپ ىنتىماقتى زەينەتاقىلار مولشەرى توعىز پايىزعا، بازالىق زەينەتاقى جەتى پايىزعا ارتتى. ال ەكىنشى كەزەڭدە، 2017 جىلعى ءبىرىنشى شىلدەدەن باستاپ ىنتىماقتى زەينەتاقى مولشەرى قوسىمشا 11 پايىزعا، ال بازالىق زەينەتاقى مولشەرى 13 پايىزعا كوبەيتىلگەلى وتىر"، — دەدى دۇيسەنوۆا ءماجىلىستىڭ جالپى وتىرىسىندا.
ناتيجەسىندە 2017 جىلعى ءبىرىنشى شىلدەدەن باستاپ زەينەتاقىنى 2016 جىلعى زەينەتاقى مولشەرىمەن سالىستىرعاندا 20 پايىزعا ارتتىرۋ قامتاماسىز ەتىلمەك. ياعني، ەڭ تومەنگى زەينەتاقى 45 711 تەڭگە، ورتاشا زەينەتاقى 66 676 تەڭگەگە دەيىن ارتتىرىلاتىن بولادى. بۇل ءوسىم بارلىق ەكى ميلليوننان استام زەينەتكەرلەردى قامتيدى.
"سونىمەن قاتار، 2017 جىلعى ءبىرىنشى شىلدەدەن باستاپ زەينەتاقى تاعايىنداۋ ءۇشىن ەسەپكە الىناتىن تابىستىڭ ەڭ جوعارى مولشەرىن 41 ايلىق ەسەپتىك كورسەتكىشتەن 46 ايلىق ەسەپتىك كورسەتكىشكە دەيىن ارتتىرۋ كوزدەلگەن. بۇل 2017 جىلدىڭ ءبىرىنشى جارتىسىندا تاعايىندالعان زەينەتاقىلاردىڭ 11 پايىزعا ارتۋ ەسەبىمەن وسى جىلدىڭ ەكىنشى جارتىسىندا تاعايىندالاتىن زەينەتاقىلار مولشەرىنىڭ تەپە-تەڭدىگىن قامتاماسىز ەتۋ ءۇشىن قارالىپ وتىر"، — دەدى ول.
زەينەتاقىنى ارتتىرۋدىڭ ءۇشىنشى كەزەڭى 2018 جىلعى ءبىرىنشى شىلدەدەن باستاپ جۇرگىزىلەتىن بولادى. بۇل بازالىق زەينەتاقىنى تاعايىنداۋ ادىستەمەسىنىڭ وزگەرۋىمەن بايلانىستى.
"بۇگىنگى تاڭدا بازالىق زەينەتاقى زەينەتكەرلىك جاسقا جەتكەن ادامدارعا بىردەي مولشەردە تاعايىندالادى. جاڭا ادىستەمەگە سايكەس بۇل زەينەتاقى جۇيەسىنە قاتىسۋ وتىلىنە بايلانىستى بولعالى وتىر. بۇل رەتتە 1998 جىلعا دەيىنگى ەڭبەك ءوتىلى جانە 1998 جىلدان كەيىنگى جيناقتاۋشى زەينەتاقى جۇيەسىنە اۋدارىلاتىن زەينەتاقى جيناقتارىنىڭ مەرزىمى ەسكەرىلەدى. بازالىق زەينەتاقى بارلىق زەينەتكەرلەر ءۇشىن ولاردىڭ زەينەتاقى قۇجاتتارىنداعى 1998 جىلعا دەيىنگى ەڭبەك وتىلىنە قاراي ەسەپتەلىنەتىن بولادى. بۇل ورايدا ايتا كەتەتىن جايت، زەينەتكەرلەرگە ەڭبەك ءوتىلى تۋرالى قوسىمشا قۇجاتتاردىڭ ۇسىنۋى قاجەت بولمايدى. سونىمەن بىرگە قاتىسۋ وتىلىنە جيناقتاۋشى زەينەتاقى جۇيەسىنە اۋدارىمدار جاساعان كەزەڭ دە كىرەدى. بۇل جاعدايدا قوسىمشا انىقتامالار تالاپ ەتىلمەيدى"، — دەدى دۇيسەنوۆا.
