ەردوعان مەن ترامپتىڭ قاتىسۋىمەن پرەسس-كونفەرەنسيا ءوتتى دەپ حابارلايدى قامشى اقپاراتتىق اگەنتتىگى news.rambler.ru-عا سىلتەمە جاساي وتىرىپ. اتالعان پرەسس-كونفەرەنسيا كەزىندە ترامپ اقش پەن تۇركيا مەملەكەتىنىڭ اراسىنداعى بۇرىنعى دوستىق قاتىناس تۋرالى ايتىپ، ءسوز باستادى.
«تۇركيا كوممۋنيزمگە قارسى قىرعي-قاباق سوعىستا اقش-قا قورعان بولا بىلگەن ەدى»،- دەدى ترامپ.
سونىمەن بىرگە ترامپ اقش پەن تۇركيا ەلىنىڭ اسكەري تاريحى تۋرالى دا ايتىپ ءوتتى. ول امەريكالىق گەنەرال دۋگلاستىڭ اقش-تىڭ كورەيا ەلىنە جورىعى كەزىندەگى تۇرىكتەرمەن وداقتاس بولعانى مەن تۇرىك اسكەرىنىڭ الەمدەگى ەڭ ۇلى اسكەر بولدى دەگەن ءسوزىن دە مىسال رەتىندە كەلتىردى.
كەيىننەن ترامپ تۇركيا مەملەكەتىنە دايش-قا قارسى سوعىس كەزىندە كومەك كورسەتە الاتىنىن جەتكىزدى.
ەردوعان بولسا ءسوز باسىندا ترامپتى رەسمي تۇردە سايلاۋداعى جەڭىسىمەن قۇتتىقتادى. سونىمەن بىرگە تاريحتاعى اقش پەن تۇركيا ەلدەرىنىڭ وداقتاستىعىنا ءبىراز ۋاقىت توقتالىپ ءوتتى. تۇركيا باسشىسى اقش-پەن تەك سوعىسقا بايلانىستى عانا ەمەس باسقا دا سالالارداعى قارىم-قاتىناستى دامىتۋدى ۇسىندى.
ەكى مەملەكەت باسشىسىنىڭ اراسىندا بولعان بۇل كەزدەسۋدىڭ ءساتتى باستالۋى كوپشىلىكتى تاڭقالدىردى. ەستەرىڭىزگە سالا كەتەتىن بولساق، تۇركيا مەن اقش-تىڭ اراسىندا سوڭعى بىرنەشە ايدا ءبىراز كيكىلجىڭدەر ورىن العان بولاتىن.
بۇل كەزدەسۋ تەك 20 مينۋتقا سوزىلعان. مەملەكەت باسشىلارىنىڭ قانداي بەتپەردە كيىپ وتىرعاندىعى ازىرگە بەلگىسىز. بۇل كەزدەسۋ بارىسىندا ترامپ پەن ەردوعان بەلگىلى ءبىر ساياسات قولدانىپ وتىرعانى انىق.
شولۋشى: اسەل وتەشوۆا
