تاراز قالاسىنان شىققان اۆتوكولىكتەر مەن اۆتوبۋستار ىلەسكەن 70-كە جۋىق تۇيەلەر مەن اتتار كەرۋەنى استاناداعى «ەكسپو-2017» حالىقارالىق كورمەسىنە جول تارتتى، دەپ حابارلايدى قامشى اقپاراتتىق اگەنتتىگى.

 «كونە تاراز» تاريحي-ارحەولوگيالىق كەشەنى جانىنداعى جامبىل جابايەۆ الاڭىنان باستالعان ساپار استاناعا جول تارتتى. «ۇلى جىبەك جولى. كونە تارازدان اسقاق استاناعا تارتۋ» دەپ اتالاتىن مادەني ساپاردى قالا تۇرعىندارى  مەن قوناقتارى سۇيسىنە تاماشالادى.

 اتالمىش شارا «ەكسپو-2017» حالىقارالىق مامانداندىرىلعان كورمەسى مەن 26-30 شىلدە كۇندەرى استانا قالاسىندا وتەتىن جامبىل وبلىسىنىڭ مادەني كۇندەرى اياسىندا وتكىزىلمەكشى.  

كەرۋەن 25  جۇك ارتىلعان تۇيە، 46 ات جانە ايداۋشىلارى، 10 جۇك ماشيناسى، 3 اۆتوبۋستان تۇرادى. وبلىستىڭ مادەني كۇندەرىنە قاتىسۋ ءۇشىن استاناعا مادەنيەت قىزمەتكەرلەرى، دارىگەرلەر، جپ جانە تج قىزمەتكەرلەرىنەن تۇراتىن 150 ادام اتتاندى.

كەرۋەن  جامبىل جانە قاراعاندى وبلىستارىنىڭ 10 ەلدى مەكەندەرىندە ايالداما جاساپ،  كيىز ۇيلەر مەن  شاتىرلار قۇرۋدى جوسپارلاپ وتىر. سونداي-اق،  «ەكسپو-2017» حالىقارالىق كورمەسىن قولداۋعا ارنالعان مەرەكەلىك شارالار ۇيىمداستىرىلماقشى. تۇرعىندارعا كونسەرتتىك باعدارلامالار، تەاترلاندىرىلعان قويىلىمدار ۇسىنىلادى. ۇلتتىق سپورت  تۇرلەرى بويىنشا سپورتتىق شارالار وتكىزىلەدى.

كەرۋەن ەلورداعا ات باسىن تىرەگەن سوڭ كورمە كەشەنى اۋماعىندا  جامبىل وبلىسىنىڭ مادەني كۇندەرى وتەدى. بۇدان بولەك، بەس كۇن بويى قالا تۇرعىندارى جانە قوناقتارىنىڭ نازارىنا م.گوركيي اتىنداعى مەملەكەتتىك  اكادەميالىق درامالىق ورىس  تەاترى ساحناسىندا، «جاستار» تەاترى، «حان شاتىر» ويىن-ساۋىق ورتالىعىنىڭ الاڭىندا  كورمەلەر، تەاترلاندىرىلعان قويىلىمدار، كونسەرتتىك باعدارلامالار  ۇسىنىلادى.

ال، 28 شىلدە كۇنى «قازانات» يپپودرومىنداعى ەتنواۋىلدا ءداستۇرلى ونەردىڭ ءارالۋاندىعىن كورسەتەتىن «شىعىس بازارى»، قولونەر جانە ساندىك-قولدانبالى بۇيىمداردىڭ جارمەڭكەسى ۇيىمداستىرىلىپ، ەكسپو قوناقتارىنا  ۇلى جىبەك جولى ورتالىقتارىنىڭ ءبىرى بولعان ەجەلگى تاراز قالاسىنىڭ تاريحى تانىستىرىلادى. 

شولۋشى: گۇلىم جاقان