"قازاقستان" ۇلتتىق اراسىنداعى "اپتا" باعدارلاماسىنىڭ ساراپتامالىق ورتالىعى قازاق تىلىندە قاپىسىز سويلەيتىن اتقامىنەرلەردىڭ وندىعىن جاسادى دەپ حابارلايدى قامشى اقپاراتتىق اگەنتتىگى.
ونىنشى ورنىن ەكى اي بۇرىن ماڭعىستاۋ وبلىسى اكىمى بولىپ تاعايىندالعان ەرالى توعجانوۆتىڭ ەنشىسىنە ءتيىپتى.
ال، توعىزىنشى ورىنعا اتىراۋ وبلىسىنىڭ اكىمى نۇرلان نوعايەۆ جايعاسقان.
"اتىراۋ وبلىسى اكىمى نۇرلان نوعايەۆتىڭ دا ءتىلى جاتىق، قازاقتىڭ جالپاق تىلىمەن كەز-كەلگەن ماسەلەنىڭ تىگىسىن جاتقىزىپ جەتكىزەدى. سان الۋان شارا مەن القالى جيىنداردا قازاق ءتىلىنىڭ ءقادىرىن ارتتىرىپ سويلەيتىن نۇرلان اسقارۇلىن رەيتينگىمىزدىڭ توعىزىنشى ورنىنا لايىق دەپ تاپتىق"، – دەيدى ساراپشىلار.
سەگىزىنشى ورىن قۇقىقتىق سالادا اۋقىمدى رەفورمالارىمەن كوزگە ءجيى ءتۇسىپ جۇرگەن تۇلعالاردىڭ ءبىرى باس پروكۋرور — جاقىپ اسانوۆقا بۇيىرعان.
ينۆەستورلاردىڭ بىرىنە مەملەكەتتىك ءتىلدىڭ مارتەبەسى تۋرالى ايتقان اڭگىمەسى حيت بولعان اقتوبە وبلىسىنىڭ اكىمى بەردىبەك ساپارباەۆ جەتىنشى ورىنعا جايسسا، قىزىلوردا وبلىسىنىڭ اكىمى قىرىمبەك كوشەربايەۆ اپتانىڭ التىلىعىنا ىلىكتى.
"ءتىلى ءمىردىڭ وعىنداي ساياساتكەرلەردىڭ ءبىرى - يمانعالي تاسماعامبەتوۆ. سان لاۋازىمدى قىزمەتتەردىڭ تىزگىنىن ۇستاعان يمانعالي نۇرعالي ۇلىنىڭ كەز-كەلگەن ماسەلەدە شەگەلەپ سويلەيتىنىن بۇقارا جاقسى بىلەدى. ەلىمىزدىڭ رەسەيدەگى توتەنشە جانە وكىلەتتى ەلشىسىنىڭ ەنشىسىندە — بەسىنشى ورىن"، – دەيدى "اپتا" ساراپتامالىق ورتالىعى.
سوڭعى كەزدە جاڭا قىرىنان تانىلىپ ۇلگەرگەن قىزىل ءتىلدى شەشەن پرەمەر-مينيستر باقىتجان ساعىنتايەۆ ءتورتىنشى ورىننان كورىندى.
ءۇشىنشى ورىن ءماجىلىس دەپۋتاتى بەكبولات تىلەۋحاننىڭ، ال ەكىنشى ورىن نۇر وتان پارتياسى ءتوراعاسىنىڭ ءبىرىنشى ورىنباسارى، شەشەن سويلەۋدىڭ حاس شەبەرى مۇحتار قۇل-مۇحاممەدتىڭ ۇلەسىنە ءتيىپتى.
"مۇحتار ابرار ۇلى اۋەزدى تىلىمىزدە اۋەلەتىپ سويلەپ، اعىلتا جونەلگەندە قازاق ءتىلىنىڭ ءقادىرىن بىلەتىن قايمانا جۇرتتى باۋراپ الادى. شەشەن سويلەۋدىڭ حاس شەبەرىنە ەكىنشى ورىندى لايىق كوردىك"، – دەيدى ساراپشىلار.
ءبىرىنشى ورىندى وسىدان ءتورت جىل بۇرىن بولاشاق باعدارلاماسى مەرەيتويىندا ەلباسىمەن ادەمى دە تاپقىر اڭگىمە قۇرعان، ءقازىر پروكۋروردىڭ كومەكشىسى قىزمەتىن اتقارىپ جۇرگەن ماقسات ىسقاقوۆ يەلەندى.
