شىمكەنت قالاسىنداعى وڭداسىنوۆ اتىنداعى №38 مەكتەپ-گيمنازياسىنىڭ ءمۇعالىمى ءجۇسىپوۆا ايمان سۇلتانبەك قىزى ەلباسى نۇرسۇلتان نازاربايەۆ پەن ءبىلىم  جانە عىلىم ءمينيسترى ەرلان ساعادييەۆكە مەكتەپ باسشىلىعى تاراپىنان قورلىق كورگەنىن ايتىپ، عالامتورعا ۆيدەوۇندەۋ جاريالادى دەپ حابارلايدى قامشى اقپاراتتىق اگەنتتىگى.

«قۇرمەتتى ق ر پرەزيدەنتى نۇرسۇلتان ءابىش ۇلىنىڭ نازارىنا. مەن شىمكەنت قالاسىنداعى وڭداسىنوۆ اتىنداعى №38 مەكتەپ-گيمنازياسىنىڭ ءمۇعالىمىمىن. قازىرگى تاڭدا وسى اتالعان مەكتەپتىڭ باسشىسى ءجۇسىپوۆا ايمان سۇلتانبەك قىزى مەن ورىنباسارلارى اسىلبەكوۆا دانا دۇيسەنبەك قىزى جانە قوزىبەكوۆا ايجامال شارداربەك قىزىنىڭ تاراپىنان قاتتى قىسىم كورىپ وتىرعانىمدى مالىمدەگىم كەلەدى. مەكتەپ باسشىلارى وسى جىلدىڭ 4-12 ءساۋىر ارالىعىندا ءبىزدى نەگىزسىز ىسكە جۇمساپ، تۇرعىنداردىڭ ستاتۋسىن انىقتاۋدى مىندەتتەدى. اتاپ ايتار بولسام، تۇرعىنداردىڭ جۇمىس ىستەيتىنىن نەمەسە ىستەمەيتىنىن، حابار-وشارسىز جوعالعان جانە سوت تەرگەۋىنەن قاشىپ جۇرگەندەر بولسا، سولاردى انىقتادىق. بۇل جۇمىسىن اتقارىپ بولعاننان سوڭ 8 ءساۋىر كۇنى انامنىڭ ءحالىن سۇراۋعا اۋىلعا كەتكەن ەدىم. سول كەزدە مەكتەپ باسشىلىعى ماعان حابارلاسىپ اكىمشىلىكتەن تاعى دا جۇمىس كەلىپ تۇسكەنىن ايتتى. جاعدايىمدى ايتىپ تۇسىندىرمەك بولىپ ەدىم، تىڭداماق تۇرماق، وزىمە ايقايلاپ، «تاكسيمەن جەتسەڭ دە دەرەۋ جەت، جەتپەسەڭ باسشىلىقتىڭ الدىنا الىپ بارامىن» دەپ تۇتقانى قويا سالدى. مەن ول كۇنى جەتە المادىم. كەيىننەن 10 ءساۋىر كۇنى مەكتەپكە كەلگەنىمدە مەكتەپ ديرەكتورى ورىنباسارلارىمەن كابينەتكە كىرگىزىپ الىپ، جەكە باسىمدى قورلادى، قۇقىعىمدى تاپتاپ، نامىسىما ءتيدى. بۇل ىستەرىمەن قويماي، ەندىگى سەنىمەن بولسىن دەپ مەنى قورقىتتى...» - دەپ ىشتەگى كۇيىگىن اشىنا جەتكىزدى ءمۇعالىم.

مەكتەپ ءمۇعالىمىنىڭ ايتۋىنشا، كەيىن دە مەكتەپ باسشىلىعى بۇل كىسىنىڭ جەكە باسىنا تيىسۋلەرىن قويماعان. قاتتى قىسىمعا شىداي الماعان ءمۇعالىم قان قىسىمى كوتەرىلىپ، قۇلاپ قالعان كەزىندە ديرەكتوردىڭ ورىنباسارى بۇيىرىنەن تەۋىپ، ال ديرەكتوردىڭ ءوزى ءمۇعالىمدى ۆيدەوعا ءتۇسىرىپ قورلاعان.

اشىنعان ءمۇعالىم مەكتەپ ۇجىمىنداعى وزگە مۇعالىمدەر جەكە باستارى ءۇشىن قورقىپ، وزىنەن الشاقتاي باستاعاندىعىن دا جەتكىزدى.

Facebook الەۋمەتتىك جەلىسىندە تارالعان بۇل ۆيدەو جاۋاپتى تۇلعالاردىڭ قۇلاعىنا جەتىپ، ءبىر شارا قولدانادى دەپ سەنەمىز.

ەستەرىڭىزگە سالا كەتسەك، ءبىلىم ءمينيسترى ە.ساعادييەۆ مىرزا مەكتەپ مۇعالمدەرى ەندى وزدەرىنىڭ مىندەتتەرىنە جاتپايتىن جۇمىستارعا جەگىلمەيدى دەپ مالىمدەمە جاساعان بولاتىن. الايدا، بۇل سوزگە قۇلاق اسىپ وتىرعان باسشىلىق جوق سەكىلدى. مۇعالىمدەردىڭ قۇقىعىن قورعاۋ ءۇشىن جاۋاپتى تۇلعالاردىڭ جانە وقىرمان نازارىنا مەكتەپ ءمۇعالىمىنىڭ بار جاعدايىن اشىنا جەتكىزگەن ۆيدەوسىن ۇسىنامىز.

قامشىگەر: نازەركە لابيحان