قازاق ونەرىنىڭ مايتالمانى، اكتەر ازامات ساتىبالدى بۇعان دەيىن كينو ءتۇسىرىپ، كورەرمەن جۇرەگىن جاۋلاعان. قوعامدىق ماسەلەنى اشىپ، كورەرمەنگە وي سالدى. بۇل جولى ءوزىنىڭ جەكە Theater28 تەاترى "كۇيەۋىڭىزدى ساتىڭىزشى" دەپ اتالاتىن قويىلىممەن شىمىلدىعىن اشتى. قويىلىم 22 مامىردا قۋىرشاقتار تەاتىرىندا كورسەتىلدى، دەپ جازادى قامشى اقپاراتتىق اگەنتتىگى.

بۇرىننان بار قويىلىمدى زاماناۋي تۇرعىدا حالىققا ۇسىنعان جاس تەاتر بۇگىنگى تاڭداعى وتباسىلىق ماسەلەنى قوزعاي ءبىلدى، كومەديا ارقىلى ادەمى جەتكىزدى. كورەرمەننىڭ جۇرەگىنەن ورىن تاپقانىن زالداعى سوعىلعان ۇزاق شاپالاقتان بايقاۋعا بولادى.

ءيا، كۇيەۋ ساتىلار، ءبىراق ەشقانداي اقشاعا ساتىلمايتىن اسىل قازىنا بار، ول - سەزىم، ماحاببات. ءبىرىن ءبىرى ءسۇيىپ قوسىلعان قوس عاشىقتىڭ ءومىرى تاقتاداي تەگىس بولمايدى، باس قوسقاندارىنا 5جىل تولسىن، 10 جىل تولسىن، الاڭسىز كۇندەردىڭ بىرىندە داۋىل سوعادى، نوسەر جاۋادى. ءبىراق ءبارى وتكىنشى، سىن عانا. سول سىننان قوس عاشىقتى امان الىپ شىعاتىن ولاردىڭ ماحابباتى. العاش قول ۇستاسقان كۇنى ەكى جاس بىر-بىرىنە جۇرەكتەرىن تاپسىرادى. سول جۇرەكتى ايالاپ ۇستاۋ - ەكەۋى ءۇشىن دە ۇلكەن جاۋاپكەرشىلىك، جەڭىل بولىپ كورىنگەنىمەن.

قويىلىمدى تاماشالاۋعا مۇحتار اۋەزوۆ اتىنداعى قازاق مەملەكەتتىك دراما تەاترىنىڭ كوركەمدىك جەتەكشىسى ەسمۇحان وبايەۆ، قازىرگى «تتت» تەاترىنىڭ ديرەكتورى اسىلبەك بورانبايەۆ جانە ەلىمىزدەگى ونەر جۇلدىزدارى مەن ب ا ق وكىلدەرى كەلدى. ەسمۇحان وبايەۆ شىمىلدىعىن ەندى اشقان جاڭا تەاترعا اق باتاسىن بەرىپ، ازامات ساتىبالدىعا رازىلىعىن ءبىلدىرىپ، العىس ايتتى. تەاتردىڭ ارتىعى بولمايدى دەي كەلە، ءالى دە تالاي بيىكتەردەن كورىنەتىنىنە كامىل سەنەتىنىن ايتتى.

فوتو ماقسات قۇسايىنوۆ

گۇلىم جاقان