توسەكتە جاتقان بالانىڭ شاشى ءتۇسىپ قالعان، تەرىسى جاسىل تۇسكە ەنگەن. ول بۇرىشتا نەمەرەسىنە جىلى شۇلىق توقىپ وتىرعان ەگدە جاستاعى ەدەن جۋۋشى ايەلگە قاراپ «ءامينا اپا، مەن ولمەي-اق قويسام بولا ما؟» دەپ سۇرادى.
بۇل سۇراقتى ەستىگەن ايەل توبەسىنە سۋىق سۋدى قۇيىپ جىبەرگەندەي كۇي كەشتى. ادام مۇندايعا ەشقاشان ەتى ۇيرەنبەيدى. ەشقاشان...
«جانىم-اۋ، و نەدەگەنىڭ؟ ارينە ولمەيسىڭ...» دەدى ايەل كوزىندەگى جاستى جاسىرۋعا تىرىسىپ.
«ءامينا اپا، سەنبى كۇنى انامنىڭ تۋعان كۇنى ەدى. مەن وعان ءوز قولىممەن سىيلىق دايىندادىم. ەگەر ءولىپ قالسام قالايشا ونى تارتۋ ەتپەكپىن؟ سەنبى كۇنى ولمەسەم بولا ما؟ بولا ما؟» دەدى جالىنىشتى ۇنمەن بالا.
ونكولوگيا. ءولىم مەن ءومىردىڭ اراسىنداعى سىزىق سەكىلدى. ونكولوگيالىق اۋرۋدىڭ جازىلمايتىن تۇرىنە شالدىققان بالالاردىڭ ساناۋلى كۇندەرى قالدى. ءبىرى ءبىر اپتا ءومىر سۇرسە، ەكىنشىسى ءبىر ايدان كەيىن و دۇنيەلىك بولۋى مۇمكىن.
وعان ەشتەڭە كەرەك ەمەس. ول تەك اناسىنىڭ تۋعان كۇنىنە دەيىن ءۇزىلىپ كەتپەۋدى ارماندايدى. ءتۇرلى-تۇستى قاعازدان جاساعان سىيلىعىن تارتۋ ەتىپ، اناسىنىڭ جۇزىنەن قۋانىشتى كورگىسى كەلەدى. ونىڭ ومىرىندەگى ەڭ قىمبات سىيلىق...سوڭعى سىيلىق...
2016 جىلى 36 مىڭنان استام قازاقستاندىق ونكولوگيالىق اۋرۋعا شالدىققان. جىل سايىن قاتەرلى دەرتتەن 13 مىڭ ادام كوز جۇمادى. سولتۇستىك پەن شىعىس قازاقستاندا قاتەرلى ىسىكتەن كوز جۇماتىنداردىڭ سانى كوپ.
بايلىق پەن مانساپ ۋاقىتشا، قۋانىش پەن قيىنشىلىق وتكىنشى. تەك ادامنىڭ ارتىنان قالدىراتىن سارا جولى، اسىل ميراسى ماڭگىلىك.
بولماشى ماسەلەگە بولا ومىردەن ءتۇڭىلىپ، ومىردەن باز كەشىپ جاتاتىنىمىز جاسىرىن ەمەس. الايدا جاقىن ادامدارىڭنىڭ امان-ەسەن ءجۇرۋىنىڭ ءوزى ومىردەگى ەڭ ۇلكەن باقىت ەكەنىن تۇسىنە بەرمەيمىز. كەيدە كەش تۇسىنەمىز.
دايىنداعان: اسەم المۇحانبەت
