الماتى بيزنەس جۇرگىزۋگە ەڭ قولايلى قالا بولىپ تىركەلدى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ. بۇل دۇنيەجۇزىلىك بانك توبىنىڭ جاساعان قازاقستاندا بيزنەس جۇرگىزۋدىڭ سۋبۇلتتىق رەيتينگىسىنىڭ ناتيجەسى.

ايماقتارداعى كاسىپكەرلىك قىزمەتتى رەتتەۋ جۇيەسى ءتورت نەگىزگى كورسەتكىش بويىنشا باعالانعان. ول كاسىپورىندى تىركەۋ، قۇرىلىستى جۇرگىزۋگە رۇقسات الۋ، ەلەكتر قۋاتىمەن قامتۋ جۇيەسىنە قوسىلۋ جانە جىلجىمايتىن مۇلىكتى تىركەۋ. بايقاۋ ەلىمىزدەگى كاسىپكەرلىك ەڭ جاقسى دامىعان 8 قالانىڭ اراسىندا جۇرگىزىلدى. رەيتينگتىڭ العاشقى ورىندارىندا سونداي-اق اقتوبە، قوستاناي، پاۆلودار مەن شىعىس-قازاقستان ايماقتارى تۇرسا، قاراعاندى، وڭتۇستىك-قازاقستان وبلىستارى مەن استانا قالاسى رەيتينگتىڭ سوڭعى ساتىلارىنا جايعاسقان. مامانداردىڭ ايتۋىنشا، بولاشاقتا كاسىپكەرلىك كليمات ەلىمىزدىڭ بارلىق وڭىرلەرىندە باعالانادى.

سەرىك جۇمانعارين، ق ر ۇلتتىق ەكونوميكا ءمينيسترىنىڭ ورىنباسارى: -بىرەۋ ءبىرىنشى ورىن الادى، ول دەگەن ۇلكەن جۇمىس. رەيتينگتە بۇكىل دۇنيە جۇزىنەن 189 مەملەكەت بار. ول دەگەن ينۆەستورلاردىڭ شەشىم قابىلداۋىنا، قايدا ينۆەستيسيا سالۋىنا اسەر ەتەتىن، ىقپال ەتەتىن وتە ماڭىزدى نارسە.

شولۋشى: ايگەرىم تاۋباي