پارلامەنت ءماجىلىسىنىڭ ءتوراعاسى نۇرلان نىعماتۋلين ەسەپ كوميتەتىنە سوتقا جولداناتىن ماتەريالداردىڭ ساپاسىن جوعارىلاتۋعا كەڭەس بەرگەن. قازاقپاراتتىڭ جازۋىنشا، بۇل تۋلاى ءماجىلىستىڭ جالپى وتىرىسىندا ق ر ۇكىمەتىنىڭ جانە رەسپۋبليكالىق بيۋدجەتتىڭ اتقارىلۋى جونىندەگى ەسەپ كوميتەتىنىڭ 2016 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىنىڭ تىڭدالۋىندا ءسوز بولعان.
«وتكەن جىلى سىزدەردىڭ ماتەريالدارىڭىز بويىنشا بىردە-بىر ايىپتاۋ ۇكىمى شىعارىلعان جوق. سىزدەر زاڭنامالىق تۇرعىدا تىكەلەي تالاپ-ارىزبەن سوتقا جۇگىنە الاتىن ەلدەگى جالعىز وكىلەتتى ورگانسىزدار. سونىمەن قاتار تاپسىراتىن ماتەريالدارىڭىز سوتقا دەيىن جەتپەي جاتادى.
كوپ جاعدايلاردا سىزدەردىڭ تەكسەرۋلەرىڭىز ناتيجەسىندەگى ۇسىنىلعان ماتەريالداردىڭ تومەن ساپاسى سەبەبىنەن سوتقا جەتپەيتىنى بايقالۋدا. بۇل تۇرعىدا تەكسەرىس پروسەسى ەمەس، ونىڭ ناتيجەسى ماڭىزدى، ياعني كەلتىرىلگەن شىعىن كولەمىن وتەۋ، زاڭ بۇزۋشىلىق ءۇشىن جاۋاپكەرشىلىككە تارتىلعانداردىڭ سانى ەسكەرىلۋى ءتيىس. تەك سوندا عانا جۇمىستىڭ تيىمدىلىگى بولادى. ءبىز بيۋدجەتتىك باعدارلامالار اكىمشىلەرىنىڭ، مەملەكەتتىك ورگانداردىڭ جاۋاپكەرشىلىگى تۋرالى ءجيى ايتامىز. الايدا سوڭعى كەزدە تەكسەرۋشىلەرگە دە قاتىستى سۇراقتار تۋىنداۋدا. تەك بارلىق تاراپتاردىڭ ءوزارا جاۋاپكەرشىلىگى كەزىندە عانا مەملەكەتتىك قارجىنى پايدالانۋدا ءتيىستى ءتارتىپتى جاساي الامىز»،-دەگەن ن. نىعماتۋلين ەسەپ كوميتەتىنىڭ ءتوراعاسى نۇرمۇحامبەت ابدىبەكوۆكە قاراتىپ ايتقان سوزىندە. ءوز كەزەگىندە ن. ابدىبەكوۆ كوميتەت جۇمىسىنا قاتىستى ايتىلعان سىن وتە ورىندى ەكەنىن، كەمشىلىكتەردى تۇزەتۋ جۇمىستارىن ىسكە اسىراتىنىن اتاپ ءوتتى.
ءسوز سوڭىندا ءماجىلىس ءتوراعاسى اتقارىلاتىن جۇمىستاردىڭ تيىمدىلىگىن ارتتىرۋ باعىتىندا ەسەپ كوميتەتىنىڭ زاڭنامالىق باستامالارىن دەپۋتاتتار قولداۋعا دايىن ەكەنىن جەتكىزدى. سونداي-اق ول بيۋدجەت قارجىسىنىڭ دۇرىس يگرەلىۋى تۋرالى دا ايتقان. بيۋدجەتتىك قارجىعا قاتىستى ايلا-شارعى جاساۋدى دوعارۋ كەرەكتىگىن، قاراستىرىلعان قارجى شىن مانىندە ەلدىڭ ەكونوميكاسىنا جۇمىس ىستەۋى ءۇشىن كۆازيمەملەكەتتىك سەكتوردى قارجىلاندىرۋ تەتىگىن وزگەرتۋدى جانە بيۋدجەتتىك باعدارلامالار اكىمشىلەرىنىڭ جاۋاپكەرشىلىگىن ارتتىرۋدى قامتيتىن قادامداردى پىسىقتاۋ كەرەكتىگىن اتاپ وتكەن.
