ورتالىق كوممۋنيكاسيالار قىزمەتىندە قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ جۇلدەسىنە ات سپورتى تۇرلەرىنەن «ەكسپو كۋبوگىن» ۇيىمداستىرۋ بويىنشا باسپا ءسوز كونفەرەنسيا ءوتتى دەپ حابارلايدى قامشى اقپارات اگەنتتىگى.
باسپا ءسوز كونفەرەنسياعا ق ر پارلامەنتى ءماجىلىسىنىڭ دەپۋتاتى، ق ر «ۇلتتىق سپورت تۇرلەرى قاۋىمداستىعى» پرەزيدەنتى بەكبولات تىلەۋحان، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتى ءتوراعاسى ەلسيار قاناعاتوۆ، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتى ءتوراعاسىنىڭ ورىنباسارى سەرىك جاراسبايەۆ، الماتى وبلىسى اكىمىنىڭ ورىنباسارى جاقسىلىق ومار، الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى تۇراتبەك چاراپييەۆ قاتىستى.
ات جارىسى بيىلعى جىلدىڭ 11 ماۋسىمىندا ساعات 10:00-دە استانا قالاسىنىڭ «قازانات» يپپودرومىندا باستالادى. شارا ۇيىمداستىرۋشىلارى – ق ر مادەنيەت جانە سپورت مينيسترلىگى، ق ر «ۇلتتىق سپورت تۇرلەرى قاۋىمداستىعى»، استانا اكىمدىگى، الماتى وبلىسىنىڭ اكىمدىگى جانە «قازاقستاننىڭ بايگە تۇرلەرى قوعامى». الەۋمەتتىك سەرىكتەس «Samruk-Kazyna Trust» الەۋمەتتىك جوبالاردى دامىتۋ قورى.
جارىس باعدارلاماسىنا الامان بايگە – 25 شاقىرىم، توپ بايگە – 15 شاقىرىم، جورعا اتتار جارىسى – 7 شاقىرىم، قۇنان بايگە – 7 شاقىرىم، 2400 جانە 1800 مەترگە ۇشقىر اتتار جارىسى (گلادكيە سكاچكي) وتەدى.
سپورت جانە دەنە شىنىقتىرۋ كوميتەتى ءتوراعاسى ەلسيار بايمۇحامەد ۇلىنىڭ ايتۋىنشا، ۇشقىر اتتار جارىسى بويىنشا (2400 جانە 1800م) سىياقى قورى – 63ملن 600مىڭ تەڭگەنى (200 مىڭ دولل.) قۇرادى. ۇلتتىق جارىس تۇرلەرىنىڭ سىياقى مولشەرى – 36 ملن تەڭگە (115 مىڭ دولل.). سوما جۇلدەگەرلەر اراسىندا 5ء-شى ورىنعا دەيىن ءبولىنىپ بەرىلەدى. جەڭىمپازدار مەن جۇلدەگەرلەردى سالتاناتتى ماراپاتتاۋ جارىس اياقتالعان سوڭ جۇرگىزىلەدى.
ق ر «ۇلتتىق سپورت تۇرلەرى قاۋىمداستىعى» پرەزيدەنتى بەكبولات قاناي ۇلىنىڭ سوزىنشە، 25 شاقىرىمدىق الامان بايگەگە، 15 شاقىرىمدىق توپ بايگەگە، 7 شاقىرىمدىق قۇنان بايگەگە، 7 شاقىرىمدىق جورعا جارىسقا ءار وبلىستان بيىلعى جىلعى ىرىكتەۋ بايگەلەرىندە جۇلدەگەر بولعان تاڭداۋلى سايگۇلىكتەر عانا قاتىسادى. بارلىعى – 130-دان استام ەلىمىزدىڭ جۇيرىكتەرى تىركەلدى.
جارىسقا ەلىمىزدىڭ 14 وبلىسى مەن استانا جانە الماتى قالالارىنان شاباندوزدار قاتىسادى، سونداي-اق، رف، قىرعىزستان، تاجىكستان، تۇركيا، بولگاريا مەن باسقا دا ەلدەردەن قاتىسۋشىلار كەلەدى دەپ كۇتىلۋدە. بۇگىنگى كۇنى ۇلتتىق سپورت تۇرلەرى جاستاردىڭ اراسىندا ۇلكەن قىزىعۋشىلىق تۋدىرىپ وتىر. ەسكى داستۇرلەر اسىرەسە الماتى وبلىسىندا جاڭعىرتىلىپ جاتىر. وبلىستا قازىرگى تاڭدا 1384 دەنە شىنىقتىرۋ كوللەكتيۆتەرىندە ۇلتتىق سپورتپەن اينالىسۋشىلار سانى 46566 ادامدى قۇرايدى. ونىڭ ىشىندە ۇلتتىق ات سپورتى تۇرلەرىمەن 12582 ادام شۇعىلدانادى،-دەدى الماتى وبلىسى اكىمىنىڭ ورىنباسارى جاقسىلىق ومار.
جارىستىڭ ءۇزىلىس كەزىندە «دجيگيتوۆكا»، «تەڭگە ءىلۋ»، «جامبى اتۋ»، «قىز قۋۋ»، قازاقى تازى يتتەر جارىسى سياقتى ۇلتتىق سپورت تۇرلەرىنەن كورسەتىلىمدەر ۇيىمداستىرىلادى.
ايتا كەتەيىك، ق ر مادەنيەت جانە سپورت مينيسترلىگى «ەكسپو-2017» حالىقارالىق كورمەسى اياسىندا حالىقارالىق دەڭگەيدەگى 18 اۋقىمدى سپورتتىق شارا ۇيىمداستىرادى. ەلىمىزدىڭ وڭىرلەرى دە سپورتتىق سايىستاردان قالىس قالمايدى. حالىقارالىق كورمە اياسىندا قازاقستاننىڭ 14 وبلىسىندا 20-دان استام سپورتتىق سايىستار وتكىزىلەدى.
