نۇرسۇلتان نازاربايەۆ يران يسلام رەسپۋبليكاسىنىڭ پرەزيدەنتى حاسان رۋحانيگە تەگەران قالاسىندا بولعان تەررورلىق اكتىلەرگە بايلانىستى كوڭىل ايتۋ جەدەلحاتىن جولدادى. بۇل تۋرالى قامشى اقپاراتتىق اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.
مەملەكەت باسشىسى تەگەران قالاسىنداعى ەل پارلامەنتىنىڭ عيماراتى مەن يمام حومەيني كەسەنەسى اۋماعىنداعى تەررورلىق اكتىلەر سالدارىنان كوپتەگەن ادامنىڭ قازا بولعانى جانە زارداپ شەككەنى تۋرالى حاباردى زور كۇيزەلىسپەن قابىلدادى. ەلباسى قازاقستان حالقىنىڭ جانە جەكە ءوزىنىڭ اتىنان قازا بولعانداردىڭ وتباسىلارى مەن جاقىندارىنا كوڭىل ايتتى.
«ءبىز بەيبىتشىلىك پەن قاۋىپسىزدىككە ءقاۋىپ ءتوندىرىپ وتىرعان حالىقارالىق تەرروريزم مەن ەكسترەميزمنىڭ كەز-كەلگەن ءتۇرىن قاتاڭ ايىپتايمىز. ەلدەرىمىزدىڭ بەيبىت ءومىرى مەن قاۋىپسىزدىگىن قامتاماسىز ەتۋ ءۇشىن قازىرگى زامان قاۋىپ-قاتەرلەرىنە قارسى كۇرەستە قازاقستان يرانمەن ىنتىماقتاستىقتى جالعاستىرۋعا ءارقاشان دايىن ەكەنىن اتاپ وتەمىن»، – دەلىنگەن جەدەلحاتتا.
شولۋشى: ايگەرىم تاۋباي
