عالىمدار 128 اكەلەرگە تاجىريبە جاساعان. ولاردىڭ ءجۇرىس-تۇرىسى مەن مىنەز-قۇلقىن 1 جىل بويى زەرتتەگەن. بالالارىنىڭ تاربيەسىنە قاتىساتىن اكەلەر بالا ينتەللەكتىنىڭ دامۋىنا جاقسى اسەر ەتەتىنى بەلگىلى بولدى. بۇل زەرتتەۋدى لوندونداعى كوللەدجدەردىڭ ءبىرى جۇزەگە اسىرعان.
كوللەدج پروفەسسورى پول رامچانداني «بۇل جۇمىسباستى اكەلەر ءۇشىن سىن. اقشا تابۋدان بولەك، بالالارىڭىزدىڭ تاربيەسىنە دە كوڭىل بولىڭىزدەر»-دەيدى.
بالالى 128 اكەگە زەرتتەۋ جۇرگىزۋ ناتيجەسىندە، اكەلەردىڭ بالالارىن ويناتۋىن، كىتاپ وقىپ بەرۋىن قاداعالاعان. سودان كەيىن بالالاردىڭ دامۋ قابىلەتىنە زەرتتەۋ جۇرگىزىلگەن.
اكەلەردىڭ بالالارىمەن قانشالىقتى كوپ ۋاقىت وتكىزگەنى ولاردىڭ ويلاۋ قابىلەتى مەن ساناسىنىڭ وزگەرۋى مەن قابىلداۋىنا ەرەكشە اسەر ەتەدى ەكەن. دەمەك، بۇل ءوز كەزەگىندە اكەنىڭ بالالارىنا دەگەن قامقورلىعى مەن تاربيەسىنىڭ ماڭىزدىلىعىن كورسەتەدى. سونىمەن بىرگە اكەلەرىنىڭ مىنەزدەرى سالماقتى بالالاردىڭ ينتەللەكتى اكەلەرى اشۋشاڭدارعا قاراعاندا جوعارى بولادى ەكەن. ەر ادامنىڭ ينتەللەكتىسى جوعارى بولعان سايىن ونىڭ بالاسىنىڭ اۋتيزم اۋرۋىنا شالدىعۋ مۇمكىندىگى دە كوبەيەدى ەكەن.
شولۋشى: نازەركە مۇسا
