مەملەكەت باسشىسى ءۇندىستاننىڭ پرەمەر-مينيسترىمەن كەزدەسۋ بارىسىندا ەكى ەل اراسىنداعى قارىم-قاتىناس ءوزارا قۇرمەت پەن سەنىمگە نەگىزدەلگەنىن اتاپ ءوتتى. بۇل تۋرالى قامشى اقپاراتتىق اگەنتتىگى اقورداعا سىلتەمە جاساپ حابارلايدى.
– ءۇندىستاننىڭ شانحاي ىنتىماقتاستىق ۇيىمىنا مۇشە بولۋ ۇدەرىسى وسىدان 12 جىل بۇرىن باستالدى. ەرتەڭ ءۇندىستان دا وسى ۇيىمنىڭ تولىق قۇقىلى مۇشەسى بولادى. ءۇندىستان سياقتى مىقتى ەلدىڭ قاتارىمىزعا قوسىلۋى بىرلەسىپ شەشەتىن ماسەلەلەر اياسىن كەڭەيتۋگە مۇمكىندىك بەرەدى، – دەدى نۇرسۇلتان نازاربايەۆ.
مەملەكەت باسشىسى قازاقستان مەن ءۇندىستان ەكونوميكانىڭ ءتۇرلى سالاسىندا ءوزارا ءىس-قيمىلدىڭ جۇزەگە اسا قويماعان وراسان زور الەۋەتىنە يە ەكەنىن اتاپ ءوتتى.
ءۇندىستاننىڭ پرەمەر-مينيسترى نۇرسۇلتان نازاربايەۆقا قوناقجايلىق كورسەتكەنى ءۇشىن ريزاشىلىعىن ءبىلدىردى.
–2015 جىلى قازاقستانعا العاش رەت كەلگەنىمدە ءسىزدىڭ استانانى دامىتۋ جونىندەگى كوزقاراسىڭىزعا، قازاقستاننىڭ جالپى ەكونوميكالىق ىلگەرىلەۋىنە ءتانتى بولدىم، – دەدى نارەندرا مودي.
كەزدەسۋ سوڭىندا تاراپتار ءوزارا ءىس-قيمىلدىڭ وزەكتى ماسەلەلەرى جونىندە پىكىر الماستى.
شولۋشى: ايگەرىم تاۋباي
