الماتىدا وتكەن بۇكىلالەمدىك قىسقى ۋنيۆەرسيادانى وتكىزۋ ديرەكسياسىنىڭ باسشىسى نايل نۇروۆ قازاق سپورت جانە تۋريزم اكادەمياسىندا ماڭىزدى سپورت شاراسىنىڭ ءوتۋ بارىسىن بايانداپ، قورىتىندى شىعاردى.
جيىندا 28 قاڭتار مەن 5 اقپان ارالىعىندا وتكەن الماتىداعى بۇكىلالەمدىك ستۋدەنتتىك ويىنداردا قازاقستان قۇراماسى مىقتى كورسەتكىشكە يە بولعاندىعىن ايتىپ ءوتىپ، مەملەكەتىمىز جالپىكوماندالىق ەسەپتە ەكىنشى ورىندى يەلەنىپ، 36 مەدالدى (11 التىن، 8 كۇمىس جانە 17 قولا) قانجىعاسىنا بايلاعانىن ەسكە سالدى. قازاقستان قۇراماسىنىڭ قورجىنىنا قازاق سپورت جانە تۋريزم اكادەمياسىنىڭ ستۋدەنتتەرى 7 التىن، 6 كۇمىس جانە 11 قولا مەدال الىپ كەلگەنىن دە تىلگە تيەك ەتتى.
ەسكە سالا كەتەتىن بولساق، الماتىدا وتكەن ۋنيۆەرسيادا ۇلكەن سپورتتىق مۇرا قالدىردى. شاھارىمىزدا 2 ۇلكەن كوپفۋنكسيونالدى سپورتتىق كەشەن 12 مىڭ ادامعا ارنالعان «الماتى ارەنا» جانە 3 مىڭ ادامعا شاقتالىپ «حالىق ارەنا» سالىندى. ونىمەن قوسا سپورتشىلارعا ارنالعان اتلەتيكالىق اۋىل دا تۇرعىزىلعان بولاتىن. ويىن اياقتالعاننان كەيىن، اتلەتيكالىق اۋىلداعى ۇيلەردىڭ 5 مىڭنان استام پاتەرلەرى الماتىدا ءۇي الۋعا كەزەكتە تۇرعان ادامداردىڭ اراسىندا تاراتىلىپ بەرىلدى. قازىرگى تاڭدا جوعارىدا ايتىلعان سپورت كەشەنىندە بارلىق الماتىلىقتار مەن قالا قوناقتارىنىڭ سپورتپەن اينالىسۋعا مۇمكىندىكتەرى بار. اتاپ ايتار بولساق، بوكس، مانەرلەپ سىرعاناۋ، شورت-ترەك، كەرلينگ جانە ءتۇرلى جەكپە-جەك تۇرلەرىمەن شۇعىلدانا الادى.
جيىنعا جينالعانداردىڭ كوپ بولىگىن قىزىقتىرعان سۇراق – قازاقستان جاقىن ارادا قىسقى وليمپيادا ويىندارىن وتكىزۋگە ءۇمىتتى بولا الادى ما؟ ءسوز سويلەۋ بارىسىندا نۇروۆ مىرزا بۇل سۇراقتىڭ انىق جاۋابىن بەردى. الماتى وليمپيادا ويىندارىنىڭ استاناسى مارتەبەسىنە تولىقتاي لايىق جانە سپورتتىق ينفراقۇرىلىمنىڭ دامۋ كورسەتكىشى بويىنشا ويىندا وتكىزۋگە دايىن ەكەنىندىگىن ايتتى.
جيىلعان قاۋىمنىڭ الدىندا قازاق سپورت جانە تۋريزم اكادەمياسىنىڭ پرەزيدەنتى، قازاقستان رەسپۋبليكاسىنىڭ ستۋدەنتتىك سپورت فەدەراسياسىنىڭ باسشىسى قايرات زاكيريانوۆ ءسوز سويلەدى. ول ۋنيۆەرسيادانى الماتىدا وتكىزۋ كەزىندەگى ءبىرشاما قيىندىقتاردى، سونىمەن قاتار ەلىمىزدە وتكەن بۇل شارا ۋنيۆەرسيادا تاريحىندا ەڭ جوعارعى دەڭگەيدە ۇيىمداستىرىلعان شارا ەكەنىن ايتىپ ءوتتى.
