پاۆلودار وبلىسىنا جۇمىس ساپارى بارىسىندا ءماجىلىس دەپۋتاتتارى ايگۇل نۇركينا، اناتوليي بويچين جانە ۆەرا كيم «زاماناۋي مەكتەپ» جوباسىن ىسكە اسىرۋ اياسىندا جوندەۋ جۇمىستارى جۇرگىزىلىپ جاتقان اقسۋ قالاسىنداعى №4 ءبىلىم بەرۋ مەكەمەسىنىڭ تىنىس-تىرشىلىگىمەن تانىستى.
بۇل مەكتەپ 1967 جىلى سالىنعان. قازىرگى ۋاقىتتا ەكى مەردىگەر ۇيىم تولىققاندى جوندەۋ جۇمىستارىن جۇرگىزۋدە.
ءماجىلىس دەپۋتاتتارى جاڭالاۋ كەزىندە اسىرەسە ءورت قاۋىپسىزدىگى ماسەلەسىنە باسا نازار اۋداردى.
ءبىلىم بەرۋ مەكەمەلەرىنە قاتىستى جالپى اقپاراتتى العا تارتا كەلىپ، اناتويي بويچين:
– وتكەن اپتادا ءبىز ەرتىس-بايان ءوڭىرىنىڭ بىرنەشە اۋداندارىنا بارىپ، مەكتەپتەردى جوندەۋ جۇمىستارىن كوردىك. بالالاردىڭ جان-جاقتى دامۋى ءۇشىن فۋتبول جانە باسكەتبول الاڭدارى، كوشە ترەناجەرلەرى، ويىن الاڭدارى سياقتى قوسىمشا نىساندار سالىناتىنى قۋانتادى. مەكتەپتەردەگى جوندەۋ جۇمىستارى دەپۋتاتتار مەن پارتيا وكىلدەرىنىڭ باقىلاۋىندا بولادى، – دەدى.
ءبىلىم باسقارماسى باسشىلارىنىڭ ايتۋىنشا زاماناۋي مەكتەپ تەك قانا كۇردەلى جوندەۋ ەمەس. سونىمەن قاتار، جاڭا قۇرال-جابدىقتارمەن قامتاماسىز ەتىلىپ، مۇعالىمدەرگە دە، وقۋشىلارعا دا قاجەتتى جاعداي جاسالاتىن بولادى.
جالپى، 2025 جىلعا دەيىن وبلىستىڭ 82 مەكتەبىندە «زاماناۋي مەكتەپ» جوباسى جۇزەگە اسىرىلادى.
بۇدان بولەك، «Amanat» پارتياسىنىڭ سايلاۋ الدى پلاتفورماسى نەگىزىندە اۋىلدىق 54 مەكتەپتە قايتا جابدىقتاۋ جۇمىستارى جۇرگىزىلمەك.
ءماجىلىستىڭ باسپا ءسوز قىزمەتى
پىكىر قالدىرۋ