استانا قالاسىنىڭ اكىمى اسەت يسەكەشيەۆ ەلوردا تۇرعىندارىن تاۋەلسىزدىك كۇنىمەن قۇتتىقتادى، دەپ حابارلايدى Qamshy.kz اقپارات اگەنتتىگى استانا اكىمدىگىنىڭ  باسپا ءسوز قىزمەتىنە سىلتەمە جاساي وتىرىپ.

"تاۋەلسىزدىك – بارشا قازاقستان حالقى ەرەكشە قادىرلەيتىن، وتكەننەن تاعىلىم الىپ، كەلەشەككە بايىپتى قادام جاسايتىن ماڭىزدى كۇن. بۇل مەرەكە حالقىمىزدىڭ سان عاسىرلىق ارمان-مۇراتتارىمەن ساباقتاسىپ جاتقانىمەن دە قۇندى.

اتا-بابالارىمىز اڭساعان ازاتتىق تاڭىنىڭ اتقانىنا بيىل جيىرما التى جىل تولىپ وتىر. شيرەك عاسىردان استام ۋاقىتتا ەلىمىز ەلباسىمىزدىڭ كورەگەن ساياساتىنىڭ ارقاسىندا بيىك بەلەستەردى باعىندىرىپ، تولايىم تابىستارعا قول جەتكىزدى. تاۋەلسىز ەلىمىز بەن ەلوردامىزدىڭ وسىپ-وركەندەۋى، اتقارىلعان ىرگەلى ىستەر – جەتىستىكتەرىمىزدىڭ ايقىن ايعاعى.

ەل مەرەيىن اسقاقتاتقان ىلكىمدى دە يگى جۇمىستارعا قاراپايىم ازاماتتاردىڭ دا قوسقان ۇلەسى زور. سوندىقتان تاۋەلسىزدىك كۇنى شىن مانىسىندەگى جالپىحالىقتىق مەرەكە. تاۋەلسىزدىگىمىز تۇعىرلى، بەرەكەمىز باياندى بولعاي.

دەندەرىڭىزگە ساۋلىق، وتباسىلارىڭىزعا بەرەكە، ەڭبەكتەرىڭىزگە مول تابىس تىلەيمىن!" - دەلىنگەن حابارلامادا.