جىندار الەمىنە قاتىستى تىلسىم حيكايالار ءجيى ايتىلادى. ءوز كوزىمىزبەن كورمەگەن سوڭ ونشا سەنە بەرمەيمىز. ەلدەن ەستىگەن اڭگىمەلەردى ەرتەگى سەكىلدى قابىلدايمىز. 13 جاستاعى ماقسۇتتىڭ (ەسىمى وزگەرتىلگەن) ىشىنە جىن كىرگەندە تۋىستارى دا سولاي ويلاعان. جەتكىنشەك ءبىرتۇرلى قىلىقتار شىعارا باستاعاندا ونىسىن جاس ەرەكشەلىگىنە بالاپ، ءمان بەرمەگەن. الايدا جاعداي ۋشىعىپ كەتكەندە بارىپ ساندارىن سوققان. ءبىز وسى جانتۇرشىگەرلىك وقيعانى ماقسۇتتىڭ ءوز اۋزىنان جازىپ الدىق. ونىڭ اعاسى وماردىڭ دا ايتارى كوپ ەكەن. جىن شىعارۋمەن اينالىساتىن ارىستان ۇمبەتوۆتىڭ سوزدەرىن ماقالامىزعا تۇزدىق بولسىن دەپ قوستىق.
«2017 جىل. تۋىستارىمنىڭ ايتۋىنشا، ءبىرىنشى مىنەزىم وزگەرە باستاپتى. ۇنەمى جالعىز جۇرەتىنمىن. كەيدە ءۇيدەگىلەرگە ەسكەرتپەي، اۋىلدىڭ شەتىنە شىعىپ كەتەمىن. ءبارى مەنىڭ ەركىمنەن تىس بولدى. ونى تىلمەن ايتىپ ءتۇسىندىرۋ مۇمكىن ەمەس. بىردە ءۇي تاپسىرماسىن ورىنداپ وتىرعانمىن، جالپ ەتىپ جارىق ءسونىپ قالدى. ويىمدا ەشتەڭە جوق، ماي شامدى جاعىپ، ساباعىمدى وقي بەردىم. ءبىرازدان كەيىن ءبىر قورقىنىشتى نارسە ەلەستەي باستادى. كوزىمە اپ-انىق كورىنىپ، بەتىمە ۇڭىلە قارايدى. ۇرەيىم ۇشقانى سونشالىق، تۇرعان جەرىمدە قالشيىپ قاتىپ قالدىم. تەرەزەدەن قاشىپ شىعايىن دەسەم، بىرەۋ شەگەلەپ قويعانداي تابانىم جەردەن اجىرامادى. قولىمنان ۇستاپ، جىبەرمەي تۇرعانداي. بار كۇشىمدى جيىپ، ەسىككە قاراي جۇگىردىم، تاعى دا مەنىڭ قارسى الدىمنان شىعىپ، جولىمدى بوگەدى. تىنىسىم تارىلىپ، ءتىلىم بايلانىپ، ەشكىمدى كومەككە شاقىرا المادىم. ودان قۇتىلۋ مۇمكىن ەمەس ەكەنىن ءتۇسىندىم. قۇتىلا المادىم. ول دەگەنىنە جەتتى. ارى قاراي ەسىمدى بىلمەيمىن»... – دەيدى ماقسۇت.
كوبىنەسە جىن كىرگەن ادامنىڭ ءوزى كىنالى...
جىن شىعارۋدى كاسىپ ەمەس، وزگەلەرگە كومەكتەسۋ دەپ بىلەتىن ارىستان ۇمبەتوۆتىڭ پىكىرىنشە، جىن ادامدارعا بەتالدى تيىسە بەرمەيدى، كوبىنەسە وعان جىن كىرگەن ادامنىڭ ءوزى كىنالى بولادى ەكەن.
- جىن ادامنىڭ ىشىنە ەكى ءتۇرلى جاعدايدا كىرەدى.
بىرىنشىدەن، لاس ءجۇرۋ، ىشىمدىككە سالىنۋ، قۇمار ويىنعا بەرىلۋ سەكىلدى جامان ادەتتەردىڭ كەسىرىنەن ادامعا جىن كىرىپ كەتۋ ءقاۋپى بار. يسلامنىڭ ءوزى تازالىقتان تۇرادى. حاديستە دە «تازالىق – يماننىڭ جارتىسى» دەلىنگەن. ءتىپتى، بەس ۋاقىت ناماز وقيتىن پەندەلەر دە ونداي قاتەردەن امان ەمەس. ادامنىڭ جانى دا، ءتانى دە تازا بولۋى كەرەك.
جىندار قاستاندىق سەبەبىنەن دە ادامعا كىرۋى مۇمكىن. ونى ءقازىر ماگيا دەپ تە، قازاقشا سيقىر دەپ تە اتاپ جاتادى. بۇعان كوبىنەسە ءىشتارلىق پەن قىزعانىش سەبەپ بولادى. جىندار ادامنىڭ دەنەسىنە كەز كەلگەن ۋاقىتتا كىرىپ كەتەدى. ءتىپتى، ولارعا ادامنىڭ ىشىنە كىرۋى ءۇشىن سەكۋندتىڭ ءوزى كوپ بولۋى مۇمكىن، - دەيدى ارىستان ۇمبەتوۆ.
جىن كىرگەن ادام قانداي بولادى؟
جىن يەكتەگەن ماقسۇت اقىلىنان ايرىلىپ قالعاندىقتان، كوپ نارسە ەسىندە جوق. ەندىگى اڭگىمەنى ومار اعاسىنىڭ اۋزىنان ەستيىك.
«ءۇيدىڭ ءىشى ورتەنىپ جاتىر. ماقسۇت قاشىپ ءجۇرىپ، ماي شامدى قۇلاتقان سياقتى. ال ماقسۇتتىڭ كوزى شاراسىنان شىعىپ كەتەردەي باقىرايعان... كوزدەرى قىپ-قىزىل... ادام شوشيتىن داۋىس شىعارىپ، ايعايلاي بەرەءدى... الەمتاپىرىق جۇزىنە تۋرا قاراۋ مۇمكىن ەمەس».
ارىستان ۇمبەتوۆ جىن كىرگەن ادامنىڭ ايقىن بەلگىلەرى بولاتىنىن جوققا شىعارمايدى.
- جىن كىرگەن ادامنىڭ ىس-ارەكەتتەرى ەشكىمگە ۇقسامايدى. ول ادام نەشە ءتۇرلى سوزدەردى ايتىپ، ميعا قونبايتىن تۇسىنىكسىز قىلىقتار جاسايدى. ال كوپشىلىك بىلە بەرمەيتىن بەلگىلەرى: باسى ءجيى اۋىرادى، ءىشى وتە بەرەدى. ولارعا بۇل كەزدە دارى-دارمەك مۇلدەم كومەكتەسپەيدى. ىشىنە جىن كىرگەن ادامنىڭ كوزى ۇنەمى ويناقشىپ تۇرادى. ولار ادامنىڭ كوزىنە تىك قاراپ سويلەي المايدى. باسقا ادامدار سەكىلدى بەلگىلى ءبىر ۋاقىتتا ۇيىقتاپ، تۇرا المايدى. ولاردىڭ ۇيقىسى 100 پايىز بۇزىلادى، ءتىپتى، 2-3 ساعات ۇيىقتاعان كەزدە دە تىنىعا المايدى، - دەيدى ارىستان ۇمبەتوۆ.
جىنداردان قورقۋعا بولمايدى
ماقسۇتتى جىن سوققانىنا وماردىڭ ەش كۇمانى قالمايدى. سەبەبى ءوزى ناماز وقيدى، دىننەن حابارى بار. ماقسۇتتى بيلەپ العان جىن ەكى كۇن بويى ۇيدەگىلەردى ابىگەرگە سالادى. وماردىڭ جالعىز ءوزى ءقايتسىن، ماقسۇتقا يە بولا المايدى. ابدەن باسىنعان جىندار سول ۇيدەگى تاعى ەكى بالانىڭ ىشىنە كىرەدى. ول جىنداردى ومار قاسيەتتى قۇران اياتتارىن وقىپ شىعارىپ جىبەرەدى. وتباسى مۇشەلەرى اقىلداسا كەلە، اۋداننىڭ باس يمامىن، توڭىرەكتەگى ءۇش-تورت اۋىلدىڭ يمامدارىن شاقىرادى. ماقسۇتتى كورگەن مولدالار: «مىنا جىن كۇشەيىپ العان»، - دەپ ۇيگە كىرمەي قويادى.
ارىستان ۇمبەتوۆ «ءبىز جىنداردان ەمەس، تەك اللا تاعالادان قورقۋىمىز كەرەك»، - دەگەندى ايتادى.
- جىن دا – اللانىڭ جاراتىلىسى. كەيدە جىندار ادامنىڭ وزىنەن قورىققانىن پايدالانىپ كەتەدى. اللا تاعالا قۇراندا: «ادامزاتتان بۇرىن جىننىڭ قاۋىمىن جاراتقانبىز»، - دەيدى. اللانىڭ جاراتقان جاراتىلىسى بولسا، نەگە ءبىز ودان قورقۋىمىز كەرەك؟ عالامتوردا جىن كىرگەن ادامدارعا قاتىستى ءتۇرلى ۆيدەولار بار. جىننان قورقاتىن ادامداردىڭ بۇل ۆيدەولاردى كورمەگەنى دۇرىس. كوبى وسىنداي ۆيدەولاردى قىزىعىپ كورەدى دە، شوشىنىپ قالادى. جىنداردان قاتتى ۇرەيلەنىپ جۇرۋگە بولمايدى. كەرىسىنشە ءوز-وزىن قايراپ، قورىقپاۋعا تىرىسۋ كەرەك. «قورىققانعا قوس كورىنەدى» دەگەن ماقال بار عوي، - دەيدى ارىستان ۇمبەتوۆ.
جىنداردىڭ سۇيىكتى تاماعى مەن ءومىر سۇرەتىن ورىندارى
امالى قۇرىعان ومار جاقىن ماڭداعى تاعى ءبىر اۋىلدىڭ يمامىنا جولىعادى. ول مىنەزدى كىسى ەكەن، بىرنەشە كۇن ماقسۇتتىڭ جانىندا بولىپ، ومارعا كومەكتەسەدى. ءتىپتى، ماقسۇتتىڭ ىشىندەگى جىنمەن تىكەلەي بايلانىسقا شىعىپ تىلدەسەدى. ول جىن يمامعا: «مەن ءسىزدى تانيمىن»، - دەپ ايتادى. ماقسۇتتىڭ ىشىنە 2013 جىلى كىرگەنىن مويىندايدى.
وماردىڭ سوزىنشە، ماقسۇت 2013 جىلى اناسىمەن رەنجىسىپ، ءۇيدەن شىعىپ كەتكەن. ەكى اۋىلدىڭ ورتاسىنداعى زيراتقا بارعاندا قاتتى شوشىنعان، سول كەزدە ىشىنە جىن كىرىپ كەتكەن.
- قۇراندا «ءبىز ادامدار مەن جىنداردى وزىمىزگە قۇلشىلىق ەتۋ ءۇشىن جاراتتىق»، - دەگەن ايات بار. پايعامبارىمىز (س.ع.س.) «سەندەر جىنداردى كورە المايسىڭدار، ءبىراق ولار سەندەردى كورە الادى»، - دەگەن. جىندار دا ءبىز سەكىلدى جەر بەتىندە ءومىر سۇرەدى. ءبىراق حاديستە ايتىلعانداي، جىندار بۇزىلعان ۇيلەردە، قورالاردا، كۇل-قوقىستا ءومىر سۇرەدى. جىندار اللا تاعالانىڭ امىرىنە قارسى كەلگەندىكتەن، ولارعا وسىنداي جەرلەردى مەكەن رەتىندە بەرگەن. جىنداردىڭ ءسۇيىپ جەيتىن تاعامدارى – ادامداردىڭ قوقىسقا تاستايتىن قالعان-قۇتقان تاماعى، كارتوپ، پيازدىڭ قابىعى. سوندىقتان ايەلدەر تاماق پىسىرگەندە اسحانانى وتە تازا ۇستاۋى كەرەك. كەيبىر ۇيلەردە ءتۇرلى دىبىستار ەستىلىپ جاتادى. نەگە؟ سەبەبى كەي ايەلدەر اسحانانى تازا ۇستامايدى. كوكونىستەردىڭ قابىعى ءبىر جاقتا، قالعان-قۇتقان تاماقتار ءبىر جاقتا شاشىلىپ جاتاتىندىقتان، ءتۇرلى بەيمالىم دىبىستار ەستىلىپ جاتادى، - دەيدى ارىستان ۇمبەتوۆ.
ادامدار تۋرالى مالىمەتتى جىندار قايدان الادى؟
زيراتتىڭ جانىندا جاتقان ماقسۇتتى ءبىر مالشى تاۋىپ الىپ، يمامعا اپارادى. الگى يمام ماقسۇتقا دەم سالىپ ەمدەگەن. ماقسۇتتىڭ ىشىندەگى جىن وسى دەم سالعان يمامدى تانىپ وتىر ەكەن.
ماقسۇتتىڭ ىشىندەگى جىن ءبىر سوزىندە: «ماقسۇت وسكەندە ءدىن عۇلاماسى بولادى. ءبىز وعان كەدەرگى جاساپ، جامان جولعا ءتۇسىرۋىمىز كەرەك»، - دەپتى.
ارىستان ۇمبەتوۆ ادامنىڭ بولاشاق ءومىرى تۋرالى اقپاراتتى جىنداردىڭ قايدان الاتىنىن ءتۇسىندىرىپ بەردى.
- ءبىز ءقازىر باقسى، ەكستراسەنس دەپ جاتامىز عوي، سولار جىنمەن بايلانىس جاسايدى. ارمان قۋانىشبايەۆ دەگەن عالىم ءبىر ۋاعىزىندا: «ءبىر ەكتراسەنسكە نەمەسە باقسىعا 3 مىڭنان 2-3 ملن-عا دەيىن جىن قىزمەت ەتەدى»، - دەگەن.
بۇرىن بالا كەزىمىزدە «جۇلدىز اقتى»، - دەپ ايتاتىنبىز. ونىڭ ءمانىسىن ءدىني ءبىلىم العاننان كەيىن عانا تۇسىنە باستادىق. جىندار جەردە ءومىر سۇرگەنىمەن، كوككە كوتەرىلە الادى. ال كوكتەگى پەرىشتەلەر بىر-بىرىنە جەردەگى كەي ادامداردىڭ تاعدىرىن ايتىپ، اڭگىمەلەسەدى. جىندار تىڭ تىڭداپ، اقپارات ۇرلاۋ ءۇشىن كوككە كوتەرىلەدى. سول كەزدە باسقا پەرىشتەلەر كوككە كوتەرىلىپ بارا جاتقان جىنداردى قۋىپ جىبەرۋ ءۇشىن جۇلدىزبەن ۇرادى ەكەن. سونىڭ وزىندە جىندار كەيبىرىن شالا-پۇلا ەستىپ قالىپ، كورىپكەلدەرگە جەتكىزەدى، - دەيدى ارىستان ۇمبەتوۆ.
جىندى ادام شىعارمايدى، اللا شىعارادى
ومار ءمۇفتياتقا حابارلاسىپ، جىن شىعاراتىن وقۋى كۇشتى مولدانىڭ ءنومىرىن الادى. الگى مولدا ماقسۇتتى قالاعا الدىرىپ، 10 كۇندەي دەم سالىپ ەمدەيدى.
ارىستان ۇمبەتوۆ جىننىڭ شىعۋ-شىقپاۋى ادامعا ەمەس، اللاعا قاتىستى ەكەنىن ايتادى. جىن تەك جاراتۋشىنىڭ قالاۋىمەن ادامنىڭ دەنەسىن تاستاپ شىعادى.
- پايعامبارىمىز (س.ع.س.): «جىندار ءۇش-تورت مىڭ جىلعا دەيىن ءومىر سۇرە الادى»، - دەگەن. ءبىراق ولاردىڭ اقىلى 13 جاستاعى بالانىكىندەي بولادى ەكەن. جىندار دا «مۇسىلمان»، «كاپىر» دەپ بولىنەدى. ولاردىڭ ىشىندە قىرسىقتارى بار. ءوز تاجىريبەمنەن ايتايىن، 2017 جىلى ءبىر بويجەتكەننىڭ جىنىن شىعارۋ ءۇشىن 42 كۇن قۇران وقىدىم. العاشقى 20 كۇن وتە اۋىر ءوتتى. 42 كۇننەن كەيىن عانا الگى قىزدىڭ بەتى بەرى قارادى. مەنىڭ تاجىريبەمدەگى ەڭ قيىن وقيعا – وسى. ءبىراق جىننىڭ شىعۋ-شىقپاۋى ادامنىڭ قولىنداعى دۇنيە ەمەس. جىندى ادام شىعارمايدى. ادام بالاسى تەك بۇكىل ىنتا-جىگەرىمەن قۇران وقيدى. ال جىننىڭ شىعۋ-شىقپاۋىن اللا تاعالىنىڭ ءوزى شەشەدى. بۇل جەردە وقىپ جاتقان ادام مەن وقىتىلىپ جاتقان ادامنىڭ سەنىمى كەرەك، - دەيدى ارىستان ۇمبەتوۆ.
جىندانعان ادامدار مەن ىشىنە جىن كىرگەن ادامدار
«پسيحيكالىق دەرتكە شالدىققان كەيبىر ادامداردىڭ ىشىنە جىن كىرگەن بولۋى مۇمكىن بە؟»، - دەگەن سۇراق تۋىندايدى وسىندايدا. مۇنداي وقيعالار ارىستان ۇمبەتوۆتىڭ توعىز جىلدىق تاجىريبەسىندە ءۇش-تورت رەت كەزدەسىپتى. الايدا جىندىحانادا جاتقان بارلىق ناۋقاسقا بىردەي جىن كىرىپ كەتتى دەۋگە بولمايدى ەكەن.
- بىرەۋلەر جول اپاتىنان كەيىن پسيحولوگيالىق اۋىتقۋعا ۇشىراۋى مۇمكىن. ءار ادامنىڭ باسىندا ءارتۇرلى تاعدىر بولعاندىقتان، ءبىز ءبىرىنشى ناقتى مەديسينالىق دياگنوز بار ما، جوق پا دەپ سۇراپ الامىز. ەگەر دياگنوزى قويىلعان بولسا، وعان ءبىز كومەكتەسە المايمىز. ادامنىڭ موينىنداعى نەمەسە باسىنداعى تامىرى قىسىلىپ تۇرسا، ونى قانشا وقىتساڭ دا، پايدا جوق.
پسيحولوگيالىق اۋىتقۋ ورتالىعىندا جاتقان ادامعا دەم سالىپ، 10-20 كۇن قۇران وقىعاننان كەيىن ايىعىپ كەتكەن جاعدايلار بولدى. الايدا ەڭ ءبىرىنشى بارلىعىن انىقتاپ الۋ كەرەك. انىق-قانىعىنا جەتپەي تۇرىپ، بىردەن ايات، سۇرەلەردى وقي بەرگەن دۇرىس ەمەس، - دەيدى ارىستان ۇمبەتوۆ.
ساقتانساڭ، ساقتايدى...
جىن – ادامعا بەيمالىم، تىلسىم جاراتىلىس. ولاردان ساقتانۋدىڭ ەڭ وڭاي جولىن ارىستان ۇمبەتوۆ ايتىپ بەردى.
- جىنداردان ساقتانۋدىڭ وتە وڭاي جولى – ۇنەمى دارەتپەن ءجۇرۋ. ءبىزدىڭ قوعامدا دارەتتى تەك ناماز وقيتىن ادامدار عانا الادى دەگەن وي قالىپتاسىپ قالعان. بۇل – قاتە پىكىر. ناماز وقيتىن ادام ءوزىنىڭ نامازى ءۇشىن دارەت الادى. ناماز وقىمايتىن ادامدار، ەڭ بولماسا دارەت جاعىنا كوڭىل ءبولۋى كەرەك. «ۇلى ءسوزدىڭ ۇياتى جوق» دەمەكشى، پايعامبارىمىزدىڭ (س.ع.س) ءوزى دە ايتقان، ءار قىز بالا شاريعات بويىنشا حايىز كەزىندە تازالانىپ، عۇسىل الۋعا مىندەتتى. ءقازىر جىنعا بايلانىستى ماسەلەمەن ۇلداردان گورى قىزدار كوپ كەلىپ جاتادى. سەبەبى تازالىققا نەمقۇرايلى قارايدى. دارەت پەن عۇسىل الىپ، كاليمامىزدى ايتىپ جۇرگەنىمىزدىڭ ءوزى بىزگە قورعان بولادى. وسىدان 20 جىل بۇرىن ءبىز جىنعا بايلانىستى ماسەلەلەردى ەستىمەيتىنبىز. ەستىگەن كۇننىڭ وزىندە ىلۋدە بىرەۋ عانا بولاتىن. وسى كۇنى كوبەيىپ كەتتى. بۇعان كوبىنەسە ءوزىمىز سەبەپكەرمىز. جانى مەن ءتانىن تازا ۇستاعان ادام وندايدان امان بولادى، - دەپ ءسوزىن اياقتادى ارىستان ۇمبەتوۆ.
ايتپاقشى، ماقسۇتتى اياقتان شالىپ، ايانىشتى كۇيگە تۇسىرگەن جىن قايدا؟ ول دەگەنىنە جەتە المادى. «ءدىن عۇلاماسى بولۋىنا جول بەرمەيمىن»، - دەپ قانشا جانتالاسسا دا، اللانىڭ قالاۋىمەن بالانى تاستاپ شىقتى. ال ماقسۇت ءقازىر قاريلار مەكتەبىندە وقىپ ءجۇر. سوعان قاراعاندا، جىننىڭ ءسوزى شىن بولۋى دا مۇمكىن.
