تانىمال سازگەر جارىلقاسىن داۋلەت كورەرمەن نازارىنا ءوز ينتەللەكتۋالدىق جوباسىن ۇسىندى. جوبانىڭ باستى ماقساتى – ءان ارقىلى تىڭدارماندى ۇلتتىق قۇندىلىقتارعا باۋلۋ، يگى ىستەرگە شاقىرۋ جانە قازاقتىڭ ۇمىتىلىپ بارا جاتقان ءداستۇرىن جاڭعىرتۋ.

تانىس بولىڭىزدار. ءانشى امان ابەن 1995 جىلى اقتوبە قالاسىندا دۇنيەگە كەلگەن.

2012 جىلى بايان سىنىبىن ءبىتىردى.

2013-2017 جىلدارى قازاق ۇلتتىق ونەر ۋنيۆەرسيتەتىنىڭ كوللەدجىندە ەسترادا ماماندىعى بويىنشا ءبىلىم الدى.

گيتارا مەن فورتەپيانودا وينايدى.

اماننىڭ پروديۋسەرى جارىلقاسىن داۋلەت جاڭا جوباسى تۋرالى Qamshy.kz اقپارات اگەنتتىگىنە تولىعىراق ايتىپ بەردى.

- ءان، تەرمە – قازاقتىڭ قانىنا سىڭگەن تاربيە قۇرالى. قازاق بالالارىن تەرمەمەن، جىرمەن تاربيەلەگەن. اقتامبەردى، ماحامبەت، شالكيىز، دۋلات جىراۋلار – سوعان دالەل. ابىلاي حاننىڭ بۇقارعا وڭ تىزەسىنەن ورىن بەرۋى تەگىن ەمەس. سوندىقتان امان ابەن ءوز اندەرى ارقىلى ۇلتتىق قۇندىلىقتى دارىپتەيدى. ال ۇلتتىق قۇندىلىق ۇياتتان باستاۋ الادى. ۋاقىت وتە كەلە ادامداردىڭ قۇندىلىعى وزگەرە باستادى. كىندىك اشىپ، جالاڭاشتانىپ، سالماعى جوق ءان ايتۋعا ارلانبايتىن بولدىق. وسىندايدان ءسال دە بولسا قوعامدى اراشالايىق دەگەن ماقساتپەن وسى جوبانى قولعا الىپ وتىرمىن.

ءقازىر جەڭىل، قىزىقتى اۋەندەردى ءسۇيسىنىپ تىڭدايمىز دا، مارجانى توگىلىپ تۇرسا دا، اۋىرلاۋ اندەردى قابىلداي المايمىز. جاڭا جوباداعى ءان ماتىندەرى جاستاردىڭ ەسىندە قالاتىنداي بولۋى مۇمكىن. سول ارقىلى ۇلتتىق قۇندىلىقتارىمىزدى ناسيحاتتاعالى وتىرامىز.

ءقازىر جاڭا ءان جازدىردىق. وندا «ەت جەپ كەت» دەگەن ءسوز ءجيى قولدانىلادى.

«داستارحانىم كەڭ-كەڭ،

تورىمە شىق سەن-سەن.

تورىمە شىق، تورلەت،

ەت جەپ كەت»، - دەگەن سوزدەرى بار.

قاراپ وتىرسىڭ، ءسوزى ءبىرتۇرلى، ءبىراق ونىڭ استارىنان قوناقجايلىقتى بايقاۋعا بولادى. ءبىز جەڭىل انگە بارۋىمىز مۇمكىن، ءبىراق جەڭىل سوزگە بارمايمىز.

كەز كەلگەن قازاقتىڭ ۇيىنە بارساڭىز ەت جەپ قايتاسىز. قازاق ءۇشىن ەتكە شاقىرۋ ساياسي ارەنا ىسپەتتەس. قازاقتار بىرەۋگە وكپەلەسە دە، ەتكە شاقىرىپ، داستارحانعا ءتىسىن قاقپاي مالدىڭ باسىن قويعان. قازاق دۇشپانىنا دەيىن ەت بەرىپ وتىر. سوندىقتان وسى ءان ارقىلى «قازاق سونداي كەرەمەت بولاتىن، سەن دە سونداي بول» دەگەندى جەتكىزگىمىز كەلدى.

- امان ابەن قانداي جانردا ءان ايتادى؟

- ەسترادا جانرىندا. سەبەبى ونىڭ داۋىسى ەستراداعا جاقسى كەلەدى. ەسترادا – حالىققا ەڭ جاقىن جانر. تىڭدارمان رامازان ستامعازييەۆتى تانىماۋى مۇمكىن، ءبىراق ەسترادادا جۇرگەن ءانشىنى بىلەدى.

ءقازىر انشىلەر ءبىزدىڭ ۇگىت-ناسيحات قۇرالىمىزعا اينالدى. كوپ جاستار انشىلەرگە ەلىكتەيدى. سولارعا ۇقساعىسى كەلەدى. سوندىقتان حالىقتىڭ الدىندا ءجۇرىپ، ونەرىڭدى پاش ەتۋدىڭ قانشالىقتى ماڭىزدى ەكەنىن تۇسىنەمىز.

ماسەلەن، مەن Ninety one-دى نەگە جەككوردىم؟ قىزتەكەلەردىڭ سىقپىتىن جاساپ شىعاردى عوي. بۇل – سوندايلارعا قاراما-قارسى دايىندالىپ جاتقان جوبا.

ءبىزدىڭ نەگىزگى ءپرينسيپىمىز – بارعان جەردە «سەنىڭ اتاڭ قازاق بولعان، اتاڭ قازاق وتىرىك ايتپاعان، اتاڭ قازاق ءسوز كوتەرگەن، اتاڭ قازاق نامىسشىل بولعان، ات توبەلىندەي قازاق كەڭ-بايتاق جەردى ۇستاعان» دەگەندى ايتىپ ءجۇرۋ. 

ءانىمىز جاستاردى قابىلداۋىنا لايىقتالىپ جاسالۋى مۇمكىن. قازاقتىڭ قاراكوز قىزدارى وزگە ۇلت وكىلدەرىنىڭ ەتەگىنەن ۇستاپ كەتىپ جاتىر. وسى ماسەلەگە قاتىستى دا ءان جازدىردىق. ونىڭ ءسوزىن ايتىسكەر اقىن ءبىرجان بايتۋوۆ جازدى. جاقىندا كورەرمەن نازارىنا ۇسىنىلادى. وندا «نەگە وزگەگە تۇرمىسقا شىعاسىڭ؟!»، - دەگەن ءسوز جوق. «قارىنداسىم، سەن ءوز ايدىنىڭنان ۇشىپ قايدا باراسىڭ؟»، - دەگەن سارىندا جازىلعان ءان. ونىڭ قايىرماسىندا قىزدى شاعالاعا تەڭەپ، «ءوز ايدىنىنان ۇشىپ كەتىپ، شالشىق سۋعا شومىلعان شاعالام-اي»، - دەپ استارلى جەتكىزەدى. «كەتپەشى قارىنداسىم»، - دەگەن ءۇن جاتىر وندا.

امان ابەن كوممەرسيالىق جوبا ەمەس. وعان زور ءۇمىت ارتىلىپ، بيىك ماقسات قويىلادى. سوندىقتان وعان وڭاي سوقپاۋى مۇمكىن.

ءان ارقىلى كوپتەگەن الەۋمەتتىك ماسەلەنى كوتەرمەكپىز. ءتورت انگە داۋىس جازدىرىپ قويدىق. ەكى انگە كليپ ءتۇسىرۋ جوسپاردا بار. اندەرى جۇرتقا وتپەي قالۋى مۇمكىن.

اڭگىمەڭىزگە راقمەت!

امان ابەننىڭ اندەرىن ankui.kz سايتىنان تىڭداي الاسىزدار!